In che onin. Kukx in qo onine kyiʼj qe xjal aj ttzaj xitbʼil tuʼnx twitz Txʼotxʼ. In xi qqʼoʼne onbʼil kye testigos de Jehová ex kye txqantl xjal, ik tzeʼn in tzaj tqʼamaʼn Tyol Dios toj Gálatas 6:10: «Qbʼincham bʼaʼn kye kykyaqil, ex tnejelxix kye qe erman tuj okslabʼl». Nya oʼkxju, ax ikx xi qqʼuqbʼaʼne kykʼuʼj qeju kyajxix onbʼil toj ambʼil nya bʼaʼn (2 Corintios 1:3, 4).

 Aj ttzaj jun xitbʼil, in nok tilil kyuʼn ansyan toj jun kojbʼil tuʼn kyxi yolin kye qeju in nok kychmon kyibʼ kyukʼil tuʼn t-xi kybʼiʼn tzeʼn ateʼ ex tiʼ onbʼil kyaj. Aj tbʼant jlu, in xi kysamaʼn jun tqanil toj ninja qʼil twitz aqʼuntl tuʼn t-xi kyqʼamaʼn tzeʼn ateʼ qe erman ex tiʼ onbʼil ma txi kyqʼoʼn toj ambʼil aju.

 Qa mlayx bʼant tuʼn kyonin kʼloj okslal kyiʼj qeju ma tzaj nya bʼaʼn kyiʼj, in bʼaj tnukʼun Kʼloj Xjan Qʼil Twitz Aqʼuntl tuʼn kyxi onit qeju ma tzaj nya bʼaʼn kyiʼj. In che bʼaj tnukʼun ninja qʼil twitz aqʼuntl junjun kʼloj xjal tuʼn tbʼaj nukʼet aqʼuntl, ex qeju testigo te junjuntl tnam in xi kyqʼoʼn ambʼil, pwaq ex junjuntl tuʼn kyonin (Proverbios 17:17). Chʼixmi ax jlu bʼant toj tnejel syent abʼqʼi tej ttzaj waʼyij ex nimku okslal e ok weʼ twitz lu (1 Corintios 16:1-4).

 Chʼin tiʼj onbʼil in xi samet toj ninja qʼil twitz aqʼuntl in najbʼen tuʼn kyxi onit qeju in tzaj nya bʼaʼn kyiʼj tuʼn xitbʼil (Hechos 11:27-30; 2 Corintios 8:13-15). Ex tuʼnju aʼyeju in che onin noq kukx in che onin, tkyaqil onbʼil in najbʼen tuʼn t-xi qʼet onbʼil. Ax ikx, il tiʼj tuʼn t-xi qqʼamaʼne qa tkyaqil onbʼil in najbʼen tojxix tumel (2 Corintios 8:20).