Kukx in qo yoline kyukʼil qeju mintiʼ in che ex pakbʼal ex mintiʼ in nok kychmon kyibʼ ex otoqxi jaw aʼ kywiʼ. Aju in bʼant, in nok tilil quʼne tuʼn tok juntl maj tilil kyuʼn tuʼn tten kyamiwbʼil tukʼil Dios ex in qo onine kyiʼj tuʼn kymeltzʼaj juntl maj.

 Qa at jun testigo de Jehová ma kubʼ tbʼinchaʼn jun il, jaku tzʼex lajet toj ttnam Dios. Noqtzun tuʼnj, nya noq kukx in nex lajet. Qa ma naqʼet xjal tuʼn miʼn kyjapun qe kawbʼil ateʼkux toj Tyol Dios tuʼn ex mintiʼ in najtz tiʼj tanmi, in nex lajet, ex ya miʼn che yolintl qeju ateʼkx toj ttnam Dios te xjal. In tzaj tqʼamaʼnxix Tyol Dios jlu: «Aju xjal bʼinchal mya bʼaʼn, kyiʼmele kyxole» (1 Corintios 5:13).

 ¿Tiʼ in bʼaj qa ma tzʼex lajet jun chmilbʼaj, ex atzun t-xuʼjil ex qe tkʼwaʼl kukx testigo de Jehová qe? Ax tok ma tzaj nya bʼaʼn kyxol tuʼn jlu, noqtzun tuʼnj, kukx jun ja xjal qe. Kukx chmilbʼaj te xjal te t-xuʼjil, ex kukx mambʼaj te xjal kye tkʼwaʼl, ik tzeʼn naʼmxtoq tex lajet.

 Aʼyeju o che ex lajet kukx jaku che bʼet kyoj chmabʼil ex, qa kyajbʼil, jaku txi qʼet onbʼil kye aju in xi kyqʼoʼn ansyan. Aju qaje aju tuʼn tok tilil kyuʼn juntl maj tuʼn kyjapun qeju kawbʼil ateʼkux toj Tyol Dios kyuʼn tuʼn kyok juntl maj te testigo de Jehová. Qa in nel kyikʼen qeju o che ex lajoʼn tkyaqil nya bʼaʼn ex in kubʼ kyyekʼunxix qa kyajbʼil tuʼn kyanqʼin ik tzeʼn in tzaj tqʼamaʼn toj Tyol Dios jaku che meltzʼaj juntl maj tuʼn kyten junx kyukʼil qeju ateʼkx toj ttnam Dios.