Mintiʼ. Ojtzqiʼn quʼne qa mlay kambʼet kolbʼil tuʼnju in qo pakbʼane jayele (Efesios 2:8). ¿Tiquʼn?

 Qa ma qo ximin tiʼj jun tbʼanel xjal in tzaj ttziyen tuʼn t-xi tqʼoʼn jun tbʼanel oyaj, moqa kotz, te alkyexku xjal ma pon toj tembʼil ex tajlal xjaw saj tqʼamaʼn. Qa ma tzaj tyekʼun qa jaku tzʼok qeʼ tkʼuʼj tiʼj. ¿Okpe qo pol? Ok, ex nya oʼkxju, ax ikx jakulo txi qqʼamaʼn kye txqantl toj qja ex kye qamiw tuʼn kypon. Kkambʼetel, noqtzun tuʼnj, nya tuʼnju ma tzʼok tilil quʼn tuʼn qpon. Tuʼnju in nel qnikʼ qa mintiʼ in kambʼet jun oyaj tuʼn jun aqʼuntl in bʼant quʼn.

 Ax ikx, qʼuqli kykʼuʼj testigo de Jehová tiʼj Dios qa kjapunel twiʼ tyol o tzaj ttziyen tuʼn ttzaj tqʼoʼn chwinqlal te jumajx kye qeju in che bʼin te (Romanos 6:23). Ex tuʼnju qaj tuʼn ttzaj qʼoʼn kychwinqlal txqantl xjal, in nok tilil quʼn tuʼn t-xi qpakbʼan kye. Noqtzun tuʼnj, ojtzqiʼn quʼne qa mlay kambʼet kolbʼil tuʼnju in bʼant aqʼuntl lu quʼne (Romanos 1:17; 3:28). Ax tok, mlay bʼant jun tiʼ quʼn tuʼn ttzaj Dios tbʼanelxix oyaj lu. Ax Tyol Dios in tzaj qʼamante jlu: «Ma qo klet tuʼn, pero mya tuʼnju atwit qbʼinchbʼen tzʼaqlxix, noq oʼkx tuʼnju tzaj qʼaqʼan tkʼuʼj qiʼj» (Tito 3:5).