¿Atpe kykawbʼil testigo de Jehová tiʼjju qa in yolin jun qʼa tukʼil jun txin?
Aqoʼye testigo de Jehová in kubʼ qximane qa aʼyeju xnaqʼtzbʼil ex qeju kawbʼil ateʼkux toj Tyol Dios in qo tzaj kyonin tuʼn tkubʼ qbʼinchan aju in tzalaj Dios tiʼj ex aju in tzaj tiʼn tbʼanel qe (Isaías 48:17, 18). Nya aqoʼye o qo bʼaj ximente qeju xnaqʼtzbʼil lu. Noqtzun tuʼnj, in che japun quʼne toj qanqʼibʼile. Qqʼonk qwitz kyiʼj junjun xnaqʼtzbʼil lu aju at kyoklen aj tyolin jun qʼa tukʼil jun txin. a
O kyaj qʼoʼn mejebʼleʼn tuʼn tten te jumajx (Mateo 19:6). Aqoʼye testigo de Jehová in kubʼ qximane qa aj t-xi tzyet tuʼn tyolin jun qʼa tukʼe jun txin, in kubʼ kyyekʼun qa kyajbʼil tuʼn kykubʼ mojeʼ. Tuʼntzunju, nya jun saqchbʼil in nela jlu toj qwitze.
Qa at jun qʼa ex jun txin naʼmx tjapun toj tabʼqʼi tuʼn tkubʼ mojeʼ, mintiʼ tuʼn kyyolin. Tuʼnju oʼkx jaku kubʼ mojeʼ jun okslal «qa matxiʼ pon tabʼqʼi tuʼn tmje», toj juntl yol, qa ma tzikʼ toj ambʼil jatumel at nimxix tajbʼil jun qʼa ex jun txin tuʼn kyten junx (1 Corintios 7:36).
Oʼkx qeju mintiʼ kyxuʼjil moqa mintiʼ kychmil jaku che kubʼ mojeʼ. Toj twitz Dios, nya kykyaqil qeju o kubʼ kypaʼn kyibʼ twitz jun aj kawil jaku che kubʼ mojeʼ tukʼil juntl. Oʼkx qa o kubʼ jyoʼn juntl xjal tuʼn jun kyxol qeju o che kubʼ mojeʼ, in tzaj tqʼoʼn Dios ambʼil tuʼn tkubʼ kypaʼn kyibʼ twitz jun aj kawil (Mateo 19:9, TNM).
Aʼyeju okslal kyaj tuʼn kykubʼ mojeʼ, oʼkx jaku che kubʼ mojeʼ kyukʼil qeju junx kyokslabʼil kyukʼil (1 Corintios 7:39). Toj juntl yol, aqoʼye testigo de Jehová, oʼkx jaku qo yoline ex jaku qo kubʼ mojeʼye tukʼil jun testigo de Jehová o jaw aʼ twiʼ, moqa o bʼyan, ex nya tukʼil jun xjal aju oʼkx bʼaʼn in nela qokslabʼile toj twitz (2 Corintios 6:14). Atxix ojtxe, kukx o tzaj tqʼamaʼn Dios kye tmajen tuʼn kykubʼ mojeʼ oʼkx kyukʼil xjal junx kyokslabʼil kyukʼil (Génesis 24:3; Malaquías 2:11). Ax ikx aʼyeju xjal in che xnaqʼtzan tiʼj mejebʼleʼn o tzʼel kynikʼ qa aju kawbʼil lu nimxix in nonin kyiʼj xjal. b
Aʼyeju kʼwalbʼaj il tiʼj tuʼn tokx kybʼiʼn kytat (Proverbios 1:8; Colosenses 3:20). Aju kawbʼil kye qeju kʼwalbʼaj in che anqʼin kyukʼe kytat ax ikx at toklen tukʼil aju tuʼn t-xi kybʼiʼn tkawbʼil kytat ex kynan tiʼj mejebʼleʼn. Ik tzeʼn jteʼ kyabʼqʼi ktel tuʼn t-xi tzyet tuʼn kyyolin tukʼil jun qʼa moqa tukʼil jun txin ex ik tzeʼn tiʼ jaku bʼant kyuʼn ex tiʼ mintiʼ tuʼn tbʼant kyuʼn aj kyyolin.
