¿In che ok ky-obligarin testigos de Jehová qe xjal tuʼn tkubʼ kychʼixpun kyokslabʼil?

TUʼN TOK QBʼIʼN TOJ

Mintiʼ, mintiʼ in qo ok tene obligaril jun xjal tuʼn tkubʼ tchʼixpuʼn tokslabʼil. Axpe ikx, aju quʼje mas in najbʼenxix aju La Atalaya, tqʼama jlu: «Forzar a la gente a cambiar de religión está mal». a Ex mintiʼ in bʼant jlu quʼne ik tzeʼn tzul chikʼbʼan kubʼni:

Mintiʼ ok ten Jesús obligaril kye xjal tuʼn t-xi kynimen aju xi t-xnaqʼtzaʼn. Ojtzqiʼntoq tuʼn qa nya nim xjal kxel bʼinte aju tqanil xi tqʼamaʼn (Mateo 7:13, 14). Toj jun maj, tej tkyaj kolin kyuʼn junjun t-xnaqʼtzbʼen tuʼnju mintiʼ xi kynimen aju xi t-xnaqʼtzaʼn kye, xi tqʼoʼn ambʼil kye tuʼn kyikʼ bʼet, mintiʼ ok ten obligaril kye tuʼn kykyaj ten (Juan 6:60-62, 66-68).
Xi t-xnaqʼtzaʼn Jesús kye qeju e ok lepeʼ tiʼj qa mintiʼ tuʼn kyok ten obligaril kye xjal tuʼn tkubʼ kychʼixpuʼn aju in xi kynimen, moqa in xi kyokslaʼn. Aju tuʼn tbʼant kyuʼn, aju tuʼn tok tilil kyuʼn tuʼn kyjyoʼn kyiʼj xjal kyajbʼil tuʼn tok kybʼin tqanil (Mateo 10:7, 11-14).
Mintiʼx tajbʼen qa ma kubʼ tchʼexpuʼn jun xjal tokslabʼil noq tuʼnju in nok obligarin. Taj Dios tuʼn kykʼulun xjal te tuʼn tkyaqil kyanmi, ex nya tuʼnju in che ok obligarin (Deuteronomio 6:4, 5; Mateo 22:37, 38).

¿Kyajpe testigos de Jehová tuʼn kyok lepeʼ kykyaqil xjal kyiʼj?

Ax tok, in xi qiʼne tbʼanel tqanil tiʼj Tyol Dios «tuj tkyaqil twitz txʼotxʼ» ex in bʼant quʼne «jatum nnoʼk kychmon kyibʼ xjal» ex kyojele ja ik tzeʼn in tzaj tqʼamaʼn Tyol Dios (Hechos 1:8; 10:42; 20:20). Ik tzeʼn ikʼ kyiʼj okslal toj tnejel syent abʼqʼi, at maj in che yolin xjal qiʼje qa qaje tuʼn kyoktz xjal toj qokslabʼile (Hechos 18:12, 13). Noqtzun tuʼnj, nya ax tok jlu. In xi qqʼoʼne ambʼil teyele junjun xjal tuʼn tjaw tjyoʼn tiʼ taj tuʼn t-xi tnimen. Aju qajbʼile, aju tuʼn tel kynikʼ xjal tiʼj aju in tzaj tqʼamaʼn Tyol Dios tuʼntzun tjaw kyjyoʼn alkye okslabʼil kyaj tuʼn kyten toj.

Mintiʼ in qo ok tene obligaril kye xjal tuʼn t-xi kyokslaʼn aju nimen quʼne. Ax ikx mintiʼ in najbʼen okslabʼil quʼne tuʼn t-xi qqʼamaʼne aju kyximbʼetz xjal in nokx kyqʼoʼn kyibʼ kyxol aj kawil, mintiʼ in xi qqʼoʼne pwaq moqa junjuntl tiʼ noq tuʼn kyok xjal te testigos de Jehová. Nya ik qoʼye ik tzeʼn qeju in kyqʼamaʼn qa okslal qe, pero junxitl kybʼinchen twitzju kyaj t-xnaqʼtzaʼn Jesús. b

¿Jakupe kubʼ tchʼixpuʼn jun xjal tokslabʼil?

Aju t-sanjel Dios Abrahán tbʼi kyaj ttzaqpiʼn kyokslabʼil ttat

In tzaj tqʼamaʼn Tyol Dios qa jaku, ateʼ nim techel in yolin kyiʼj junjun xjal kubʼ kyximen tuʼn kykʼulun teju Dios axix tok ex mintiʼ e ok lepeʼ tiʼj kyokslabʼil kyman. Ik tzeʼn bʼant tuʼn Abrahán, Rut, junjun xjal te tnam Atenas ex apóstol Pablo (Josué 24:2; Rut 1:14-16; Hechos 17:22, 30-34; Gálatas 1:14, 23). Ax ikx in tzaj tqʼamaʼn Tyol Dios qa teyele junjun qe jaku kubʼ t-ximen jun nya bʼaʼn ximbʼetz, tuʼn tkyaj ttzaqpiʼn okslabʼil tbʼanel in nela toj twitz Dios (1 Juan 2:19).

