Nimxix tqʼajqʼajel wibʼaj tbʼanel in nel txʼolbʼabʼil tiʼj Tyol Dios kyuʼn
«Tbʼanelxix, in kubʼ tene ximel tuʼn, ex in qnaʼn bʼaʼn tuʼn».
«In tzaj tqʼoʼn Tyol Dios tzalajbʼil toj qanqʼibʼil».
«¡Nim ngan tiʼj! Jaʼlo mas in kubʼ nnane ik tzeʼn itzʼj qeju in che yolin toj Tyol Dios aju o tzʼok in bʼine toj tkyaqil wanqʼibʼile».
Nimku xjal aʼyeju o tzʼok kybʼiʼn aju grabación te audio aju nok kukx tiʼj uʼj te Mateo tkux toj Tyol Dios —aju ya tkubʼ toj jw.org toj inglés— o tzaj kyqʼamaʼn kyyol ik tzeʼn jlu.
Toj 1978, tzaj tzyet tuʼn tetz tnejel grabación tiʼj Tyol Dios kyuʼn testigos de Jehová. Tej tbʼet ambʼil e bʼant mas grabación tiʼj Tyol Dios, tkyaqil moqa noq junjun plaj.
Tuʼnju toj 2013 etz aju Traducción del Nuevo Mundo bʼaj bʼinchaʼn chʼintl toj inglés, tuʼntzunju il tiʼj tuʼn tkubʼ bʼinchetl qe grabación juntl maj. Kyoj qeju grabación ojtxi noq oxe jaw uʼjit te, Noqtzun tuʼnj, jaʼlo o che jaw jyon jun qʼajqʼajel wibʼaj tiʼj teyelex te junjun qeju mas te 1,000 xjal in yolin Tyol Dios tiʼj.
Aj tok qbʼin junxichaq tqʼajqʼajel wibʼaj mas nya kwest tuʼn qok ten ximen kyiʼj qeju txʼolbʼabʼil tiʼj Tyol Dios. maske aʼyeju grabación nya junjun ẍchibʼil dramatizada ta tiʼj Tyol Dios —toj juntl yol, mintiʼ junjun tqʼajqʼajel sonido nix música—, aʼyeju in tzaj kyqʼamaʼn qa axix tok.
Tej ttzaj tzyet bʼant jun aqʼuntl aju tuʼn tel nikʼbʼaj tiʼj alkye in yolin toj teyele junjun txʼolbʼabʼil, aju t-xilen txol yol ex tiʼj alkye tten kʼokel qʼet tqʼajqʼajel wibʼaj tiʼj. Jun techel, toj jun txʼolbʼabʼil jaku kanet qe tyol jun apóstol, noqtzun tuʼnj, jatumel mintiʼxix in nel nikʼ tiʼj alkye in yolin, ¿alqetzun tqʼajqʼajel wibʼaj kʼajbʼel quʼn? Qa aju yol in tzaj tqʼamaʼn qa in jaw qe tkʼuʼj jakulo tzʼajbʼen tqʼajqʼajel twiʼ Tomás, ex qa jurat in xi tqʼamaʼn naj jun tyol, jaku tzʼajbʼen Pedro.
Ax ikx bʼaj ximet tiʼj kyabʼqʼiyil qeju in yolin junjun txʼolbʼabʼil tiʼj. Jun techel, ma tzʼajbʼen kabʼe tqʼajqʼajel wibʼaj tiʼj apóstol Juan, jun tej tzmatoq kuʼxin ex juntl te otoq tijin.
Ax ikx, il tiʼj tuʼn kykanet qeju tbʼanel che uʼjin. Mastoq jaku che kanet kyxol qeju in che ajbʼen toj ninja qil twitz aqʼuntl kye testigos de Jehová toj Estados Unidos aʼyeju nya chjoʼn twiʼ kykʼuʼj. Tuʼn kyjaw jyet qe, in che ok prueba tiʼj tqʼajqʼajel kywiʼ qeju jakulo che uʼjin. In xi qanit kye tuʼn tjaw kyuʼjin jun taqikʼ tiʼj uʼj ¡Weʼktza! ex junjun txol yol jatumel in che yolin kabʼe xjal toj Tyol Dios aʼyeju in kubʼ kyyekʼun qʼoj, bʼis, tzalajbʼil, moqa jatumel in bʼaj kykʼuʼj. Kyukʼil qeju prueba lu jaku tzʼel nikʼ kyiʼj qeju jaku che uʼjin ex tuʼn t-xi qʼamet kye jatumel jaku tzʼajbʼen aju tqʼajqʼajel kywiʼ mas bʼaʼn.
Qa ya otoq che kanet qeju jaku che uʼjin, in che ul grabarit aju kyoklen toj jun kyxol estudio toj Brooklyn moqa Patterson. Jun dirictor tiʼj grabación in keʼyin tiʼj aju in uʼjin tuʼn tajbʼen jun tqʼajqʼajel twiʼ toj tumel ex qa aju tqʼajqʼajel twiʼ tbʼanel in nel. Tuʼn tbʼant jlu, aju director ex aju in uʼjin il tiʼj tuʼn tten jun tuʼj aju in tzaj tyekʼun jatumel tuʼn tweʼ ex jatumel tuʼn tok tqʼoʼn tqʼajqʼojil twiʼ tiʼj junjun txʼolbʼabʼil. Ax ikx in che ajbʼen qeju ojtxi grabación tiʼj Traducción del Nuevo Mundo.
Jun plaj aqʼuntl in bʼant tiʼj jlu, in bʼant aj tbʼaj grabarit. At junjun maj, tuʼn tkyaj jun tbʼanel aqʼuntl il tiʼj tuʼn tok chmoʼn qe yol moqa junjun txol yol kyoj nimku grabación otoq che kubʼ grabarit.
Mintiʼ ojtzqiʼn jniʼ ambʼil kyxel tiʼn tuʼn tkubʼ grabarit aju Traducción del Nuevo Mundo o bʼaj bʼinchaʼn chʼintl toj inglés aju etz toj 2013. Noqtzun tuʼnj, aj tkubʼ bʼaj tuʼn tgrabarit jun uʼj tkux toj Tyol Dios, jaku tzʼok qbʼin toj jw.org. Jun icono tiʼj audio ok kʼeletz yekʼun ttxlaj tbʼi uʼj tkux toj Tyol Dios aju tkubʼ toj t-xaq tok tbʼi «Aʼyeju uʼj ateʼkux toj Tyol Dios».