Aj kykubʼ mojeʼ testigo de Jehová, mintiʼ in bʼant nim tiʼchaq kyuʼn ex in nex qʼoʼn jun chikʼbʼabʼil kye aju in jatz toj Tyol Dios. Aj tkubʼaj chmabʼil lu, at maj in bʼant wabʼj moqa in nok jun fiesta kyiʼj. a Ten Jesús toj jun boda toj tnam Caná tej tzmatoq in xi tzyet tuʼn tpakbʼan (Juan 2:1-11).

•  ¿Tiʼ in bʼant toj jun boda?

•  ¿Jatumel in che kubʼ mojeʼ qe novio?

•  ¿Alkyeqe jaku che ten toj boda?

•  ¿Tzeʼn kyxbʼalun kʼokel?

•  ¿In xipe qʼoʼn oyaj kye?

•  ¿Bʼaʼnpe tuʼn kybrindarin xjal kyoj boda?

•  ¿In xipe chitin arroz ex qa pica pica toj kywiʼ novio?

•  ¿In kubʼpe qʼoʼn wabʼj ex kʼabʼj?

•  ¿In nokpe kyqʼoʼn bʼitz ex in che bʼixin?

•  ¿In kubʼpe kyikʼsaʼn aj tel junjun abʼqʼi kykubʼlen mojeʼ?

 Aju mas nim toklen toj jun boda, aju chikʼbʼabʼil in nex tqʼoʼn jun testigo de Jehová toj 30 minut. Toj chikʼbʼabʼil lu, in xi qʼoʼn consej tkuʼx toj Tyol Dios kye qeju in che kubʼ mojeʼ ex in nonin kyiʼj tuʼn kytzalaj toj kymejebʼleʼn (Efesios 5:33).

 Toj junjun tnam, in xi tqʼoʼn gobierno ambʼil kye testigo de Jehová tuʼn tkubʼ kytzʼibʼin mejebʼleʼn twitz ley. Qa ma bʼant jlu, in xi kytziyen kyyol kyxolx aj tkubʼaj chikʼbʼabʼil ex in nok kyqʼoʼn kyxmulqʼabʼ moqa anillo. Ex in xi tqʼamaʼn erman qa ya ma che kubʼ mojeʼ.

 Atzun kyoj junjuntl tnam, in tzaj tqʼamaʼn gobierno tuʼn kyxiʼ novio twitz ley tuʼntzun kykubʼ mojeʼ. In bʼant jlu naʼmxtoq tetz qʼoʼn chikʼbʼabʼil. Qa naʼmxtoq t-xi kyqʼamaʼn qe kyvoto twitz ley, jaku txi kyqʼamaʼn aj tkubʼaj chikʼbʼabʼil. Qatzun otoq txi kyqʼamaʼn, jaku txi kyqʼamaʼn juntl maj, pero junxi chʼintl. In kubʼaj chikʼbʼabʼil tukʼil jun naʼj Dios ex in xi tqanin erman tuʼn kytzaj kʼiwlaʼn qeju tzma in che kubʼ mojeʼ.

 Nim testigo de Jehová in che kubʼ mojeʼ toj jun Salón del Reino qa jaku bʼant. b Qa kyaj novio tuʼn tok jun fiesta, in kubʼ kyikʼsaʼn toj juntl lugar.

 Qa toj Salón del Reino ma tzʼok boda, jaku che pon alkyexku xjal, qa testigo de Jehová moqa nya. Noqtzun tuʼnj, oʼkx qeju che kbʼel mojeʼ at kyoklen tuʼn tkubʼ kyximen alkyeqe jaku che ten toj fiesta.

 Teyele junjun kbʼel ximinte alkye t-xbʼalun kʼokel tqʼoʼn aj t-xiʼ toj jun boda toj Salón del Reino. Pero in nok tilil kyuʼn testigo de Jehová tuʼn tok kyxbʼalumin kyibʼ toj tumel, ik tzeʼn in tzaj tqʼamaʼn Tyol Dios. Ex in che tzalaj qa ax jlu ma bʼant kyuʼn txqantl toj boda ex toj fiesta (1 Timoteo 2:9).

 In tzaj tqʼamaʼn Tyol Dios tuʼn t-xi qqʼoʼn oyaj (Salmo 37:21). Ex kygan testigo de Jehová tuʼn t-xi kyqʼoʼn ex tuʼn ttzaj kykʼamoʼn oyaj toj boda (Lucas 6:38). Noqtzun tuʼnj, mintiʼ in xi kyqanin oyaj ex mintiʼ in xi kyqʼamaʼn kye txqantl alkyeqe otoq che tzaj qʼonte (Mateo 6:3, 4; 2 Corintios 9:7; 1 Pedro 3:8). In tzaj tqʼamaʼn Biblia qa nya toj tumel jlu ex jakulo kubʼ kynaʼn txqantl nya bʼaʼn tuʼn.

 Nya bʼaʼn. Mintiʼ in che brindarin testigo de Jehová tuʼnju atz tzajni bʼinchbʼen lu kyiʼj okslabʼil nya axix tok. c In xi kyqʼamaʼn tbʼanel yol kye qeju otoq che kubʼ mojeʼ, pero in bʼant jlu kyuʼn toj junxitl tten.

 Mintiʼ. Kyoj junjun lugar in xi kychitun xjal arroz, pica pica moqa junjuntl tiʼchaq toj kywiʼ qeju tzma in che kubʼ mojeʼ. In kubʼ kyximen qa tuʼn jlu tzul tbʼanel kye ex qa che tzalajel toj tkyaqil ambʼil. Atzun kye testigo de Jehová mintiʼ in che ok lepeʼ tiʼj kykostumbr xjal lu tuʼnju in tzaj tqʼamaʼn Biblia qa nya bʼaʼn jlu (Isaías 65:11).

 Mintiʼ in xi qʼet wabʼj ex kʼabʼj toj Salón del Reino aj tok jun boda, pero jaku txi sipet toj fiesta qa bʼaʼn toj kywitz qeju tzma in che kubʼ mojeʼ (Eclesiastés 9:7). Qatzun ma bʼaj kyximen novio tuʼn t-xi qʼet qʼeʼn, in nok tilil kyuʼn tuʼn t-xi kyqʼoʼn noq chʼin ex mintiʼ in xi kyqʼoʼn kye qeju naʼmxtoq tjapun kyabʼqʼi (Lucas 21:34; Romanos 13:1, 13).

 Bʼalo in bʼaj kyximen novio tuʼn tok bʼitz ex bʼixbʼil toj fiesta (Eclesiastés 3:4). Kyjawil kyjyoʼn qe bʼitz kygan ex tbʼanel in che ela toj kywitz xjal jatumel in che anqʼin, pero tojxix tumel. Atzun toj Salón del Reino, oʼkx che okel qʼoʼn bʼitz at kyoklen tukʼil Tyol Dios.

 Tuʼnju mintiʼ jun tqanil tkuʼx toj Biblia tiʼj jlu, teyele junjun testigo de Jehová kbʼel t-ximen qa kbʼel tikʼsaʼn aj tel junjun abʼqʼi tkubʼlen mojeʼ moqa miʼn. Qa ikju, in kubʼ kyikʼsaʼn kyjunalx ex qa kyukʼil kyamiw ex qe toj kyja.