Toj abʼqʼi 2011, mas te 5,700 xjal xi kykʼamoʼn aju xnaqʼtzbʼil tuʼn tbʼant kyuʼjin ex tuʼn tbʼant kytzʼibʼen aju in xi kyqʼoʼn testigos de Jehová.

Kyoj qeju 25 abʼqʼi o che ikʼ, mas te 9,000 xjal te tnam Ghana o bʼant kyuʼjin ex o bʼant kytzʼibʼen kyukʼe testigos de Jehová.

Atxix toj abʼqʼi 2002, chʼixme 12,000 xjal o bʼant-xix kyuʼjin ex kytzʼibʼen. Jun xuʼj aju Agnes tbʼi te 82 abʼqʼi in tzaj tqʼamaʼn jlu: «Tej tzaj qʼamaʼn qa kxel tzyettoq aju xnaqʼtzbʼil tuʼn tbʼant quʼjin ex tuʼn tbʼant qtzʼibʼen toj Ja te Chmabʼil, in jaw tzalaje ex junrat naj kux ntzʼibʼene nbʼiye tuʼn nxnaqʼtzane. ¡Nimxix in tzalaje toj tnejel qʼij tuʼnju bʼant ntzʼibʼene tiʼj nbʼiye!».

Jun xuʼj te 55 abʼqʼi aju in xnaqʼtzan kubʼ ttzʼibʼen jlu: «Mintiʼ in xi samaʼne kyuʼn nmane toj ja te xnaqʼtzbʼil, tuʼn jlu mintiʼ kubʼ nximane qa kpoltoq jun qiʼj jatumel kbʼanteltoq wuʼjine ex ntzʼibʼene».

Kyoj qeju 15 abʼqʼi o che ikʼ o chex qxnaqʼtzane mas te 19,000 xjal tuʼn tbʼant kyuʼjin. Jun xnaqʼtzal aju Felizarda tbʼi tqʼama jlu: «Nimxix in chin tzalaje tuʼnju jaku che kanet taqikʼ Tyol Dios wuʼne ex tuʼn kyxi wuʼjine kye xjal. A jlu kwesttoq tuʼn tbʼant wuʼne».

Aju ninja qʼil twitz aqʼuntl in tzaj tqʼamaʼn jlu: «Toj ambʼil ojtxe, nim xjal kwesttoq tuʼn kyxiʼ toj ja xnaqʼtzbʼil tuʼnju in che anqʼin najchaq tiʼj tnam. Ax ikx, nya nim kybʼet qe xuʼj in che okx qʼoʼntoq toj ja xnaqʼtzbʼil. Tuʼntzunju, ma tzʼonin xnaqʼtzbʼil lu kyiʼj nim xjal ma che tijen. Aj tkubʼaj xnaqʼtzbʼil, at mas qʼuqbʼil kykʼuʼj kyiʼjx».