In nok qeʼ kykʼuʼj tiʼj. Toj kywitz testigo de Jehová «tkyaqil aju tzʼibʼan tuj Tuʼjil, a Dios o qʼmante ex at tajbʼen te xnaqʼtzbʼil qe» (2 Timoteo 3:16). At tajbʼen Ojtxi Tuʼjil ex Akʼaj Tuʼjil. Tuʼn miʼn tkubʼ kyximin xjal qa aju Ojtxi Tuʼjil ya mintiʼ tajbʼen, tuʼntzunju, in nok kyqʼoʼn testigo de Jehová tbʼi te aʼyeju uʼj e kubʼ tzʼibʼin toj yol hebreo. Atzunju tbʼi Akʼaj Tuʼjil in nok tbʼi te aʼyeju uʼj e kubʼ tzʼibʼin toj yol griego.

 Onin Dios tiʼj apóstol Pablo tuʼn tkubʼ ttzʼibʼin jlu: «Tkyaqil aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe» (Romanos 15:4). Tuʼntzunju, qʼuqlixix qkʼuʼje qa kyoj uʼj e kubʼ tzʼibʼin toj yol hebreo tkuʼx tqanil nimxix toklen. Tkuʼx tbʼanel nabʼil ex junjun tiʼ bʼaj ojtxi ex nim kyoklen qe toj ambʼil jaʼlo.

•   Junjun tiʼ bʼaj ojtxi. In tzaj kychikʼbʼaʼn uʼj e kubʼ tzʼibʼin toj yol hebreo tzeʼnxix bʼaj tbʼinchaʼn Dios Txʼotxʼ ex alkye tten kyaj ten xjal tjaqʼ il. Tuʼn jlu in nel qnikʼ jatumel tzajni qoʼ ex tiquʼn in qo kyim (Génesis 2:7, 17). Ax ikx tzalu in nok qbʼiʼn alkye tten onin Dios kyiʼj qeju e ajbʼen te toj ambʼil ojtxi tej kyok weʼ twitz junjun tiʼ ikxix tzeʼn qe in qo ok weʼ toj ambʼil jaʼlo (Santiago 5:17).

•   Tbʼanel nabʼil. Kyxol qeju uʼj ateʼkux kyoj uʼj e kubʼ tzʼibʼin toj yol hebreo tkuʼx Proverbios ex Eclesiastés ex ateʼkux tbʼanel nabʼil kyoj tuʼn qanqʼin toj ambʼil jaʼlo. In tzaj kyqʼamaʼn tzeʼn jaku qo tzalaj kyukʼil toj qja (Proverbios 15:17), alkye tten jaku ten jun tbʼanel qxim tiʼj aqʼuntl (Proverbios 10:4; Eclesiastés 4:6) ex alkye tten jaku tzʼajbʼen qkuxumal toj tumel (Eclesiastés 11:9-12:1).

 Ax ikx tbʼanel qa ma qo xnaqʼtzan tiʼj tley Moisés ik tzeʼn in tzaj qʼamaʼn toj Torá, moqa toj Pentateuco (aʼyeju tnejel 5 uʼj ateʼkux toj Tyol Dios). Nya il tiʼj tuʼn tjapun ley kyuʼn okslal, noqtzun tuʼnj, jaku qo tzaj kyonin tbʼanel xnaqʼtzbʼil ateʼkux toj tuʼn qtzalaj (Levítico 19:18; Deuteronomio 6:5-7).