Mas te 60 yol indígena in yolinjtz toj tnam Canadá, ex junlo 213,000 xjal te Canadá in tzaj kyqʼamaʼn qa aʼyeju yol lu mas in che yolin tiʼj.

Nim qe testigos de Jehová o bʼant junjun yol kyuʼn, tuʼntzun tpon kyyol toj kyanmi xjal indígena, tej tkubʼ bʼaj abʼqʼi 2015, mas te 250 xjal otoq kubʼ bʼaj kyxnaqʼtzbʼil kyoj yol indígena in che ok kyuʼn testigos de Jehová.

O tzʼok tilil kyuʼn testigos de Jehová tuʼn kykubʼ kyqʼoʼn qe uʼj in che jatz toj Tyol Dios kyoj junjun yol indígena toj tnam Canadá, axpe ikx qe video chʼin kyqan, toj 8 yol indígena: algonquino, cree de las llanuras, cree de los pantanos occidental, inuktitut, mohaqués, odawa, oyibua septentrional (norteño) ex piesnegros. *

Aʼyeju in che xnaqʼtzan tiʼj junjun yol indígena in tzaj kyqʼamaʼn qa kwest tuʼn tbʼant. Tqʼama Carma jlu: «Tej t-xi tzyet tuʼn wonine tuʼn kykubʼ uʼj toj yol piesnegros, kubʼ nnane qa in chin aqʼunane jpuʼn nwitze. Nyaxix ojtzqintoq yol wuʼne. Mintiʼtoq in bʼant wuʼjine toj yol aju, axpe ikx mintiʼtoq in nel nnikʼe tzeʼn in xi qʼamet junjun yol».

«Ate junjun yol nim kyqan ex kwest tuʼn tqʼamet quʼn», tqʼama Terence aju in nonin tuʼn kykubʼ uʼj toj yol cree de los pantanos occidental. Daniel aju in pakbʼan toj tkyaqil ambʼil toj isla Manitoulin, Ontario, tqʼama jlu: «Nya nim uʼj at tuʼn tbʼant yol quʼne. Jun tten tuʼn tbʼant yol odawa quʼn, aju qa ma qo yolin tukʼil jun tij xjal toj jun kojbʼil tuʼntzun qtzaj t-xnaqʼtzaʼn».

¿Atpe toklen tkyaqilju aqʼuntl in bʼant? Tzaj tqʼamaʼn jun xuʼj in yolin toj yol oyibua qa junxitl qe testigos de Jehová kywitz txqantl okslabʼil tuʼnju in nok tilil kyuʼn. Tqʼama qa mas bʼaʼn in kubʼ kynaʼn xjal aj kyyolin testigos de Jehová tiʼj Tyol Dios kyukʼe toj yol oyibua.

At jun traductor Bert tbʼi, aju jaw chʼiy toj jun lugar Alberta tbʼi toj tnam Canadá. Tqʼama jlu: «O tzʼok nqʼoʼn nwitze tiʼj qa kygan xjal in che yolin toj yol piesnegros junjun uʼj toj yol aju ex in tzaj kyqʼamaʼn: ‹Atzun weye nyol jlu. Weye kubʼ bʼinchan jlu›. Ax ikx in netz tal kywitz aj tok kyqʼoʼn kywitz tiʼj jun video toj kyyol».

At jun xuʼj in yolin toj yol cree, nimxix in tzalaj tiʼj video tok tbʼi ¿Tiquʼn bʼaʼn tuʼn t-xnaqʼtzana tiʼj Tyol Dios? aju at toj tyol. In tzaj tqʼamaʼn qa in kubʼ tnaʼn ik tzeʼn a tnan in tzaj yolin te.

Nim qe testigos de Jehová o cheʼx kyoj junjun kojbʼil indígena tuʼn t-xi kyqʼuqbʼaʼn kykʼuʼj xjal tukʼe Tyol Dios. In tzaj tnaʼn Terence tukʼe t-xuʼjil aju Orlean tbʼi, aju ikʼ kyiʼj toj jun maj: «Junxtoq in qo bʼete kyukʼil jun kʼloj kar aʼyeju in che bʼet 12 or toj bʼe jatumel at nim ttxa cheʼw tuʼn qpakbʼane toj jun tembʼil tok tbʼi Little Grand Rapids. Tbʼanelxix ela toj kywitz xjal».

Ateʼ junjuntl o kyaj kyqʼoʼn tbʼanel kyja, noq tuʼn kyxi anqʼil kytxlaj qeju kojbʼil lu. Otoqxi tzikʼ oxe xjaw in che pakbʼan Daniel tukʼe t-xuʼjil LeeAnn tbʼi, toj isla Manitoulin, kubʼ kyximen tuʼn kyxiʼ anqʼil atz. Tqʼama Daniel jlu: In qo tzalaje tuʼnju at nim ambʼil qiʼje ex tuʼn jlu jaku tzʼok qʼuqeʼ kykʼuʼj xjal qiʼje ex tuʼn tten kygan tiʼj.

¿Tiquʼn in nok tilil kyuʼn testigos de Jehová tuʼn kypon jatumel ate xjal indígena? Tzaj tqʼamaʼn t-xuʼjil Bert jlu aju Rose tbʼi: «Waje tuʼn wonine kyiʼj xjal lu, tuʼnju ax ikx weye indígena qine ex o tzʼok nqʼoʼne nwitze tiʼj alkye tten in nonin qiʼj qa ma kubʼ qbʼinchaʼn aju in tzaj tqʼamaʼn Tyol Dios».

«Waje tuʼn tzaj yekʼun kybʼe xjal in che yolin toj yol cree tuʼn Dios. Jun tbʼanelxix oklenj aju tuʼn qonin kyiʼj xjal tuʼn kyok tamiw Jehová ex tuʼn kyex twitz junjun nya bʼaʼn at toj ambʼil jaʼlo», tqʼama Orlean.

Marc aju in nonin tuʼn kykubʼ uʼj toj yol piesnegros. ¿Tiquʼn in nok tilil kyuʼn tuʼn kypon toj kojbʼil jatumel ateʼ xjal indígena? Tqʼama jlu: «Tuʼnju kʼujlaʼnxix qe xjal wuʼne».