Aj in tzaj qʼoʼn pwaq te onbʼil, in najbʼen quʼne tuʼn tbʼant junjun aqʼuntl ex tuʼn qonine kyiʼj xjal. In nok tilil quʼne tuʼn kyok xjal te t-xnaqʼtzbʼen Jesús ex atzun jlu mas nim toklen toj qwitze (Mateo 28:19, 20).

 Mintiʼ in najbʼen pwaq in tzaj qʼoʼn te oyaj tuʼn qoke te qʼinun. Ax ikx, mintiʼ in xi chjoʼn twi tkʼuʼj jun testigo de Jehová aj tpakbʼan ttziyele ja nix qeju in che kubʼ nej twitz aqʼuntl. Ex mintiʼ in xi chjoʼn twi kykʼuʼj qeju in che ajbʼen toj nim ambʼil ik tzeʼn qeju in che ajbʼen kyoj sucursal, toj kytxuylal ninja qʼil twitz aqʼuntl ex nya chjoʼn twi tkʼuʼj Kʼloj Xjal Qʼil Twitz Aqʼuntl kye testigo de Jehová.

•   In che etz onbʼil tiʼj Tyol Dios: Tkyaqil abʼqʼi in bʼaj traducirit, in netz imprimirit ex in chex sipet nim millón Biblia. Ax ikx, in che etz uʼj in che yolin tiʼj Biblia ex noq kukx in xi qʼet kye xjal. Nya oʼkxju, ax ikx in che jax qʼoʼn qe uʼj toj qtembʼile te internet jw.org ex toj aplicación JW Library, noq kukx qe onbʼil lu ex mintiʼ in che etz anuncio kyoj.

•   In che bʼinchet ja te kʼulbʼil ex in che bʼaj bʼinchaʼn chʼintl: Twitz tkyaqil Txʼotxʼ in che jaw bʼinchaʼn qe ja tuʼn qajbʼene te Dios ex in che bʼaj bʼinchet chʼintl. Noq tuʼn jlu, ateʼ tbʼanel ja tuʼn tok qchmon qibʼe tuʼn qkʼuline te Dios. Ax ikx in che jaw qbʼinchaʼne qe sucursal, qe oficina te traducción ex in che ok qxqʼuqine. Noq kukx in bʼant aqʼuntl lu tuʼnju mintiʼ in xi chjet twi kykʼuʼj qeju in che onin ex tuʼn jlu mintiʼ in xi najset nim pwaq.

•   In chex chjet junjun tiʼchaq: In che ajbʼen donación tuʼn t-xi qʼet jun onbʼil kye superintendente ex tuʼn kybʼant junjun aqʼuntl toj kytxuylal ninja qʼil twitz aqʼuntl, kyoj sucursal ex kyoj oficina te traducción.

•   In xi pakbʼet Tyol Dios: Ni jun testigo de Jehová in xi tqanin tuʼn t-xi chjoʼn aj t-xi tqʼoʼn xnaqʼtzbʼil kye xjal tiʼj Tyol Dios moqa aj tpakbʼan (2 Corintios 2:17). Noqtzun tuʼnj, ik tzeʼn bʼaj toj tnejel syent abʼqʼi, o txi qʼet xnaqʼtzbʼil kye junjun testigo de Jehová ex in che pakbʼan toj tkyaqil ambʼil. Tuʼntzunju, in xi jyet jun lugar jatumel tuʼn kyanqʼin ex in xi qʼet chʼin pwaq te onbʼil kye (Filipenses 4:16, 17; 1 Timoteo 5:17, 18).

•   In xi qʼet xnaqʼtzbʼil: Ax ikx in che ajbʼen donación tuʼn kyok asamblea, tuʼn kybʼant video ex qe audio. In xi qʼet xnaqʼtzbʼil kye ansyan ex kye qeju in che ajbʼen toj tkyaqil ambʼil tuʼntzun tbʼant jun tbʼanel aqʼuntl kyuʼn.

•   In xi qʼet onbʼil: Aj ttzaj xitbʼil tuʼnx twitz txʼotxʼ moqa kyuʼn xjal, in qo onine tuʼn t-xi qʼet wabʼj, aʼ ex jun lugar jatumel tuʼn kyanqʼin qeju otoq tzaj nya bʼaʼn kyiʼj. In xi qʼet onbʼil lu kye qermane ex kye xjal nya testigo de Jehová (Gálatas 6:10).