In che ok lepeʼ testigo de Jehová kyiʼj nabʼil tkuʼx toj Tyol Dios tiʼj mejebʼleʼn ex tiʼj divorcio. A Dios kubʼ bʼinchante mejebʼleʼn ex taj tuʼn tten chmilbʼaj junx tukʼil t-xuʼjil toj tkyaqil tanqʼibʼil. Oʼkx in tzaj tqʼoʼn Tyol Dios ambʼil te divorcio qa ma yaẍin chmilbʼaj ex qa xuʼjilbʼaj (Mateo 19:5, 6, 9).

 In che onin, kyxol qe onbʼil lu ateʼ jlu:

•   Qe uʼj. Kyoj uʼj lu ateʼ xnaqʼtzbʼil jaku che onin kyiʼj mejebʼleʼn, axpe ikx kyiʼj qeju in kubʼ kyximen qa ya mintiʼ jun tiʼ jaku bʼant kyuʼn. Jun techel, ateʼqe xnaqʼtzbʼil ik tzeʼn jlu: «Cómo fortalecer el sentido del compromiso en el matrimonio», «Cómo perdonar» ex «Cómo recuperar la confianza perdida».

•   Qe chmabʼil. Kyoj chmabʼil in che ok junjun seman ex kyoj asamblea, in qo xnaqʼtzane kyiʼj consej in tzaj tqʼoʼn Tyol Dios kye mejebʼleʼn.

•   Qe ansyan. Aʼyeju erman lu in che xqʼuqin tiʼj congregación ex in che onin kyiʼj mejebʼleʼn tuʼn kyxnaqʼtzan kyiʼj junjun texto toj Biblia ik tzeʼn Efesios 5:22-25.

 Nya. Jaku che onin ansyan kyiʼj mejebʼleʼn tuʼn t-xi kybʼinchaʼn tiʼj jun nya bʼaʼn in tzaj kyxol, pero mintiʼ kyoklen tuʼn t-xi kyqʼamaʼn kye tiʼ tuʼn tbʼant kyuʼn (Gálatas 6:5). Qa at jun ma tzʼel tdivorciarin tibʼ ex mintiʼ in tzaj tqʼoʼn Tyol Dios ambʼil te tuʼn tbʼant jlu tuʼn, mlay txi qʼoʼn jun toklen toj congregación ex mlay bʼant tuʼn tkubʼ mojeʼ juntl maj (1 Timoteo 3:1, 5, 12).

 In tzaj tqʼamaʼn Tyol Dios qa il tiʼj tuʼn kyten mejebʼleʼn junx, axpe ikx qa in che ok weʼ kywitz nya bʼaʼn (1 Corintios 7:10-16). Ateʼ junjun nya bʼaʼn jaku che kyaj toj ttxolil qa ma txi qqanin onbʼil te Dios, qa ma chex qbʼiʼn qe consej toj Biblia ex qa ma kubʼ qyekʼin qkʼujlabʼil tiʼj qukʼil (1 Corintios 13:4-8; Gálatas 5:22).

 Noqtzun tuʼnj, ateʼ junjun okslal o kubʼ kyximen tuʼn tel kypan kyibʼ tiʼj kyukʼil. ¿Tiquʼn? Tuʼnju in che bʼaj junjun nya bʼaʼn ik tzeʼn jlu:

•   Tuʼnju nya taj chmilbʼaj tuʼn tkʼaʼchin kyiʼj toj tja (1 Timoteo 5:8).

•   Tuʼnju in nok ten bʼyol tiʼj t-xuʼjil moqa tiʼj tchmil ex jaku kyim tuʼn (Salmo 11:5).

•   Aj tel qʼiʼn ambʼil te xuʼjilbʼaj moqa te chmilbʼaj tuʼn miʼn tajbʼen te Dios. Jun techel, bʼalo jaku tzʼok t-obligarin chmilbʼaj t-xuʼjil tuʼn miʼn t-xi tbʼiʼn qe kawbʼil tkuʼx toj Tyol Dios. Aj tok bʼinchaʼn jlu tiʼj xuʼjilbʼaj moqa tiʼj chmilbʼaj, jakulo kubʼ t-ximen tuʼn tel tpan tibʼ tiʼj tukʼil tuʼntzun t-xi tniman Dios ex mya kye xjal (Hechos 5:29).