At tiquʼn mintiʼ in nokx qqʼon qibʼe kyxol aj kawil, a jlu in jatz toj Tyol Dios. Mintiʼ in che ok q-obligarine qe aj kawil tuʼn tbʼant jun tiʼ kyuʼn, mintiʼ in qo votarine tiʼj jun kʼloj aj kawil moqa tiʼj jun xjal taj tuʼn tok te aj kawil, mintiʼ in nokx qqʼoʼn qibʼe tuʼn kyvotarin xjal qiʼje ex tuʼn ttzaj qʼoʼn jun qoklene kyxol ex mintiʼ in xi qqʼamaʼne kye xjal tuʼn tchʼixpet junjun tiʼ kyoj kawbʼil. O kanet quʼne toj Tyol Dios tiquʼn mintiʼ tuʼn tbʼant tkyaqil jlu quʼne. Aqe jlu:

•   In qo ok lepeʼye tiʼj techel kyaj tqʼoʼn Jesús, aju el tikʼen oklenj tuʼn tok te aj kawil (Juan 6:15). Ax ikx kyaj tqʼamaʼn Jesús tuʼn miʼn tokx kyqʼon kyibʼ t-xnaqʼtzbʼen kyxol xjal «te twitz txʼotxʼ», tuʼntzunju, mintiʼtoq tuʼn kyonin tiʼj jun kʼloj aj kawil (Juan 17:14, 16; 18:36; Marcos 12:13-17).

•   Oʼkxix in qo onine tiʼj Tkawbʼil Dios, aju kawbʼil yolin Jesús tiʼj tej tqʼama: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ» (Mateo 24:14). Tuʼnju at qoklene tiʼj Tkawbʼil Dios, mintiʼ in nokx qqʼon qibʼe kyxol aj kawil kyoj kykyaqil tnam, axpe ikx jatumel in qo anqʼine. Aju in bʼant quʼne, in xi qqʼamaʼne kye xjal qa ok tzul kawbʼil lu (2 Corintios 5:20; Efesios 6:20).

•   Tuʼnju mintiʼ in nokx qqʼon qibʼe kyxol aj kawil a jlu in nonin qiʼje tuʼn miʼn qtzaj xobʼe tuʼn qyoline tiʼj tbʼanel tqanil tiʼj Tkawbʼil Dios tukʼil alkyexku xjal junxichaq kyxim. Tukʼilju in xi qqʼamaʼne ex tukʼilju in bʼant quʼne, in nok tilil quʼne tuʼn tkubʼ qyekʼune qa qʼuqli qkʼuʼje qa kʼelel tiʼn Tkawbʼil Dios tkyaqil nya bʼaʼn at twitz tkyaqil Txʼotxʼ jaʼlo (Salmo 56:11).

•   Qa ma tzʼokx qqʼon qibʼe kyxol aj kawil, jaku tzaj pabʼil qxole twitz tkyaqil Txʼotxʼ (Colosenses 3:14; 1 Pedro 2:17). A jlu in bʼaj kyxol okslabʼil in nokx kyqʼon kyibʼ kyxol aj kawil paʼn kyten (1 Corintios 1:10).

 In chex qnimane qe aj kawil. Mintiʼ in nokx qqʼon qibʼe kyxol aj kawil, noqtzun tuʼnj, in chex qnimane. Iktzun tten in japun kawbʼil tkuʼx toj Tyol Dios quʼne aju tkuʼx toj Romanos 13:1: «Kykyaqile il tiʼj tuʼn t-xi kynimane qe aj sanjelal te gobierni». In che japun kawbʼil quʼne, in xi qchjoʼne tkyaqil chojenj, in qo onine kyiʼj ley in kubʼ kyqʼoʼn aj kawil tuʼn qanqʼin toj tumel. Mintiʼ in xi qqʼamaʼne kye xjal tuʼn miʼn tokx kybʼiʼn aj kawil; aju in bʼant quʼne, aju tuʼn tjapunju in tzaj tqʼamaʼn Xjan Uʼj tuʼn qnaʼne «Dios kyiʼj qe gobierni ex kyiʼj kykyaqil qeju at kyoklen tuj kawbʼil», ex mas toj ambʼil aj tkubʼ kyximin aj kawil qa kxel qʼet ambʼil kye okslal tuʼn kyajbʼen te Dios moqa miʼn (1 Timoteo 2:1, 2).

