Kygan testigo de Jehová tuʼn kyyolin tiʼj Biblia kyukʼil kykyaqil xjal, axpe ikx kyukʼil qeju o tzaj kyqʼamaʼn qa nya kyaj tuʼn kybʼin kyiʼj. ¿Tiquʼn? Tuʼnju kʼujlaʼn Dios kyuʼn ex qe xjal (Mateo 22:37-39). In nonin qkʼujlabʼile at tiʼj Dios tuʼn t-xi qbʼiʼne kawbʼil kyaj tqʼamaʼn Jesús tiʼjju tuʼn qpakbʼane tiʼj tbʼanel tqanil (Hechos 10:42; 1 Juan 5:3). Tuʼntzunju, kukx in qo yoline tiʼj Tyol Dios kyukʼil xjal ik tzeʼn bʼant kyuʼn profeta toj ambʼil ojtxe (Jeremías 25:4). Ex tuʼnju kʼujlaʼn qe xjal quʼne, in nonin qiʼje tuʼn qyoline kyukʼil tiʼj tbʼanel tqanil tiʼj Tkawbʼil Dios, axpe ikx kyukʼil qeju nya kyaj tuʼn tok kybʼiʼn tbʼanel tqanil (Mateo 24:14). ¿Tiquʼn in bʼant jlu quʼne? Tuʼnju jaku tzʼonin kyiʼj xjal tuʼn kyklet.

 Nya oʼkxju, aj in qo meltzʼaje kyja xjal mintiʼ in qo ok bʼiʼne kyuʼn aj qpone tnejel maj, at maj in kanet juntl xjal quʼne ex taj tuʼn tok tbʼiʼn tbʼanel tqanil. Qo yolin kyiʼj junjuntl tiquʼn.

•   In cheʼx xjal anqʼil toj juntl lugar.

•   Ateʼ junjuntl xjal toj ja kyaj tuʼn tok kybʼiʼn.

•   In chʼexpaj kyanqʼibʼil xjal. Tuʼn tkyaqilju in bʼaj twitz tkyaqil Txʼotxʼ ex aju in nikʼ toj kyanqʼibʼil xjal, in nel kynikʼ tiʼj «qa at tajbʼen Dios kye» ex tuʼn jlu kyaj tuʼn tel mas kynikʼ tiʼjju in tzaj tqʼamaʼn Biblia (Mateo 5:3). Axpe ikx qeju nya kyaj tuʼn tok kybʼiʼn tbʼanel tqanil, jaku chʼexpaj kyximbʼetz ik tzeʼn bʼaj tiʼj apóstol Pablo (1 Timoteo 1:13).

 Noqtzun tuʼnj, mintiʼ in nok q-obligarine qe xjal tuʼn qok bʼiʼne kyuʼn (1 Pedro 3:15). In kubʼ qximane qa teyele junjun kbʼel t-ximen alkye tokslabʼil taj tuʼn tten (Deuteronomio 30:19, 20).