Nya sionista qoʼye. Okslal qoʼye ex in che jatz qxnaqʼtzbʼile toj Tuʼjil Tyol Dios. At junjun okslabʼil in nok qeʼ kykʼuʼj tiʼj junjun xnaqʼtzbʼil ateʼkux toj Xjan Uʼj aju in tzaj kyyekʼun qa kʼokel kychmon kyibʼ Judiy toj tnam Palestina, noqtzun tuʼnj, nya ik qeye qximju. Mintiʼ in nok qeʼ qkʼuʼje tiʼjju qa in tzaj tqʼamaʼn Tyol Dios qa kjapunel twiʼ jlu tuʼn jun kʼloj aj kawil. Mintiʼ in nonin Tyol Dios tiʼj kykawbʼil xjal nix mintiʼ in tzaj tqʼamaʼn qa mas nim toklen jun kyyajil xjal twitz juntl. O tzaj tqʼamaʼnxix uʼj Aju Xqʼuqil, aju in netz kyuʼn testigos de Jehová, qa aju «mintiʼ in nonin Tyol Dios tiʼj sionismo».

 In tzaj tqʼamaʼn Encyclopædia Britannica qa aju sionismo «jun kyxim aj Judiy aju kyaj tuʼn tten jun kykawbʼil toj tnam Palestina». At toklen jlu tukʼil kyokslabʼil aj Judiy ex kyukʼil aj kawil. Mintiʼ in qo onin qeye tiʼj xnaqʼtzbʼil lu aju at toklen tukʼil kyokslabʼil aj Judiy nix mintiʼ in nokx qqʼoʼn qibʼe tukʼil tkyaqilju at toklen tukʼil kysionismo aj kawil.

 Okslal qe testigos de Jehová ex mintiʼ in che onin tiʼj junjun ximbʼetz at toklen kyukʼil aj kawil, axpe ikx tukʼilju at toklen tukʼil sionismo. Ojtzqiʼn qwitze qa mintiʼ in nokx qqʼon qibʼe toj tkyaqilju at toklen kyukʼil aj kawil, ex tuʼntzunju, o tzʼok bʼinchaʼn nim nya bʼaʼn qiʼje toj junjun tnam. Qʼuqlixix qkʼuʼje qa ni jun aj kawil ex ni jun kʼloj xjal tzul tiʼn tzalajbʼil te jumajx tzalu twitz Txʼotxʼ. Aju kawbʼil ok tzul tiʼn tkyaqil jlu oʼkx aju Tkawbʼil Dios.

 Aju tbʼanel kawbʼil in nonin qiʼje, ex noq jatumel in qo anqʼine, aju tuʼn kyxi qbʼiʼne kykawbʼil aj kawil. Mi jun qeye in xiʼ toj qʼoj ex kukx in chex qbʼiʼne qe aj kawil.