In xi qʼet tqanil tiʼj Tyol Dios kyoj yol in che yolin xjal tiʼj kyoj tnam Irlanda ex Gran Bretaña
In nok tilil kyuʼn testigo de Jehová tuʼn tpon tqanil tiʼj Tyol Dios tojku kyyol xjal toj tnam Irlanda ex Gran Bretaña. * Kyoj qe tnam lu, nya oʼkx in che yolin xjal tiʼj inglés, ax ikx in che yolin toj yol gaélico escocés, galés ex inlandés.
Toj t-xjawil septiembre toj abʼqʼi 2012, etz qyekʼune aju akʼaj qtembʼile toj Internet jw.org kyoj nimku yol, kyxol jlu ateʼtoq yol irlandés ex galés. Atzunju yol gaélico escocés etz toj agosto toj abʼqʼi 2014. Ax ikx in che etz nimku onbʼil tiʼj Tyol Dios quʼne kyoj qe yol lu. ¿Tiʼ kyxim xjal tiʼj?
Xi tkʼamoʼn jun nejenel te jun okslabʼil jun tal uʼj aju tkuʼx tqanil tiʼj Tyol Dios toj, tzʼibʼin toj yol gaélico escocés ex tejtzun tbʼaj tuʼjin etz taʼl twitz. ¿Tiquʼn? Tuʼnju tbʼanelxix ela toj twitz aju alkye tten kubʼ qʼoʼn toj tyol ex tqʼama jlu: «¿Alkye xbʼaj tradusirin te jlu? ¡Tbʼanelxix taʼ!».
E okx junlo 750 xjal toj jw.org toj yol gaélico escocés oʼkx toj tnejel xjaw.
Jun aj xnaqʼtzal te Universidad Nacional te Irlanda, toj Galway, tzaj tqʼamaʼn jlu kye junjun testigo de Jehová qa mintiʼx in ximin tiʼj okslabʼil. Noqtzun tuʼnj, tej tok tbʼiʼn qa jaku tzaj qʼoʼn jun uʼj aju tok tbʼi ¿Alkye tqanil tkuʼx toj Tyol Dios?, xi tqanin jun tuʼj. Tqʼama qa aqeju uʼj tkuʼx tqanil Tyol Dios toj il tiʼj t-xi qʼet kye kykyaqil xjal tojku kyyol xjal ex tqʼama qa in tzalaj kyiʼj testigo de Jehová tuʼnju in kubʼ kyqʼoʼn tqanil tuʼn t-xi qʼet kye xjal in che yolin toj irlandés.
Jaw tzalajxix jun xuʼj ma tijen tuʼnju xi kyqʼoʼn testigo de Jehová jun uʼj te toj yol galés. Tzaj tqʼamaʼn jlu: «Axix tok, noqwit tzaj kyqʼoʼn uʼj weye toj yol inglés, mintiʼwtlo kyaj wiʼne. Noqtzun tuʼnj, ngane tuʼnju tzʼibʼin tojku nyole».
Toj txjawil agosto, toj abʼqʼi 2014, e kubʼ qʼoʼn txqantl uʼj toj yol galés toj jw.org. Toj xjaw aju, mas nim kyajlal xjal e okx toj tembʼil lu tuʼn tkubʼ kyuʼjin tqanil at tzalu.
«In qo yoline tiʼj ax yolju»
Toj jun maj, tej tyolin Jesús nim ambʼil tiʼj Tyol Dios kyukʼil kabʼe t-xnaqʼtzbʼen, tzaj kyqʼamaʼn jlu tukʼil tzalajbʼil: «Ax tok ma qnaʼ jun tzalajbʼil tuj qanmi tej matoq in yolin qukʼil tuj bʼe ex tej saj ttxʼolbʼaʼn aju tzʼibʼan tuj Tuʼjil» (Lucas 24:32). Aj txi qʼamet aju xnaqʼtzbʼil tkuʼx toj Tyol Dios kye xjal tojku kyyol, nim maj in kynaʼn qa in xi txʼolbʼet-xix aju tzʼibʼan toj Tuʼjil kye ex tuʼn jlu in kubʼ kychʼixpuʼn kyanqʼibʼil.
At jun xinaq, moqa jun ichan, Emyr tbʼi, te tnam Gales mojli tukʼil jun xuʼj testigo de Jehová, noqtzun tuʼnj, nya tgantoq tokslabʼil t-xuʼjil. Tej tok tamiwin tibʼ tukʼil jun testigo de Jehová aju Russell tbʼi, chʼixpaj t-ximbʼetz. ¿Tiquʼn? Tzaj tqʼamaʼn jlu: «Kubʼ nximane tuʼn nxnaqʼtzane tiʼj Tyol Dios tej ttzaj tqʼoʼn Russell uʼj aju tok tbʼi ¿Tiʼ in tzaj t-xnaqʼtzaʼnxix Tyol Dios? ex tzaj tqʼamaʼn weye: ‹Aju uʼj lu tzʼibʼin toj yol galés, ex jaʼlo qo xnaqʼtzal tiʼj junx›». * ¿Tiquʼn tbʼanel ela toj twitz Emyr aju tzaj qʼamaʼn te? Tzaj tqʼamaʼn jlu: «Qkabʼile in qo yoline tiʼj ax yolju, ax qxjaliljuye ex in nel qnikʼe tiʼj qyole». In tzalajtoq tanmi Emyr tkyaqil maj aj t-xnaqʼtzan tiʼj Tyol Dios toj yol galés tuʼn in neltoq tnikʼ tiʼj tkyaqil.
Kukx in che onin testigo de Jehová kyiʼj xjal tuʼn tel kynikʼ tiʼj axix tok tkuʼx toj Tyol Dios tojku kyyol, aju in kuʼpin tiʼj kyanmi.
^ taqik' 2 Toj xnaqʼtzbʼil lu in najbʼen Gran Bretaña tiʼj Escocia, Gales ex Inglaterra.
^ taqik' 11 Jun uʼj tuʼn qxnaqʼtzan aju bʼinchaʼn kyuʼn testigo de Jehová.