Kyoj qeju 28 abʼqʼi o che ikʼ, mas te 11,000 testigos de Jehová o kyaj kyqʼoʼn kyja tuʼn kyonin tuʼn kyjaw bʼinchet ja kyoj 120 tnam. Kykyaqilx in xi kyqʼoʼn tukʼe nim kygan aju kyipumal ex junjun tiʼ in bʼant kyuʼn ex mintiʼ in xi kyqanin twi kykʼuʼj, ex in che aqʼunan toj aqʼuntl lu tkyaqil ambʼil.

Nim qeju in che onin tiʼj aqʼuntl lu aʼyex in chex chjonte kypasaj. At junjun o tzʼajbʼen aju ambʼil te ojlabʼil kyuʼn, ex junjuntl o txi kyqanin ambʼil tuʼn miʼn kyaqʼunan toj kyaqʼun, tuʼntzun jlu, mintiʼ saj chjoʼn twiʼ kykʼuʼj.

Mix al jun sok obligarin kye tuʼn tbʼant jlu kyuʼn; kykyaqilx ma che onin tukʼe nim kygan tuʼntzun kyonin tuʼn t-xi pakbʼet tbʼanel tqanil tiʼj Tkawbʼil Dios twitz tkyaqil Txʼotxʼ (Mateo 24:14). O jaw kybʼinchaʼn testigos de Jehová nimaq ja jatumel tuʼn kyetz uʼj toj kʼuxbʼil ik tzeʼn Tyol Dios ex txqantl uʼj tiʼj Tyol Dios, ik tzeʼn qeju nimaq ja te oficina ex junjuntl ja tuʼn kynajan xjal toj. Ax ikx o jaw kybʼinchaʼn Ja te Nimaq Chmabʼil te mas te 10,000 qʼuqbʼil toj ex Ja te Chmabʼil te mas te 300 qʼuqbʼil toj.

Aju aqʼuntl tuʼn kyjaw bʼinchet ja kukx in bʼant jaʼlo. Aju ninja qʼil twitz aqʼuntl toj junjun tnam in xi qʼonte aju at tajbʼen kye aqʼunal. Ik tzeʼn jatumel tuʼn kykyaj te tal, kywa ex tuʼn tjaw txjet kyxbʼalun. Ax ikx qe testigos de Jehová te kojbʼil in che onin tukʼe nim kygan kyiʼj aqʼuntl lu.

Noq tuʼn tbʼaj nukʼet aju matij aqʼuntl lu, toj abʼqʼi 1985 kubʼ ximet tuʼn kykubʼ bʼinchet ja toj tkyaqil tnam. Tuʼn qonin tiʼj aqʼuntl lu, il tiʼj tuʼn tten 19 ex 55 qabʼqʼi ex qa ojtzqiʼn jun aqʼuntl quʼn tiʼj aju tuʼn kyjaw bʼinchet ja. Chʼixme kykyaqil qeju in che onin toj aqʼuntl lu in che ten kabʼe seman ex oxe xjaw, ex at junjuntl in che ten jun abʼqʼi moqa mastl ambʼil.

¿Yajtzun qa aju in aqʼunan at t-xuʼjil ex aju t-xuʼjil mintiʼxix tojtzqibʼil tiʼjju tuʼn kyjaw bʼinchet ja? Jaku txi qʼet xnaqʼtzbʼil te tuʼn tbʼant junjun aqʼuntl tuʼn ik tzeʼn tuʼn tbʼaj kʼalet kʼuxbʼil tukʼe alambre, tuʼn kykubʼ qʼet azulejo, tuʼn kyjaw lijaret tzeʼ, kʼuxbʼil ex junjuntl moqa pintaril. Ax ikx jaku che onin tuʼn tkubʼ bʼinchet kywa qeju in che aqʼunan moqa tuʼn kykubʼ saqset qe ja jatumel in che wtan.

Aj kymeltzʼaj qeju aqʼunal kyja, at junjun in tzaj kytzʼibʼen cartas te qʼobʼil chjonte. Jun mejebʼleʼn tzaj kytzʼibʼen jlu: «Qaje tuʼn t-xi qqʼoʼne nimxix chjonte kyeye tuʼnju oklenj saj kyqʼoʼne qeye tuʼn qaqʼunane toj ninja te qʼil twitz aqʼuntl te Budapest. Kubʼ kyyekʼun testigos de Jehová te Hungría tbʼanel kymod ex tzaj kyqʼoʼn nimxix chjonte. Kwest ela qeye tej qajtz meltzʼaje tej otoqxi tzikʼ jun xjaw qtene kyukʼil. A jlu kukx in bʼaj qiʼje. Qa jaku bʼant quʼne kbʼel qbʼinchaʼne juntl maj toj primavera. Toj junjun xjaw o qo tene toj junxichaq oklenj, atzun xjaw lu mas nim toklen toj qanqʼibʼile».