O tzʼajbʼen nimku Tuʼjil Tyol Dios kyuʼn testigos de Jehová tuʼn kyxnaqʼtzan tiʼj Xjan Uʼj. Noqtzun tuʼnj, tbʼanel in nel toj kywitz tuʼn tajbʼen Traducción del Nuevo Mundo de las Santas Escrituras kyuʼn —aju at kyoj nimku yol— tuʼnju in najbʼen tbʼi Dios tuʼn, tzʼaqli taʼ ex in nel naj qnikʼ tiʼj.

•   In najbʼen tbʼi Dios tuʼn. Nya kykyaqil qeju in netz kyiʼn Tyol Dios toj kʼuxbʼil in xi kyqʼoʼn toklen Dios aju tzaj qʼonte t-xim toj kywiʼ xjal. Jun techel tiʼj lu, toj jun Tyol Dios kux qʼoʼn kybʼi mas twitz 70 xjal e onin tuʼn tetz, noqtzun tuʼnj, mintiʼ kux qʼoʼn ni jun maj aju tbʼi Dios toj: aju Jehová.

   Atzunte Traducción del Nuevo Mundo de las Santas Escrituras ma kyaj tqʼoʼn tbʼi Dios nimku maj toj atz jatumel tkuʼxtoq toj ojtxi uʼj ex mintiʼ tkuʼx tbʼi kʼloj xjal bʼinchalte.

•   Tzʼaqli taʼ. At junjun Tuʼjil Tyol Dios mintiʼxix in tzaj kyqʼoʼn tqanil ikxix tzeʼn tkuʼx kyoj ojtxe uʼj. Jun kyxol qeju Tuʼjil Tyol Dios lu, in tzaj tqʼamaʼn jlu toj Mateo 7:13: «Chʼin twitz ttziiʼ tkawbʼil Dios, pero kyqʼoʼnk kyipena tiʼj tuʼn kyokxa tuj, kuma nim twitz ttziiʼ jbʼe nxiʼ tiiʼn qe xjal tuj qʼaqʼ». Toj ojtxe uʼj mintiʼ tkuʼx aju yol «qʼaq», sino aju «najen». Kubʼlo kyximen qeju kubʼ kyqʼoʼn Tyol Dios lu toj qyol qa atz che xeʼl nya bʼaʼn xjal toj qʼaqʼ te jumajx. Noqtzun tuʼnj, mintiʼ tkuʼx jlu kyoj ojtxe uʼj. Tuʼntzunju, kubʼ tqʼoʼn Traducción del Nuevo Mundo aju yol lu te «najen», ik tzeʼn tkuʼx kyoj ojtxe uʼj.

•   Nya kwest tuʼn tel qnikʼ tiʼj. Ax tok il tiʼj tuʼn tikʼx qʼet Tyol Dios toj juntl yol ikxix tzeʼn tkuʼx kyoj ojtxe uʼj, noqtzun tuʼnj, ax ikx il tiʼj tuʼn tok toj qwiʼ. Qo xnaqʼtzan tiʼj jun techel. In kubʼ tqʼoʼn jun Tyol Dios Mateo 5:3 ik tzeʼn jlu: «Kʼiʼwlaʼnqeʼkyeʼ xjal min njaw kynimiʼn kyibʼ». Noqtzun tuʼnj, mintiʼ in nel kynikʼ xjal tiʼj axix ximbʼetz tuʼn jlu. Tuʼntzunju, in kubʼ tqʼoʼn Traducción del Nuevo Mundo taqikʼ Tyol Dios lu ik tzeʼn jlu: «At tzalajbʼil kye qeju nneʼl kynikʼ tiʼj qa at tajbʼen Dios kye».

 Nya oʼkx in xi tqʼoʼn Traducción del Nuevo Mundo nim toklen tbʼi Dios, ax ikx tzʼaqli taʼ ex klar taʼ. Ax ikx at juntl tiquʼn junxitl kywitz txqantl Xjan Uʼj: aju aj t-xi sipet nya chjoʼn twiʼ, noq kukx in xi qʼet kye xjal. Tuʼn jlu nimku millón xjal jaku kubʼ kyuʼjin Tyol Dios tojku kyyol ex maske mintiʼ kypwaq xjal tuʼn ttzaj laqʼet jun.