Kygan testigo de Jehová tuʼn kyyolin tiʼj Dios kyukʼil xjal te txqantl okslabʼil, pero mintiʼ in che kʼulin junx kyukʼil. In tzaj tqʼamaʼn Biblia qa at mujbʼabʼil kyxol axix tok okslal, tuʼn tbʼant jlu, il tiʼj tuʼn tten ax kyximbʼetz tiʼj jun xnaqʼtzbʼil (Efesios 4:16; 1 Corintios 1:10; Filipenses 2:2). Nya oʼkx tuʼn tmojeʼ kyxim tiʼj qa il tiʼj tuʼn tten kykʼujlabʼil, tuʼn ttzaj qʼaqʼin kykʼuʼj kyiʼj txqantl, tuʼn tkubʼ kynajsaʼn kyil kyxolx ex junjuntl kymod. Sino ax ikx, nim toklen tuʼn tjatz kyiʼn kyxnaqʼtzbʼil toj Biblia. Tuʼntzunju, in nokxix tilil kyuʼn testigos de Jehová tuʼn kyxnaqʼtzan tiʼj Biblia tuʼntzun tjatz kyiʼn kyxnaqʼtzbʼil toj. In kubʼ kyximen qa noqx gan kyokslabʼil qa mintiʼ xbʼant jlu kyuʼn (Romanos 10:2, 3).

 In tzaj tqʼamaʼn Biblia qa jaku tzaj tiʼn jun okslal nya bʼaʼn tiʼj tamiwbʼil tukʼil Dios qa in kʼulin junx tukʼil jun xjal te junxitl okslabʼil (2 Corintios 6:14-17). Tzul nya bʼaʼn tiʼj qʼuqbʼil tkʼuʼj axix tok okslal tuʼnju mintiʼ in mojeʼ kyximbʼetz kyiʼj xnaqʼtzbʼil. Tuʼntzunju, mintiʼ xi tqʼoʼn Jesús ambʼil kye t-xnaqʼtzbʼen tuʼn kykʼulin junx kyukʼil txqantl okslabʼil (Mateo 12:30; Juan 14:6). Ax ikx toj Ley tzaj tqʼoʼn Dios te Moisés, mintiʼ tzaj qʼoʼn ambʼil kye aj Israel tuʼn kykʼulin junx kyukʼil xjal te junxitl tnam ex junxitl kyokslabʼil (Éxodo 34:11-14). Tej tbʼet ambʼil, mintiʼ xi kykʼamoʼn aj Israel onbʼil xi kyqʼoʼn kyvesin kye tuʼnju ok kyqʼoʼn toklen kawbʼil tzaj qʼoʼn kye ex tuʼnju junxitl kyokslabʼil (Esdras 4:1-3).

 Jaku. Ik tzeʼn te apóstol Pablo, in nok tilil quʼne tuʼn tel qnikʼe tiʼj tzeʼn kyximbʼetz «nimku xjal» ex alkye xnaqʼtzbʼil nimen kyuʼn (1 Corintios 9:19-22). Ik tzeʼn in tzaj tqʼamaʼn Tyol Dios, in nok tilil quʼne tuʼn tok qqʼoʼne toklen xnaqʼtzbʼil in nok qeʼ kykʼuʼj xjal tiʼj aj qyoline kyukʼil (1 Pedro 3:15).