Aju in tzaj kyqʼamaʼn xjal: Mintiʼ in kubʼ kyikʼsaʼn testigos de Jehová Navidad tuʼnju mintiʼ in nok qeʼ kykʼuʼj tiʼj Jesús.

 Aju axix tok: Okslal qoʼye ex qʼuqli qkʼuʼje qa oʼkx tuʼn Jesucristo jaku qo klet (Hechos 4:12).

Aju in tzaj kyqʼamaʼn xjal: In kubʼ kypaʼn testigos de Jehová qe ja xjal aj t-xi kyxnaqʼtzaʼn kye xjal qa mintiʼ tuʼn tkubʼ kyikʼsaʼn Navidad.

 Aju axix tok: Nim kyoklen ja xjal toj qwitze; in nokpe tilil quʼne tuʼn kyxi qʼet tbʼanel xnaqʼtzbʼil kye tuʼn miʼn tkubʼ kypan kyibʼ.

Aju in tzaj kyqʼamaʼn xjal: Mintiʼ in che tzalaj toj Navidad quʼn tbʼanel ambʼil lu, atz jatumel in chex qʼet oyaj, at mujbʼabʼil ex at tzalajbʼil toj ambʼil lu.

 Aju axix tok: In nok tilil quʼne tuʼn qtene bʼaʼn kyukʼil kykyaqil ex in xi qqʼoʼne oyaj toj alkyexku ambʼil toj abʼqʼi (Proverbios 11:25; Romanos 12:18). Jun techel tiʼj jlu, mintiʼ in xi qqanine pwaq kyoj qchmabʼile ex mintiʼ in xi qqanine tuʼn qtzaj chjoʼne tuʼn qexe pakbʼal, tuʼnju in japun quʼne aju kyaj tqʼamaʼn Jesús: «Noq kukx ma kykʼame kyoklene lu, ax ikx aju ma txi nmaʼne kyeye, noq kukx kybʼinchame» (Mateo 10:8). Ax ikx in qo pakbʼane qa oʼkx Tkawbʼil Dios ok tzul tiʼn mujbʼabʼil (Mateo 10:7).

•   Tuʼnju kyaj tqʼamaʼn Jesús tuʼn tkubʼ ikʼset tkyimlen ex nya aju titzʼjlen (Lucas 22:19, 20).

•   Tuʼnju mintiʼ kubʼ kyikʼsaʼn t-apóstol Jesús nix qe tnejel t-xnaqʼtzbʼen aju Navidad. Ik tzeʼn in tzaj tqʼamaʼn pujbʼil yol Diccionario del cristianismo, aju ninqʼij lu «tzaj qʼamaʼn tuʼn tkubʼ ikʼset atz toj tnam Roma toj abʼqʼi 330» tiʼj ambʼil iqʼen quʼn jaʼlo, tej otoqxi tzikʼ mas te kabʼe syent abʼqʼi tkyimlen mankbʼil apóstol.

•   Tuʼnju mintiʼ yekʼbʼil at qa ul itzʼj Jesús toj 25 te diciembre; ex mintiʼ in tzaj tqʼamaʼn Tyol Dios alkye tajlal xjaw ul itzʼji.

•   Tuʼnju in nel qnikʼe tiʼj qa nya bʼaʼn in nela Navidad toj twitz Dios, tuʼnju atz tzajni tiʼj kykostumbr ex kybʼinchbʼen xjal nya okslal (2 Corintios 6:17).

 Ateʼ xjal ojtzqiʼn kyuʼn qa mintiʼ in tzaj tqʼamaʼn Tyol Dios tuʼn tkubʼ ikʼset Navidad ex qa tzajni kyxol xjal nya okslal, noqtzun tuʼnj, kukx in kubʼ kyikʼsaʼn tuʼnju in kubʼ kyximin qa nya jun il nim toklen lu ex qa mintiʼ tajbʼen qa qjunalx mintiʼ in kubʼ qikʼsaʼn atzun kye txqantl in kubʼ kyikʼsaʼn.

 In qo tzaj tonin Tyol Dios tuʼn tajbʼen qnabʼil quʼn tuʼn tkubʼ qximin tiʼ kbʼantel quʼn (Romanos 12:1, 2). Ax ikx in qo tzaj t-xnaqʼtzaʼn tuʼn tel qnikʼ qa nim toklen axix tok (Juan 4:23, 24). Nya a t-xilen jlu qa mintiʼ tajbʼen aju in kubʼ kyximin txqantl qiʼj, noqtzun tuʼnj, ax ikx nya tuʼn jlu mlay che okx qbʼiʼn tkawbʼil Dios noq tuʼnju nya qaj tuʼn qok te junxitl kywitz txqantl.

 Ax tok mintiʼ in kubʼ qikʼsaʼne Navidad, noqtzun tuʼnj, teyelex te junjun tzaqpiʼn taʼ tuʼn tkubʼ t-ximin tiʼ kbʼantel tuʼn. Tuʼntzunju, mintiʼ in xi qqʼamaʼne nix te jun xjal tuʼn miʼn tkubʼ tikʼsaʼn.