In tzaj tqʼamaʼn Tyol Dios jlu: «Teyle junjun tuʼn t-xi tiqan tex tiqatz» (Gálatas 6:5). Tuʼntzunju, tukʼil onbʼil in tzaj tqʼoʼn Tyol Dios qeye aqoʼye testigos de Jehová, aqoxe in qo qʼamante qa kxel tzyet tuʼn qyoline tuʼn qkubʼ mojeʼye ex aqoye in qo qʼamante alkye kjawel qjyoʼne tuʼn qyoline tukʼil. Noqtzun tuʼnj, ax ikx at nimku qxole at kynabʼil ex in xi kyqanin kynabʼil kye qeju testigo de Jehová ma tzʼok kynabʼil ex kyaj tuʼn qtzalaje (Proverbios 1:5).
At nim kybʼinchbʼen xjal aʼyeju in che yolin, nimaq il qe. In tzaj tqʼamaʼn Tyol Dios qa nya bʼaʼn aju yaẍbʼil. A jlu atz in yolin kyiʼj kabʼe xjal in che kubʼ ten junx ex naʼmx kykubʼ mojeʼ twitz jun aj kawil, in yolin tiʼj aj tok kymakoʼn kabʼe xjal kytzʼalbʼil, in yolin tiʼj aj tokx tqʼoʼn jun xjal ttzʼalbʼil toj ttziʼ juntl moqa toj t-ẍop juntl, ex in yolin tiʼj junjuntl bʼinchbʼen nya bʼaʼn (1 Corintios 6:9-11). Ax ikx qa at jun qʼa tukʼil jun txin in tzaj nimxix kyajbʼil tuʼn kyten junx tuʼnju in che tzʼubʼin, moqa in che maʼtzin, ex tuʼnju in nok kymakon kyibʼ, in kubʼ kybʼinchaʼn ttzʼilil aju nya bʼaʼn toj twitz Dios, maske mintiʼ ẍe kubʼ ten junx (Gálatas 5:19-21). Ax ikx in tzaj tqʼamaʼn Tyol Dios qa nya bʼaʼn tuʼn qyolin tiʼj ttzʼilil yol (Colosenses 3:8).
Sbʼul aju qanmi moqa aju tkuʼx toj qanmi (Jeremías 17:9). Jaku bʼant tuʼn, tuʼn tkubʼ tbʼinchaʼn jun xjal aju ojtzqiʼn tuʼn qa nya bʼaʼn. Aʼyeju in che yolin, il tiʼj tuʼn tok kyxqʼuqin kyibʼ ex mintiʼ tuʼn kyten kyjunalx tuʼn miʼn kykubʼ sbʼun tuʼn kyanmi ex tuʼn miʼn tkubʼ kybʼinchaʼn jun nya bʼaʼn. Mintiʼ in tzaj nim nya bʼaʼn kyiʼj qeju in che yolin qa mintiʼ in che ex kyjunalx ex qa at juntl kyukʼil in xiʼ aju at tnabʼil (Proverbios 28:26). Aju okslal tajbʼil tuʼn tkubʼ mojeʼ ojtzqiʼn tuʼn qa nya bʼaʼnxix tuʼn t-xi tjyoʼn jun tukʼil toj Internet, tuʼnju nya bʼaʼn tuʼn tyolin tukʼil jun xjal aju mintiʼ ojtzqiʼn tuʼn (Salmo 26:4, TNM).
a Kyoj junjun tnam, mintiʼ in che ex xjal bʼetil tuʼn kyyolin naʼmxtoq kykubʼ mojeʼ. Mintiʼ in tzaj tqʼamaʼn Tyol Dios qa ilxix tiʼj tuʼn tbʼant jlu quʼn toj jun ambʼil aj qkubʼ mojeʼ. Ax ikx mintiʼ in tzaj tqʼamaʼn qa oʼkx jun tumel jlu jaku bʼant tuʼn qkubʼ mojeʼ.
b Jun techel, in tzaj tqʼamaʼn jun xnaqʼtzbʼil toj jun uʼj in yolin tiʼj mejebʼleʼn ex tiʼj ja xjal, qa at «oxe xnaqʼtzbʼil kyiʼj qeju ma bʼet nim ambʼil kykubʼlen mojeʼ (mas te 25 abʼqʼi) in tzaj tyekʼun qa tuʼnju junx kyokslabʼil qe jlu in nonin tuʼn kukx tten kymejebʼleʼn» (Marriage & Family Review, volumen 38, tajlal 1, t-xaq 88, 2005).