Aju in bʼant quʼne aj tkyim jun xjal ex toj ambʼil aju, in kubʼ qbʼinchaʼne ik tzeʼn in tzaj tqʼamaʼn Tyol Dios, ik tzeʼn junjun techel tzul yekʼun kubʼni:

•   Qkyaqilx in qo bʼisen aj tkyim jun xjal kʼujlaʼn quʼn. E jaw oqʼ qeju t-xnaqʼtzbʼen Jesús tej kykyim qeʼ toj kyja (Juan 11:33-35, 38; Hechos 8:2; 9:39). Tuʼntzunju, nya jun ninqʼij te qeye aj tkyim jun xjal (Eclesiastés 3:1, 4; 7:1-4). Sino jun ambʼil jlu tuʼn tkubʼ qnaʼne bʼis kyukʼil txqantl (Romanos 12:15).

•   Mintiʼ in kynaʼn qe kyimni. Noq alkyexku qanqʼibʼile moqa qyajile, in nel qikʼune tkyaqil kostumbr moqa xnaqʼtzbʼil aju at toklen tukʼilju qa kukx in kynaʼn kyimni ex qa jaku tzʼok kybʼinchaʼn nya bʼaʼn qiʼj, tuʼnju mintiʼ in tzaj t-xnaqʼtzan Tyol Dios jlu (Eclesiastés 9:5, 6, 10). Jun techel, mintiʼ in xi qqʼoʼne pwaq kyiʼj kyimni, mintiʼ in qo yoline kyukʼil, mintiʼ in xi qqanine onbʼil kye ex mintiʼ in kubʼ qbʼinchaʼne aju in bʼant kyuʼn qeju otoq kyim kyukʼil, ax ikx mintiʼ in bʼant junjun ninqʼij quʼne moqa aju kyqʼij kyimni. In tzaj tqʼamaʼn Tyol Dios jlu: «Kypaʼmil kyibʼe [...] ex miʼn tzʼok kymakoʼne aju ttzʼilil», in nok tilil quʼne tuʼn tjapun kawbʼil lu aj in nel qpan qibʼe tiʼj tkyaqil bʼinchbʼen lu aju mintiʼ in tzaj tqʼamaʼn Tyol Dios (2 Corintios 6:17).

•   Jaku che jaw anqʼin qe kyimni. In tzaj tqʼamaʼn Tyol Dios qa ok che jawil anqʼin qe kyimni toj ambʼil tzul ex kpol jun qʼij jatumel ya miʼn tentl kamik (Hechos 24:15; Apocalipsis 21:4). Tuʼn qʼuqbʼil qkʼuʼje lu, ax ikx onin kyiʼj tnejel okslal, mintiʼ in kubʼ qyekʼune nimxix bʼis (1 Tesalonicenses 4:13).

•   In tzaj tqʼamaʼn Tyol Dios tuʼn tten qnabʼil (Proverbios 11:2). Aj tkyim jun xjal mintiʼ in najbʼen ambʼil lu quʼne tuʼn kyjaw labʼin txqantl qiʼje moqa tuʼn tjaw qnimsaʼn qibʼe kywitz tuʼnju tzeʼn qanqʼibʼile moqa tuʼnju at nim qpwaqe (1 Juan 2:16). Tuʼntzunju, mintiʼ in nok qqʼoʼne nim pwaq tiʼj jun xjal aj tkyim noq tuʼn kytzalaj qeju in che pon, ax ikx mintiʼ in najbʼen jun kax, moqa kajon, nim twiʼ ex mintiʼ in nok qqʼoʼne qxbʼalune wiʼyilxix noq tuʼn tok kyqʼoʼn txqantl kywitz qiʼje.

•   Mintiʼ in xi qqʼamaʼne kye txqantl tuʼn tkubʼ kybʼinchaʼn aju nimen quʼne tiʼj jun xjal aj tkyim. Noq oʼkx in bʼant quʼne aju in tzaj tqʼamaʼn taqikʼ Tyol Dios lu: «Teyle junjun qe ok tqʼaʼ tajlal twitz Dios tiʼj tbʼinchbʼen» (Romanos 14:12). Noqtzun tuʼnj, qa ma ten jun ambʼil, in nok tilil quʼne tuʼn t-xi qchikʼbʼaʼne aju nimen quʼne tojxix tumel (1 Pedro 3:15).

 Aju lugar: Qa in kubʼ kyximen toj tja xjal otoq kyim tuʼn tbʼant jun funeral kyuʼn, aʼyex che kbʼel ximinte jatumel. Jakulo bʼant toj jun Ja te Chmabʼil, toj jun lugar jatumel in che kubʼ qʼoʼn kyimni, toj jun ja, toj tembʼil jatumel in che kubʼ patin kyimni moqa toj kamposant.

 Aju in bʼant: Tuʼn t-xi qʼuqbʼet kykʼuʼj toj tja xjal otoq kyim, in nex qʼet jun chikʼbʼabʼil jatumel in xi chikʼbʼet aju in tzaj tqʼmaʼn Tyol Dios tiʼj kamik ex tiʼjju o tzaj tziyen qa che kjawil anqʼin kyimni (Juan 11:25; Romanos 5:12; 2 Pedro 3:13). Toj ambʼil lu jaku che tzaj naʼn aʼyeju tbʼanel tmod xjal otoq kyim ex jakulo tzaj yekʼun tiʼ jaku tzʼel qkanoʼn tiʼj tuʼnju kukx ajbʼen te Dios (2 Samuel 1:17-27).

 Jaku txi bʼitzet jun bʼitz in jatz toj Tyol Dios (Colosenses 3:16). Ex in kubʼ bʼaj tkyaqil tukʼil jun naʼj Dios (Filipenses 4:6, 7).

 Aju pwaq: Mintiʼ in xi qqanine pwaq tiʼj jun tiʼ at toklen tukʼil qokslabʼile, ax ikx tiʼjju in bʼant tiʼj jun xjal otoq kyim. Mintiʼ in jaw chmet pwaq kyoj qchmabʼile (Mateo 10:8).

 Aʼyeju in che pon: Jaku tzʼokx alkyexku xjal tiʼj jun kyimni toj jun Ja te Chmabʼil, ik tzeʼn toj alkyexku qchmabʼile. Tuʼntzunju, jaku che pon qeju xjal nya testigos de Jehová qeʼ.

 A jlu teyele te junjun kbʼel t-ximen ik tzeʼn o bʼaj t-xnaqʼtzaʼn tnabʼil tuʼn Tyol Dios (1 Timoteo 1:19). Noqtzun tuʼnj, mintiʼ in kubʼ qbʼinchaʼne aju in bʼant kyuʼn junjuntl okslabʼil aju in tzaj tqʼamaʼn Tyol Dios tuʼn miʼn tkubʼ qbʼinchaʼn (2 Corintios 6:14-17).