In che respetarin testigo de Jehová kye gobierno ex kye símbolos patrios. Ax ikx, in xi kyqʼoʼn ambʼil kye txqantl tuʼn tkubʼ kyximen qa kyaj tuʼn kysaludarin te bandera, tuʼn t-xi kyqʼamaʼn jura a la bandera ex tuʼn kybʼitzin tiʼj himno nacional.

 In kubʼ kyximen testigo de Jehová tuʼn miʼn kyparticiparin kyukʼil xjal tuʼnju mintiʼ toklen jlu tukʼilju in tzaj tqʼamaʼn Tyol Dios. Nya oʼkxju, ax ikx kyaj tuʼn tok qʼoʼn toklen aju nimen kyuʼn ik tzeʼn kye in nok kyqʼoʼn toklen aju nimen kyuʼn txqantl.

Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu:

•  ¿Tiʼ in tzaj tqʼamaʼn Tyol Dios tiʼj xnaqʼtzbʼil lu?

•  ¿Tiʼ in bʼant kyuʼn testigo de Jehová qa in tzaj tqʼamaʼn ley tuʼn kyparticiparin?

•  ¿In che oninpe testigo de Jehová tuʼn kybʼant chʼixpubʼil tiʼj gobierno?

 Qʼonka twitza tiʼj kabʼe nabʼil toj Tyol Dios jatumel in tzaj tyekʼin tiquʼn mintiʼ in che participarin:

•   Oʼkx Dios at toklen tuʼn qkʼulin te. In tzaj tqʼamaʼn Tyol Dios jlu: «Twitz Qman tuʼn kykʼulune, aju Kydiose, ex oʼkx te tuʼn kyajbʼene» (Lucas 4:8). Aj t-xi kyqʼamaʼn xjal jura a la bandera ex aj t-xi kybʼitzin himno nacional, chʼixme tkyaqil maj in xi kyqʼamaʼn qa che ajbʼel te tnam twitz alkyexku juntl tiʼ. Tuʼntzunju, mintiʼ in tzaj tqʼoʼn kynabʼil testigo de Jehová ambʼil kye tuʼn t-xi kybʼinchaʼn jlu.

   Ax ikx, mintiʼ in che saludarin testigo de Jehová twitz bandera tuʼnju in kubʼ kyximen qa in che kʼulin xjal twitz ex mintiʼ in tzaj tqʼoʼn Biblia ambʼil tuʼn tbʼant jlu quʼn (1 Corintios 10:14). In tzaj kyqʼamaʼn junjun xjal o che xnaqʼtzan ojtxe qa in nok bandera te jun techel okslabʼil. Kubʼ ttzʼibʼin historiador Carlton Hayes jlu: «Nim toklen bandera toj kywitz xjal, axpe ikx in che kʼulin twitz». a Tej tyolin Daniel Mannix kyiʼj tnejel okslal, tqʼama jlu: «Mintiʼ xi kyqʼoʼn okslal [...] chojbʼil te aj kawil te [Roma], aju in nok toj ambʼil jaʼlo ik tzeʼn tuʼn miʼn qsaludarin te bandera». b

  Mintiʼ in che saludarin testigo de Jehová te bandera ex te junjuntl símbolo patrio. Pero in nok kyqʼoʼn kyoklen, mintiʼ in che kubʼ kypatin ex mintiʼ in nok kybʼinchaʼn nya bʼaʼn kyiʼj.

•   Junx kyoklen kykyaqil xjal toj twitz Dios (Hechos 10:34, 35). In tzaj tqʼamaʼn Biblia jlu: «Junx xjal tbʼincha Dios te kyiyjil kykyaqil xjal tuʼn kyten tuj tkyaqil twitz txʼotxʼ» (Hechos 17:26). Tuʼntzunju, in kubʼ kyximen testigo de Jehová qa nya toj tumel tuʼn tok qʼoʼn toklen jun xjal noq tuʼn ttnam. In nok kyqʼoʼn kyoklen kykyaqil xjal noq jaxku tumel in che tzaj moqa jaxku tumel in che anqʼin (1 Pedro 2:17).

 In nok kyqʼoʼn testigo de Jehová kyoklen gobierno. Ex in nok qeʼ kykʼuʼj tiʼj qa in tzaj tqʼoʼn Dios ambʼil tuʼn kyten tuʼntzun tten tkyaqil toj ttxolil (Romanos 13:1-7). Ax ikx in kubʼ kyximen qa il tiʼj tuʼn kynimen okslal kye gobierno (Lucas 20:25).

 Pero ¿tiʼ in bʼant kyuʼn qa in tzaj tqʼamaʼn ley tuʼn t-xi kybʼinchaʼn jun tiʼ aju nya bʼaʼn in nela toj twitz Dios? Toj junjun ambʼil, jaku txi kyqanin te gobierno tuʼn tbʼant junjun chʼixpubʼil kyiʼj ley. c Qatzun mlay bʼant jun chʼixpubʼil, kukx in che respetarin kye gobierno ex in xi kybʼiʼn kawbʼil lu: «Tnejel ilxix tiʼj tuʼn t-xi qnimane Dios, ex mya qe xjal» (Hechos 5:29).

 Mintiʼ. Mintiʼ in che onin testigo de Jehová tiʼj política, mintiʼ in xi kyqʼamaʼn jura a la bandera, mintiʼ in che saludarin te ex mintiʼ in xi kybʼitzin himno nacional. Mintiʼ in bʼant jlu kyuʼn tuʼnju kyaj tuʼn tbʼaj kychʼexpuʼn qe tiʼchaq, sino in xi kybʼiʼn aju in tzaj tqʼamaʼn Tyol Dios.