Toj Noviembre te 2011, jun kʼloj testigo de Jehová kubʼ kyximen tuʼn t-xi tzyet juntl tten pakbʼabʼil tuʼntzun tel kynikʼ xjal tiʼj tqanil tkuʼx toj Tuʼjil Tyol Dios. Tuʼn tbʼant jlu, kubʼ kyqʼoʼn junjun tbʼanelxix yekʼbʼil uʼj atz toj bajo Manhattan jun ojtxi tnam te Nueva York, ex jatumel in che pon nimxix xjal toj.

Aju tnam lu kubʼ paʼn te kyaje tembʼil, ex toj junjun tembʼil kubʼ qʼoʼn junjun tbʼanelxix yekʼbʼil uʼj nojni kyuʼn nimku uʼj onbʼil tiʼj Tyol Dios xqʼuqin kyuʼn qeju in che ajbʼen te Dios aʼyeju ax najli qe toj tembʼil aju. Chʼixme kykyaqil qe yekʼbʼil uʼj niqayin ateʼ jatumel in che pon kʼuxbʼil iqil xjal, qʼanchaʼlxix toj kywitz nimku xjal in che bʼet tkyaqil qʼij atztzu.

Aʼyeju xjal in che pon kyiʼj yekʼbʼil uʼj jaku kanet tzaqʼwebʼil kyuʼn tiʼj junjun kyxjel tiʼj Tyol Dios. Atzun qeju mintiʼ ambʼil kyiʼj tuʼn kyyolin jaku txi kyiʼn jun kyuʼj ex jaku kubʼ kyuʼjin yajxitl.

Kyoj moqa kyibʼaj yekʼbʼil uʼj ateʼ uʼj kyoj nimku yol, qa at jun xjal tajbʼil jun tuʼj toj juntl yol aju mintiʼ at toj yekʼbʼil uʼj, jaku txi tqanin ex jaku tzikʼ qʼil te aj tbʼet chʼintl ambʼil.

Tbʼanelxix in nel toj kywitz xjal ex toj kywitz qe aj kawil. Jun techel, tzaj tqʼamaʼn jun policiy lu: «¡Ya otaq pon ambʼil tuʼn tbʼant jlu kyuʼne! At kyeye kyukʼil aju at tajbʼen kye xjal».

Jun xinaq, moqa ichan, in bʼettoq bʼiʼx etz twitz tej tok tqʼoʼn twitz tiʼj uʼj ¿Tiʼ in tzaj t-xnaqʼtzaʼnxix Tyol Dios? toj jun yekʼbʼil. Tuʼnju otoq tzʼok tqʼoʼn twitz kyiʼj nim xjal in che uʼjin tiʼj uʼj lu toj kʼuxbʼil metro tbʼi ex otoq kubʼ t-ximin jatumel tzaj kyiʼn xjal lu. Jaʼlo ya ojtzqiʼntl tuʼn.

Jun kuʼxin in nikʼ bʼettoq twitz jun yekʼbʼil uʼj aju tkubʼ toj tbʼe aj t-xi toj taqʼun. Tej otoq tzikʼ qaq seman, kubʼ weʼ ex xi tqʼmaʼn kye testigo de Jehová qa tajbʼiltoq onbʼil. Xi kyqʼoʼn onbʼil te. Xi kyqʼoʼn testigo de Jehová jun Xjan Uʼj te ex xi kyqʼamaʼn tzeʼn tten jaku tzʼajbʼen tuʼn, tuʼn tonin tiʼj.

Nim qe xjal o che kubʼ weʼ yolil kyiʼj xnaqʼtzbʼil tiʼj Tyol Dios, ex aj kyikʼ bʼet in che tzalajxix. Tuʼnju akʼaj tten pakbʼabʼil lu, kʼitzqeku xi sipet oʼkx toj jun xjaw 3,797 uʼj ex 7,986 nimaq uʼj.