Mintiʼ. ¿Tiquʼn? Tuʼnju teyele junjun kbʼel t-ximen tuʼn tajbʼen te Dios (Romanos 14:12). In nok tilil kyuʼn testigos de Jehová tuʼn t-xi kyqʼoʼn xnaqʼtzbʼil tiʼj Tyol Dios kye kykʼwal. Pero aj kychʼiy kʼwal kyuʼnx kbʼel kyximen qa che okel te testigo de Jehová moqa miʼn (Romanos 12:2; Gálatas 6:5).

 Ik tzeʼn in kubʼ kyximen kykyaqil mambʼaj, kyaj testigo de Jehová tuʼn kytzalaj kykʼwal. In xi kyqʼoʼn xnaqʼtzbʼil kye tiʼjju jaku tzʼonin kyiʼj junjun qʼij, tuʼn tten tbʼanel kymod ex tuʼn tel kynikʼ tiʼj Dios. Qʼuqli kykʼuʼj testigo de Jehová tiʼj qa in che onin consej tkuʼx toj Tyol Dios kyiʼj tuʼn tten jun tbʼanel kyanqʼibʼil. Tuʼntzunju, in che onin kyiʼj kykʼwal tuʼn tel kynikʼ tiʼj jlu aj kyxnaqʼtzan tiʼj Tyol Dios kyukʼil ex aj kyxiʼ kyoj chmabʼil (Deuteronomio 6:6, 7). Iktzun tten ya otoq tzʼel kynikʼ kʼwal tiʼj Tyol Dios aj kychʼiy ex teyele junjun kbʼel t-ximen qa ax tokslabʼil ktel ik tzeʼn kye tman.

•  ¿In che bautisarinpe kykʼwal testigos de Jehová akux tal neʼ qe?

•  ¿In nelpe kyikʼun testigos de Jehová qe kykʼwal qa nya kyaj tuʼn kybautisarin?

•  ¿Tiquʼn in cheʼx kykʼwal testigo de Jehová pakbʼal kyukʼil?

•  ¿In kubʼpe kyikʼsaʼn testigo de Jehová qe fiesta in kubʼ kyikʼsaʼn xjal?

•  ¿Tiʼ in kubʼ kynaʼn kykʼwal testigos de Jehová?

 Mintiʼ. Mintiʼ in tzaj tqʼamaʼn Tyol Dios tuʼn kybautisarin qe neʼ moqa neʼẍ. Jun techel, in tzaj tqʼamaʼn qa tej naʼmxtoq kybautisarin okslal te tnejel syent abʼqʼi, tnejel ok kybʼiʼn tbʼanel tqanil, «xi kyokslaʼn» ex ajtz tiʼj kyanmi (Hechos 2:14, 22, 38, 41). In tzaj tyekʼin jlu qa nim toklen tuʼn tchʼiy jun xjal naʼmxtoq tbautisarin. ¿Tiquʼn? Tuʼnju il tiʼj tuʼn tel tnikʼ tiʼjju in tzaj t-xnaqʼtzaʼn Tyol Dios, tuʼn t-xi tokslaʼn ex tuʼn tanqʼin ik tzeʼn in tzaj tqʼamaʼn. Ex mlay bʼant jlu tuʼn jun tal neʼ.

 Bʼalo jaku kubʼ t-ximen kʼwal tuʼn tbautisarin aj tikʼ ambʼil. Pero naʼmxtoq tbʼant jlu tuʼn, nim toklen tuʼn tel tnikʼ tiʼj qa nya jun saqchbʼil jlu.

 Mintiʼ. In tzaj kybʼis aj tkubʼ t-ximen jun kyxol qe kykʼwal tuʼn miʼn tten ax kyokslabʼil ik tzeʼn kye, pero kukx in nok kykʼujlaʼn. Mintiʼ in kyaj kytzaqpiʼn tuʼn kyyolin tukʼil noq tuʼnju mintiʼ in nok te testigo de Jehová.

 At nimku tiquʼn. a

•   In tzaj tqʼamaʼn Biblia qa nim toklen tuʼn kyyolin mambʼaj kyukʼil kykʼwal tiʼj Dios ex tuʼn t-xi kyxnaqʼtzaʼn kye tzeʼn tuʼn kykʼulin te (Efesios 6:4). In che kʼulin te Dios aj kyyolin kyukʼil xjal tiʼjju nimen kyuʼn. Tuʼntzunju, aj kypakbʼan ax ikx at toklen tukʼilju xnaqʼtzbʼil in xi qʼet te jun kʼwal (Romanos 10:9, 10; Hebreos 13:15).

•   In tzaj tqʼamaʼn Tyol Dios jlu kye kuʼxun: «Kynimsaʼn jawe tbʼi Qman» (Salmo 148:12, 13). Ex jun tumel tuʼn tjaw qnimsaʼn tbʼi Dios, aju qa ma qo yolin tiʼj kyukʼil txqantl. b

•   Nim in nonin kyiʼj kʼwal qa ma che pakbʼan junx kyukʼil kyman. Jun techel, in nonin kyiʼj tuʼn kyyolin kyukʼil alkyexku xjal. Ax ikx, in nonin kyiʼj tuʼn tten tbʼanel kymod, ik tzeʼn tuʼn ttzaj qʼaqʼin kykʼuʼj kyiʼj txqantl, tuʼn kyrespetarin, tuʼn kyyolin toj tumel ex tuʼn kyximen kyiʼj txqantl. Nya oʼkxju, ax ikx in nonin kyiʼj tuʼn tel mas kynikʼ tiʼj Biblia ex tuʼn tok qeʼ kykʼuʼj tiʼj.

 Mintiʼ in kubʼ kyikʼsaʼn testigo de Jehová qe fiesta nya bʼaʼn in che ela toj twitz Dios, ik tzeʼn qeju at kyoklen kyukʼil okslabʼil moqa alkyexku juntl (2 Corintios 6:14-17; Efesios 5:10). c Jun techel, mintiʼ in kubʼ kyikʼsaʼn qe cumpleaño, nix Navidad tuʼnju mintiʼ in tzaj tqʼamaʼn Tyol Dios tuʼn tbʼant jlu kyuʼn.

 Kygan testigo de Jehová tuʼn kyten junx kyukʼil toj kyja ex tuʼn t-xi kyqʼoʼn oyaj kye kykʼwal. Mintiʼ in che ok lepeʼ kyiʼj fecha toj calendario tuʼntzun tok kykeʼyin toj alkye ambʼil kʼokel kychmon kyibʼ ex tuʼn t-xi kyqʼoʼn oyaj. Sino in nok kychmon kyibʼ toj alkyexku ambʼil ex in xi kyqʼoʼn oyaj.