Toj 1 te febrero toj 1943 toj tnam te Nueva York xi qʼet tnejel maj tbʼanel xnaqʼtzbʼil te jun kʼloj erman. Atxix toj ambʼil aju, o txi qʼet tbʼanelxix xnaqʼtzbʼil kye mas te 8 mil xinaq, moqa ichan, ex xuʼj tzajni qeʼ twitz tkyaqil Txʼotxʼ, tuʼn Xnaqʼtzbʼil te Galaad te Watchtower.

Jun kyxol qeju o che etz kyoj mankbʼil xnaqʼtzbʼil, Jonathan tbʼi tzaj tqʼamaʼn jlu: «Tuʼnju tkyaqilju o qo xnaqʼtzane tiʼj in jatz toj Tyol Dios, jaku japun quʼne jaxku tumel, noq alkyexku kyyajil xjal jatumel qo pole». Ax ikx aju t-xuʼjil Marnie tbʼi tzaj tqʼamaʼn jlu: «At mas wajbʼile tuʼn wonine kyiʼj xjal tuʼn tel kynikʼ qa aju mas tbʼanel aju tuʼn tbʼant aju tajbʼil Bʼinchal qe. Qʼuqlixix nkʼuʼje tiʼj qa ma tzʼel kynikʼ xjal tiʼj Jehová, kchʼexpajel kyanqʼibʼil».

Mintiʼ in xi chjet tuʼn tkux tzʼibʼet qbʼi tuʼn qxnaqʼtzan toj Xnaqʼtzbʼil te Galaad, aju in xi tiʼn 5 xjaw tuʼn qten toj. Atzxix in qo xnaqʼtzan tiʼj Tyol Dios ex qa nim toklen tuʼn txi pakbʼet tqanil tkuʼx toj. Aju tajbʼil xnaqʼtzbʼil tuʼn tten tbʼanel kymod qeju in che kʼamon xnaqʼtzbʼil ex tuʼn tbʼaj kybʼinchaʼn kyten tuʼn tchʼiy qʼuqbʼil tkʼuʼj ttnam Dios tuʼn miʼn tikʼ tzʼaq ex tuʼn tex twitz nya bʼaʼn in che tzaj. Ax ikx in kubʼ kyxnaqʼtzaʼn junjun xnaqʼtzbʼil nim kyoklen tkuʼx toj Tyol Dios aju in nonin tuʼn tten tbʼanel kyamiwbʼil tukʼil Dios.

Aʼyeju in che xnaqʼtzan toj Galaad mejebʼni qe ex in che ajbʼen te Dios toj tkyaqil ambʼil. Aj tkubʼaj xnaqʼtzbʼil, jaku chex samet toj tnam jatumel in che ajbʼentoq moqa jaku chex samaʼn toj juntl tnam. At junjuntl in chex samaʼn tuʼn kyxiʼ aqʼunal toj jun kyxol qeju mas te 90 ninja qʼil twitz aqʼuntl kye testigos de Jehová. At nim in chex samaʼn kyoj tnam jatumel ateʼ nimku xjal, tuʼnju nim jaku che onin tiʼj pakbʼabʼil.

Kukx o ten Xnaqʼtzbʼil te Galaad toj tnam Nueva York. Tnejel toj Hacienda del Reino, jun piẍ txʼotxʼ kye testigos de Jehová toj South Lansing. Toj abʼqʼi 1961 xiʼ xnaqʼtzbʼil lu toj kytxuylal ninja qʼil twitz aqʼuntl kye testigos de Jehová aju at toj Brooklyn. Toj abʼqʼi 1988 a 1995 atz ten toj Wallkill, toj Haciendas Watchtower. Toj abʼqʼi 1995 kyaj ten Xnaqʼtzbʼil te Galaad te Watchtower, toj Patterson, atz jatumel taʼ jaʼlo. Tej tkubʼaj xnaqʼtzbʼil tuʼn kʼloj xnaqʼtzal tajlal 134 toj marzo te 2013.

Toj 70 abʼqʼi aʼyeju o che etz toj Xnaqʼtzbʼil te Galaad te Watchtower o che onin nim tuʼn t-xi qʼet tqanil tiʼj Qdios, aju Jehová.