Mintiʼ. Mintiʼ in xi kyqʼoʼn testigos de Jehová kydiezmo. In bʼant aqʼuntl quʼne tukʼil onbʼil in nel anqʼin tiʼj kyanmi qeju kyaj tuʼn kyonin ex mintiʼ in nok tbʼi xjal tiʼj onbʼil. ¿Tiʼ t-xilen, moqa tiʼ tzʼelpuna, yol diezmo, ex tiquʼn mintiʼ in bʼant lu kyuʼn testigo de Jehová?

 Tojju ley tzaj qʼoʼn kye aj Israel attoq ley aju tuʼn t-xi kyqʼoʼn diezmo -moqa aju tlajajin tiʼj tiʼchaq at kye- kye pal. Klarxix in tzaj tqʼamaʼn Tyol Dios qa aqeju okslal mintiʼ tuʼn tjapun ley lu kyuʼn. Tuʼntzunju, toj ambʼil jaʼlo mintiʼ jun ley tuʼn t-xi qʼet diezmo (Hebreos 7:5, 18; Colosenses 2:13, 14).

 Ik in bʼant kyuʼn testigos de Jehová ik tzeʼn kye tnejel okslal, mintiʼ in xi kyqʼoʼn diezmo. ¿Alkye tten in che onintoq tnejel okslal? Toj kabʼe tten: jun, in che onintoq tukʼil onbʼil noq jniʼ in nel anqʼin tiʼj kyanmi ex tkabʼ, in che pakbʼantoq ex in xi kyqʼoʼntoq xnaqʼtzbʼil noq kukx tiʼj Tyol Dios.

 In bʼant lu ik tzeʼn in tzaj tqʼamaʼn Tyol Dios: «Teyle junjun qʼonx jun oyaj ik tzaʼn ma kubʼ t-ximan tuj tanmi; mya tukʼil bʼis tuʼn t-xi tqʼoʼn ex mya lajwers, porque aju xjal in xi tqʼoʼn oyaj tukʼil tzalajbʼil, in tzalaj Dios tiʼj» (2 Corintios 9:7).