Toj mar Norte, niqayin tiʼj kyaq txʼotxʼ jatumel in kux bʼaj qʼij te tnam Schleswig-Holstein (Alemania), ateʼ junlo 300 xjal in che anqʼin kyoj junjun tal isla aju Halligen kybʼi. ¿Alkye tten in nok kybʼiʼn xjal lu aju tqanil tiʼj Tyol Dios in che pakbʼan testigos de Jehová tiʼj? (Mateo 24:14).

Tuʼn kypon kyoj junjun kyxol qe tal isla lu in cheʼx toj bark. Noqtzun tuʼnj, tuʼn kyyolin kyukʼe xjal in che anqʼin kyoj junjuntl tal isla, ateʼ junjun testigos de Jehová in najbʼen junxitl tumel kyuʼn: in che bʼet junlo jweʼ kilómetro (oxe milla) tojxi mar. ¿Alkye tten in bʼant kyuʼn?

In bʼant jlu kyuʼn aj mintiʼ in mulqʼaj aʼ. Junjun qaq or, aju tweʼ mar Norte toj Halligen in jaw moqa in kubʼ junlo oxe metro (10 pies). Aj tkubʼ tweʼ aʼ toj mar, nim tembʼil te océano mintiʼ aʼ tibʼaj, ex jaku che pon testigos de Jehová kyoj oxe kyxol qe tal isla lu tuʼn kyqan.

¿Tiʼ in bʼant kyuʼn tuʼn kypon? «In xi tiʼn junlo kabʼe or tuʼn qpone toj jun kyxol qeju tal isla Halligen tbʼi», tqʼama Ulrich, jun yekʼil bʼe aju at nim tojtzqibʼil aju nejni kywitz erman. «Chʼixme tkyaqil maj in qoʼxe mintiʼ qxjabʼe tok. Atzun tumel mas tbʼanel tuʼn qbʼete aj tkubʼ tweʼ aʼ toj mar. Noqtzun tuʼnj, qa at nim cheʼw, in nok qqʼoʼne qbote».

Aju tilbʼilal junxitl twitzju naqʼli qoʼye tiʼj. «In kubʼ tnaʼna ik tzeʼn in bʼeta toj junxitl planeta», tqʼama Ulrich. «Ateʼ junjun plaj txʼotxʼ nojni taʼ tukʼil xoqʼl, junjuntl tukʼe abʼj ex junjuntl tembʼil nojni taʼ tukʼe algas. Jaku tzʼok tqʼoʼn twitza kyiʼj nim pichʼ, moqa chyuʼj, in che anqʼin ttzi mar, nim cangrejo ex junjuntl txuk moqa txkup». At maj, aju kʼloj erman il tiʼj tuʼn kyikʼx kyibʼaj junjun tal aʼ, aju tok kybʼi Priele toj yol alemán, aʼyeju ateʼ ttxlaj mar.

Noqtzun tuʼnj, ax ikx in che ok weʼ twitz nya bʼaʼn. In tzaj tchikʼbʼaʼn Ulrich jlu: «Nya kwest tuʼn qxi tzpet, mas ik tzeʼn at ttxa cheʼw, tuʼntzunju kukx in najbʼen jun brújula quʼne ex jun kʼuxbʼil GPS tbʼi. Ax ikx in najbʼen jun tajlal ambʼil quʼne ex in qo ok lepeʼxixe tiʼj tuʼn miʼn qkyaje tojxi mar».

¿Nimpe toklen tuʼnju in nok tilel kyuʼn erman? In tzaj tqʼamaʼn Ulrich jun tiʼ ikʼ tiʼj jun xjal aju qiʼn mas te 90 abʼqʼi tuʼn, aju kukx in uʼjin tiʼj uʼj Aju Xqʼuqil ex ¡Weʼktza!: «Jun qiʼj mintiʼ o xiʼye visitarilte tuʼnju mintiʼtoq ambʼil qiʼje. Noqtzun tuʼnj, tej naʼmxtoq qajtz meltzʼaje, o lajete tuʼn xjal tukʼe tbiciclet ex tzaj tqʼamaʼn jlu qeye: ‹¿Mintiʼpe kjel kyqʼoʼne uʼj Aju Xqʼuqil weye?›. Xi qqʼoʼne te tukʼil nim tzalajbʼil».