 Ax ikx nim toklen toj qwitze aju t-xim xjal tiʼjju tiʼ kbʼantel tuʼn qa kʼokex tqʼon tibʼ kyxol aj kawil moqa miʼn. Jun techel, mintiʼ in bʼant nya bʼaʼn quʼne toj ambʼil aj tok votación nix mintiʼ in nok tilil quʼne tuʼn miʼn tvotarin jun xjal qa ma bʼaj t-ximen tuʼn tvotarin.

 ¿Akʼajpe aju tuʼn miʼn tokx qqʼon qibʼe kyxol aj kawil? Nya. Axju bʼant kyuʼn apóstol ex junjuntl okslal toj tnejel syent abʼqʼi. In tzaj tqʼamaʼn jun uʼj tiʼj jlu: «Ojtzqiʼntoq kyuʼn qa nim toklen tuʼn kyniman kye aj kawil, noqtzun tuʼnj, ax ikx ojtzqiʼntoq kyuʼn qa nim toklen tuʼn miʼn tokx kyqʼon kyibʼ toj tkyaqilju at toklen kyukʼil aj kawil» (Beyond Good Intentions—A Biblical View of Politics [Aju mas tbʼanel ximbʼetz. Aju in tzaj tqʼamaʼn Tyol Dios kyiʼj aj kawil]). Nya oʼkxju, ax ikx kubʼ ttzʼibʼen Orígenes jun aj xnaqʼtzal tiʼj Tyol Dios anqʼin toj tkabʼ ex toxin syent abʼqʼi tiʼj ambʼil iqʼen quʼn jaʼlo jlu: «Nya kyaj okslal tuʼn t-xi qʼet kyoklen te aj kawil».

 ¿Jakupe tzaj nya bʼaʼn tuʼnju mintiʼ in nokx kyqʼon kyibʼ okslal kyxol aj kawil toj jun tnam? Mlay. Tuʼnju tbʼanel xjal qoʼye, mintiʼ tuʼn kytzaj xobʼ aj kawil. Qqʼonk qwitz tiʼj jun techel, tzaj tqʼamaʼn jun uʼj qʼol tqanil etz toj 2001 tuʼn Academia Nacional de Ciencias te Ucrania. Yolin tiʼjju in bʼant quʼne aju mintiʼ in nokx qqʼon qibʼe kyxol aj kawil, tqʼama jlu: «Atlo maj toj ambʼil jaʼlo nya bʼaʼn jaku tzʼela toj kywitz kykyaqil xjal aju in bʼant kyuʼn testigos de Jehová. Ex tuʼn jlu ok bʼinchaʼn nim nya bʼaʼn kyiʼj kyuʼn qeju jun tten aj kawil aju tok tbʼi totalitarios, ik tzeʼn nazi tukʼil comunista». In tzaj tqʼamaʼntl tqanil qa tjaqʼ tkawbʼil soviética, «kukx japun qe kawbʼil kyuʼn» testigo de Jehová, «kukx ok tilil kyuʼn ex e aqʼunan kyoj kojbʼil toj tumel» ex mi jun maj e ok tzoqpaj tiʼj kawbʼil comunista.» Kubʼaj tuʼn ttzaj tqʼamaʼn tqanil qa aju kyxnaqʼtzbʼil ex kybʼinchbʼen testigo de Jehová toj ambʼil jaʼlo mintiʼ in nok tilil tuʼn tuʼn ttzaj xitbʼil nix tuʼn miʼn tten mujbʼabʼil toj jun tnam».