Toj 2014, aju Kʼloj Xjal Qʼil Twitz Aqʼuntl kye testigos de Jehová tzaj tqʼamaʼn tuʼn tok tilil tuʼn t-xi iqʼit Tyol Dios tzmax kyoj tembʼil te toj tbʼanqʼabʼ qʼij te Europa ex Norte América (Hechos 1:8). Tej t-xi tzyet tuʼn tyolin Kʼloj Xjal Qʼil Twitz Aqʼuntl mas e yolin tiʼjju tuʼn t-xi pakbʼet Tyol Dios kyoj junjun kojbʼil toj tnam Alaska (Estados Unidos), Laponia toj tnam Finlandia ex Nunavut tibʼaj tjawitz qʼij toj tnam (Canadá).

Atxix ojtxi kukx in cheʼx testigo de Jehová pakbʼal kyoj tembʼil lu. Noqtzun tuʼnj, noq toj chʼin ambʼil in che kyaj ten testigo de Jehová atz, ex mlaytoq bʼant tuʼn t-xi kysipen nimxix uʼj tiʼj Tyol Dios.

Aju akʼaj tten tuʼn t-xi pakbʼet Tyol Dios, aʼyeju ninja qʼil twitz aqʼuntl in nok kyqʼoʼn kywitz tiʼj aqʼuntl in bʼant kyuʼn testigo de Jehová kyoj tembʼil toj tbʼanqʼabʼ qʼij in xi kyqʼoʼn txokbʼil kye qeju in che ajbʼen toj tkyaqil ambʼil, tuʼn kykyaj ten jun oxe xjaw pakbʼal kyoj qe tembʼil lu. Noqtzun tuʼnj, qa at nim xjal kyoj tembʼil lu kyaj tuʼn kyxnaqʼtzan tiʼj Tyol Dios, jaku che kyaj ten pakbʼal mas ambʼil ex jaku txi tzyet tuʼn tok chmabʼil aju jaku che pon tkyaqil xjal tuj.

Tej tbʼet ambʼil, e ok weʼ erman twitz junjun nya bʼaʼn toj tembʼil te tbʼanqʼabʼ qʼij. Aʼyeju kabʼe precursor i eʼx samaʼn toj tembʼil Barrow, toj tnam Alaska, jun otoq tzʼanqʼin kubʼni toj tnam California ex juntl toj tnam Georgia Estados Unidos. Toj tnejel abʼqʼi tej kypon toj tembʼil Barrow attoq nim cheʼw tuʼnju otoq kuʼtz 38 grados centígrados (-36°F). Ax ikx tej otoq tzikʼ junjun xjaw kyponlen toj tnam lu, tiʼj 100 ja otoq bʼaj kypakbʼaʼn junlo 95 ja ex xi tzyet tuʼn kyxnaqʼtzan 4 xjal, ax ikx xnaqʼtzan jun qʼa John tbʼi. Xiʼ ttzyet tuʼn kyxnaqʼtzan John ex aju txin in yolin tukʼil tiʼj uʼj ¿Tiʼ in tzaj t–xnaqʼtzaʼnxix Tyol Dios?, ex aju in nel tnikʼ tiʼj in xi tqʼamaʼn kye tamiw ex kye qeju in che aqʼunan junx tukʼil. Ax ikx in kubʼ tuʼjin aju uʼj Examinando las Escrituras diariamente, ex in najbʼen aju aplicación JW Library tuʼn toj tyolbʼil.

Mintiʼ bʼe tuʼn qpon toj Rankin Inlet aju tembʼil te Nunavut Canadá. Tuʼntzunju, tuʼn kypon kabʼe precursor toj tembʼil lu, i eʼx toj avión ex tej kypon xi tzyet nimxix xnaqʼtzbʼil tiʼj Tyol Dios kyuʼn kyukʼil xjal. Yajxitl, ok tqʼoʼn twitz jun xjal tiʼj video ¿Tiʼ in bʼaj toj jun Ja te Chmabʼil?, tzaj tqanin xjal jtoj tuʼn tjaw bʼinchet jun Ja te Chmabʼil toj tembʼil lu. Ax ikx tqʼama: «Qa atinxe aj tbʼant ju Ja te Chmabʼil ok chin ule toj chmabʼil».

Tzaj kyqʼamaʼn qeju precursor e ten toj Savukoski, toj tnam Finlandia, «qa at nimxix cheʼw ex in kubʼ nim ttxa cheʼw toj tnam lu». Ax ikx kyqʼama qa at mas txkup aju renos kybʼi kywitz xjal. Noqtzun tuʼnj, kyqʼama qa bʼaʼn el aju ambʼil tej kyten toj tembʼil lu. ¿Tiquʼn? «Tuʼnju bʼaj kypakbʼan tkyaqil aju tembʼil lu», ex kyqʼama jlu. «Aʼyeju bʼe in che pon kyoj kojbʼil bʼaʼn qe, ex kukxtoq in bʼaj kybʼinchaʼn xjal. Tuʼnju at nim cheʼw toj tembʼil lu mas in che kyajtoq ten xjal toj kyja».

Tuʼnju in nok tilil quʼne tuʼn t-xi qyekʼune axix tok tiʼj Tyol Dios kye xjal tibʼaj tjawitz qʼij at nim xjal bʼaʼn o tzʼel toj kywitz. I eʼx precursor visitaril jun xuʼj aju toktoq te alcalde toj jun tnam te Alaska. Yajxitl jax tqʼoʼn xuʼj aju alcalde jun tqanil toj jun tembʼil te Internet tiʼjju bʼaj tyolin kyukʼil precursor ex jax tqʼoʼn tilbʼilal uʼj ¿Tiʼ aju Tkawbʼil Dios?

Toj Haines, Alaska jatumel xi kyqʼoʼn kabʼe precursor bʼaʼn kyulene kye mas te 8 xjal toj jun chmabʼil ok toj jun kʼaybʼil uʼj. Jun qʼol tqanil tzaj tqʼamaʼn qa at kabʼe xjal tzajni qe toj tnam Texas ex toj Norte Carolina in xi kyqʼamaʼn kye xjal qa kyajbʼil jun kyxnaqʼtzbʼil tiʼj Tyol Dios toj kyja. Ex kubʼ bʼaj tuʼn qʼol tqanil kyukʼil yol lu: «Tokxa toj jw.org tuʼntzun tel chʼintl tnikʼa tiʼj».