¿Tiquʼn mintiʼ in cheʼx testigo de Jehová toj qʼoj?
Mintiʼ in qoʼxe toj qʼoj tuʼnju:
In xi qbʼiʼne Dios. Kyaj tqʼamaʼn Tyol Dios qa aqeju tmajen «kbʼajel kybʼinchaʼn kyspad tuʼn kyok te punt» ex «mlayx kykʼam juntl maj xnaqʼtzbʼil tuʼn tbʼant» kyqʼojin (Isaías 2:4).
In xi qbʼiʼne Jesús. Xi tqʼamaʼn Jesús kawbʼil lu te apóstol Pedro: «Qʼoʼn kuʼxa t-spadiya tuj tjayil. Porque kykyaqil qeju qʼiʼn spad kyuʼn, ax tuʼn spad che najel» (Mateo 26:52). Kyukʼil yol lu, kyaj tqʼamaʼnxix Jesús qa mintiʼ tuʼn tajbʼen kyuʼn t-xnaqʼtzbʼen aju kʼuxbʼil xol qʼaqʼ.
Ax ikx kyaj tqʼamaʼn Jesús qa aqeju t-xnaqʼtzbʼen «mya te twitz txʼotxʼ qe». Tuʼntzunju, mintiʼ tuʼn tokx kyqʼon kyibʼ kyxol aj kawil moqa tojju at toklen kyukʼil (Juan 17:16). Ax ikx nya bʼaʼn tuʼn tok kychmon kyibʼ ex tuʼn t-xi kyqʼamaʼn qa nya bʼaʼn aju in bʼant kyuʼn soldad nix tuʼn t-xi kyqʼamaʼn kye txqantl xjal tuʼn miʼn tokx kyqʼon kyibʼ kyxol soldad.
At qkʼujlabʼile kyiʼj txqantl xjal. Kyaj tqʼamaʼn Jesús lu kye t-xnaqʼtzbʼen: «Kxel nqʼoʼne jun akʼaj mandamyent kyeye: Tuʼn kykʼujlante kyibʼe kyxolxe» (Juan 13:34, 35). Ateʼ axix tok okslal twitz tkyaqil Txʼotxʼ, tuʼntzunju, mlay jaw kyiʼn kʼuxbʼil xol qʼaqʼ tuʼn kyqʼojin kyxolx (1 Juan 3:10-12).
Mintiʼtoq in cheʼx tnejel okslal toj qʼoj. In tzaj tqʼamaʼn jun uʼj qa «aʼyeju tnejel t-xnaqʼtzbʼen Jesús mintiʼtoq in che onin tiʼj qʼoj nix mintiʼtoq in cheʼx kyxol soldad», tuʼnju el kynikʼ tiʼj qa «mintiʼtoq toklen jlu tukʼil kʼujlabʼil kyaj t-xnaqʼtzaʼn Jesús ex tukʼil kawbʼil aju tuʼn tok qkʼujlaʼn qajqʼoj» (Encyclopedia of Religion and War). Ex toj uʼj Historia de la decadencia y caida del imperio romano, tzaj tqʼamaʼn aj tzʼibʼil Edward Gibbon jlu: «Mlay kubʼ qximin qa e ok okslal te soldad [...] mintiʼ kyaj kytzaqpiʼn jun aqʼuntl xjan otoq kyaj qʼamaʼn kye tuʼn tbʼant kyuʼn».
In qo onine tuʼn kyten txqantl toj tbʼanel
In nok tilil quʼne toj aqʼuntl ex mlayx tzʼok qbʼinchaʼne jun nya bʼaʼn tiʼj tnam jatumel in qo anqʼine. Axpe ikx in chex qnimane qe aj kawil at kyoklen, iktzun tten in che japun kawbʼil lu quʼne:
«Kynimane qe aj sanjelal te gobierni.» (Romanos 13:1.)
«Kyqʼonxe te gobierni aju te gobierni, ex kyqʼonxe te Dios aju te Dios.» (Mateo 22:21.)
Tuʼntzunju, in che japun kawbʼil quʼne, in xi qchjoʼne chojenj ex in qo onine kyiʼj kawbʼil tuʼn tten tbʼanel toj kojbʼil.