Mai. Ningalani chjotale Cristo maijin xi testigole Jeobá ʼminajin, ali tsa protestantejin je relijiónnajin. Ánni nga maisíni.

 Nkjín chjota xi kʼoatso nga je relijión xi protestante ʼmi jéní xi bʼasjengi jmeni xi bakóya je Iglesia Católica Romana. Kʼoa ningalani kʼoati nkjín koya chʼasjengijin jmeni xi bakóya relijión jebi, ali tsa protestantejinjin. Jaola koya kataʼyaa anni:

1.   Nkjín koya jmeni xi bakóya je relijión Protestante xi kontra tíjnale jotso Biblia. Tobʼelañá, je Biblia kʼoatso nga “jngo mani Niná”, ali tsa kʼoajin tso nga Trinidad (1 Timoteo 2:5; Juan 14:28). Xi ijngosani, ninga kʼoalani tso nga kjoañʼai tsjoále Niná je chjotatsʼen, alikui kʼoatso tsa ya jña lʼí títi sikjaʼákon ngantsjai nichxin, tokui xi tso nga tondiaa sikjeson je chjotatsʼen (Salmo 37:9; 2 Tesalonicenses 1:9).

2.   Ali tsakuijin xi menajin nga katabʼantjaiya je Iglesia Católica kʼoa tsa je relijión xi kjaʼaí. Je xi menajin kuinga koakoyasuinjin je énnda chjotse xi tʼatsʼe Chjotaxále Niná kʼoa nga kuinyakoaijin chjota nga katamakjainle xi tʼatsʼe énnda chjotse jebi (Mateo 24:14; 28:19, 20). Ali tsakuijin tifasjaijin nga si̱kʼantjaiyaijin je relijión xi tjío. Xi menajin kuinga koakoyalaijin je chjota xi mele kjuinrʼoé jokjoantjínni xi tʼatsʼe Niná kao Biblia (Colosenses 1:9, 10; 2 Timoteo 2:24, 25).