¿Tiʼ kyximbʼetz testigo de Jehová at tiʼjju in nel kynikʼ científico tiʼj?

TUʼN TOK QBʼIʼN TOJ

In nok qqʼoʼne toklen kyojtzqibʼil científico ex in chex qnimane qa ma tzʼel toj qʼanchaʼl qa ax tok aju otoq tzʼel kynikʼ tiʼj.

In tzaj tqʼamaʼn jun diccionario qa aju yol ciencia, atz in yolin tiʼj «axix tok ojtzqibʼil tiʼj tkyaqilju at, tiʼj jatumel tzaj tzyet ex tiquʼn ate, [mas] aj tbʼant jun tiʼ tuʼntzun tel nikʼbʼaj tiʼj» (Clave. Diccionario de uso del español actual). Mintiʼ in nok Biblia te kyuʼj científico, pero ateʼ tqanil tkuʼx toj tuʼntzun tel kynikʼ xjal tiʼj tkyaqilju at twitz Txʼotxʼ ex tuʼn kytzalaj tiʼj. Qo xnaqʼtzan kyiʼj junjun techel.

Astronomía: «Kyiʼn jaw kywitze twitz kyaʼj ex kykeʼyinxe: ¿Alkye o bʼinchante tkyaqil jlu? Aju ok qʼonte teyle junjun cheʼw tuj tlugar ex in che tzaj ttxkoʼn teyle junjun ik tzaʼn tbʼi tok» (Isaías 40:26).
Biología: Yolin Salomón «kyiʼj qe tzeʼ ex kyiʼj qe awal, ex xi ttxolbʼaʼn jlu kye xjal, tzajx qeʼ kyiʼj qe tzeʼ wiʼten ateʼ twi witz Líbano, ax ikxpe kyiʼj qe kʼul in che tzaj chʼiy kyiʼj tkajonil ja. Ax ikx o tzʼel tnikʼ kyiʼj qe jil, qe jil in che lipan twitz kyaʼj, qe jil in xi kyjaquʼn kykʼuʼj twitz txʼotxʼ ex qe kyiẍ» (1 Reyes 4:33).
Medicina: «Aqeju xjal bʼaʼn qe mya il tiʼj jun qʼanal kye, oʼkx qeju xjal yabʼ qe» (Lucas 5:31).
Meteorología: «Ope txi aja keʼyilte jatum kʼuʼn ttxa cheʼw wuʼne ex saqbʼaqun [...]. Alkye bʼe in xi tiʼn [...] kyqʼiqʼ twitz txʼotxʼ, aju in tzaj tuj tjawitz qʼij» (Job 38:22-24).

Aj qyoline tiʼj ciencia, in nok qqʼoʼne toklen tuʼnju nim maj in che etz xnaqʼtzbʼil tiʼj jlu kyoj quʼje ex tiʼjju in nel kynikʼ científico tiʼj. Ax ikx, in qo onine kyiʼj qkʼwale tuʼn kyok te tbʼanel xnaqʼtzal tuʼntzun tel kynikʼ tiʼj tkyaqilju in nok kykeʼyin. Nya oʼkxju, ax ikx ateʼ testigo de Jehová in che aqʼunan tiʼj ciencia toj junxichaq tten ik tzeʼn tiʼj bioquímica, tiʼj matemática ex tiʼj física.

Aju mlay bʼant tuʼn ciencia

Noqtzun tuʼnj, in nel qnikʼe tiʼj qa mlay tzaqʼwet tkyaqil kyxjel xjal tuʼn ciencia. a Ximana tiʼj jlu: jaku tzaj kyqʼamaʼn qeju in che xnaqʼtzan tiʼj planeta tzeʼn bʼinchaʼn maj, atzun qeju in che xnaqʼtzan tiʼj qxmilal, jaku tzaj kyqʼamaʼn tzeʼn in naqʼunan qxmilal. Pero ¿tiquʼn tbʼanel ok Txʼotxʼ tuʼn tten anqʼibʼil twitz? ¿Tiquʼn toj tumel ex tbʼanel in naqʼunan qxmilal?

O tzʼel qnikʼe tiʼj qa oʼkx Biblia in tzaj qʼonte tbʼanel tzaqʼwebʼil kyiʼj xjel ik tzeʼn jlu (Salmo 139:13-16; Isaías 45:18). Tuʼntzunju, in kubʼ qximane qa tbʼanel tuʼn qxnaqʼtzan tiʼj ciencia ex tiʼj Biblia tuʼntzun tel qnikʼ kyiʼj tiʼchaq.

At maj, jaku kubʼ qximen qa mintiʼ tmojbʼabʼil tibʼ ciencia tukʼilju in tzaj tqʼamaʼn Biblia. Ex in bʼaj jlu tuʼnju ateʼ junjun in bʼaj kytzpetsaʼn aju in tzaj tqʼamaʼn Biblia. Jun techel, mintiʼ in tzaj tqʼamaʼn Biblia qa kyaj bʼant Txʼotxʼ toj qaq qʼij te 24 or (Génesis 1:1; 2:4).

Ateʼ junjun xnaqʼtzbʼil in tzaj tqʼamaʼn ciencia, pero mintiʼ in nok qʼoʼn kyoklen. ¿Tiquʼn? Tuʼnju mintiʼ in nel toj qʼanchaʼl qa ax tok ex tuʼntzunju mintiʼ in nok qʼoʼn kyoklen kyuʼn xjal at nim kyojtzqibʼil. Jun techel, aj in nel kynikʼ científico tiʼj tzeʼn bʼinchaʼn tkyaqilju at twitz Txʼotxʼ ex twitz kyaʼj, tkyaqilju at toklen tukʼil biología, química ex junjuntl xnaqʼtzbʼil at toklen tukʼil ciencia, in tzaj kyqʼamaʼn qa nya kyjunalx qe tiʼchaq lu e bʼant. Ex ax qeye qximbʼetz at ik tzeʼn kye.

a Jun maj, tqʼama físico Erwin Schrödinger te Austria jlu, aju kambʼan tiʼj premio Nobel: In tzaj tqʼoʼn ciencia tqanil «kyiʼj nim tiʼchaq o che ikʼ. Pero mlay tzaj tqʼoʼn tqanil kyiʼj tiʼchaq tkuʼx toj qanmi, toj juntl yol, aju qaj tuʼn tel qnikʼ tiʼj». Atzunte Albert Einstein tqʼama jlu: «Tuʼn tkyaqilju o tzikʼ qiʼje, o tzʼel qnikʼe tiʼj qa mlay che kyaj nya bʼaʼn toj ttxolil qa oʼkx ma qo ok lepeʼye tiʼj qeye qximbʼetz».