Aju txʼolbʼabʼil kyiʼj testigos de Jehová toj ambʼil jaʼlo tzaj tzyet chʼixtoq tkubʼ bʼaj syent abʼqʼi 1800. Kyoj qeju abʼqʼi lu, attoq jun kʼloj xnaqʼtzal tiʼj Tyol Dios toj tnam Pittsburgh (Pensilvania, Estados Unidos) kubʼ kyximin tuʼn ttzaj tzyet tuʼn kyxnaqʼtzan tojxix ttxolil tiʼj Tuʼjil Tyol Dios. Toj xnaqʼtzbʼil lu, kubʼ kymojbʼan kyxnaqʼtzbʼil txqantl okslabʼil tukʼilju in tzaj t-xnaqʼtzaʼnxix Tyol Dios. Tej tbʼet ambʼil xi kyqʼamaʼn kye txqantl xjal aju el kynikʼ tiʼj. Etz uʼj kyuʼn, kubʼ kytzʼibʼen junjun xnaqʼtzbʼil kyoj periódico ex kubʼ kybʼinchaʼn uʼj aju tok tbʼi jaʼlo Aju Xqʼuqil Qʼol tqanil tiʼj Tkawbʼil Jehová.

 Jun kyxol qeju xnaqʼtzal tiʼj Tyol Dios atoq tbʼi Charles Taze Russell. Tzaj tzyet tuʼn tkubʼ ttzʼibʼen uʼj Aju Xqʼuqil ex kubʼ nej tuʼn t-xi qʼet xnaqʼtzbʼil tiʼj Tyol Dios, noqtzun tuʼnj, nya tuʼn tzaj tzyet jun akʼaj okslabʼil. Aju tajtoq Russell kyukʼe txqantl Xnaqʼtzal tiʼj Tyol Dios (aju kybʼi ok kyqʼoʼn) aju tuʼn t-xi xnaqʼtzet kye xjal aʼyeju xnaqʼtzbʼil kyaj t-xnaqʼtzaʼn Jesucristo ex kyajtoq tuʼn kyok lepeʼxix tiʼjju alkye tten nukʼun ttnam Dios toj tnejel syent abʼqʼi. Ex tuʼnju a Jesús tzaj tzyunte okslabʼil, in nel qnikʼe qa tuʼn Jesús tzaj tzyet qokslabʼile (Colosenses 1:18-20).