Aju Declaración Universal de Derechos Humanos, tzaj tqʼamaʼn ONU qa a kubʼ «qʼuqbʼante kawbʼil tuʼn t-xi qʼet ambʼil kye kykyaqil xjal», tqʼama qa qkyaqilx «jaku bʼant tuʼn tkubʼ qchʼixpuʼn qokslabʼil moqa aju nimen quʼn». Ax ikx tzaj tqʼamaʼn qa kykyaqil xjal at ambʼil kye tuʼn kyjyon tqanil, tuʼn ttzaj kykʼamoʼn, tuʼn t-xi kyqʼoʼn junjun tqanil ex tuʼn kyyolin. Ex at toklen jlu tiʼj okslabʼil. c Tuʼnju in tzaj qʼoʼn ambʼil, il tiʼj tuʼn tel qnikʼ tiʼj qa ax ikx kye txqantl jaku che kolin tiʼjju nimen kyuʼn ex jaku bʼant tuʼn miʼn t-xi kynimen aju nimen quʼn.

¿Mintiʼpe in qo nimen kye toj qja qa ma kubʼ qchʼixpuʼn qokslabʼil?

Nya ik ttenju. In tzaj tqʼamaʼn Tyol Dios tuʼn qnimen kye kykyaqil xjal, noq alkyexku kyokslabʼil (1 Pedro 2:17). Ax ikx, in xi kybʼin testigos de Jehová kawbʼil aju tuʼn kynimen kye kytat, maske junxitl kyokslabʼil (Efesios 6:2, 3).

Ax tok, nya kykyaqil xjal junx kyximbʼetz tiʼjju in tzaj tqʼamaʼn Tyol Dios. Jun techel, tqʼama jun xuʼj, moqa qya, aju jaw chʼiy toj tnam Zambia jlu: «Toj kyximbʼetz xjal jatumel najli qine, aju tuʼn tkubʼ tchʼixpuʼn jun xjal tokslabʼil, jun sbʼubʼil jlu kye toj tja ex kye xjal jatumel najli». Maske ikju, tej tzmatoq txin xi tzyet tuʼn t-xnaqʼtzan tiʼj Tyol Dios kyukʼil testigos de Jehová ex kubʼ t-ximen tuʼn tkubʼ tchʼixpuʼn tokslabʼil. «Nim maj tzaj kyqʼamaʼn ntate weye qa mintiʼtoq in che tzalaj wiʼje ex qa in tzajtoq kybʼis wuʼne —tqʼama—. Maske kwest jlu tuʼnju nimtoq toklen te weye aju qa in che tzalaj wiʼje. Qa tzʼaqli qine twitz Jehová ex nya kywitz qeju kyxnaqʼtzbʼil okslabʼil nya a t-xilen jlu qa mintiʼ in chin nimane kye toj njaye». d

a Bʼaʼn tuʼn tok tqʼoʼn twitza tiʼj uʼj La Atalaya 1 te enero te 2002, t-xaq 12, taqikʼ 15.

b Jun techel, tej chʼixtoq tkubʼ bʼaj abʼqʼi 785, kubʼ tqʼoʼn aj kawil Carlomagno jun kawbʼil qa tuʼntoq kykyim kykyaqil xjal toj Sajonia qa mintiʼtoq ma jaw aʼ kywiʼ, moqa bʼyan, tuʼn kyok te católico. Juntl techel aju Paz de Augsburgo, aju uʼj kubʼ kyfirmarin kabʼe kʼloj xjal e ten toj qʼoj toj Sacro Imperio Romano toj abʼqʼi 1555. Toj uʼj lu kyaj qʼamaʼn qa aju nejenel te junjun lugar ten kabʼe kyximbʼetz: tuʼn kyok te católico moqa te luterano. Ex aʼyeju xjal in che anqʼin tjaqʼ kykawbʼil in che oktoq obligarin tuʼn kyxiʼ toj okslabʼil kjawil tjyoʼn nejenel. Qatzun nya kyaj tuʼn kyxiʼ, iltoq tiʼj tuʼn kyetz toj tembʼil aju.

c Aʼyeju Derechos ik tzeʼn jlu ateʼ toj Carta Africana de Derechos Humanos y de los Pueblos, la Declaración Americana de los Derechos y Deberes del Hombre, la Carta Árabe de Derechos Humanos de 2004, la Declaración de Derechos Humanos de la Asociación de Naciones del Sudeste Asiático, el Convenio Europeo de Derechos Humanos y el Pacto Internacional de Derechos Civiles y Políticos. Noqtzun tuʼnj, nya kykyaqil qe tnam junx in japun jlu kyuʼn.

d In tzaj tqʼamaʼn Xjan Uʼj (Biblia) qa Jehová tbʼi Dios axix tok.