Je Escrituras Griegas Cristianas xi tsʼe Traducción del Nuevo Mundo kʼiaa kitjo títjon nga nó 1950. Saʼnda nga kʼia, tjínkʼa xi kʼoatso anni nga tsín mangósonsíni Biblia jebi kao xi kjaʼaí Biblia. Kʼoa saʼnda kʼoasʼin síkjaʼaitsjen tsa tsín ndatjín. a Kataʼyala ánni nga tsín mangósonsíni kao xi kjaʼaí Biblia.

•   Yaa kitjoeni xo̱n xi ñaki kʼoatjío. Kʼianga kisʼenda je Traducción del Nuevo Mundo nga én inglés kui koanchjén je xo̱njchá xi ngisasa kjoatse kjio kʼoa xi ñaki kʼoatjín jmeni xi tso. Tonga kʼianga kisʼenda je Biblia xi King James Version ʼmi (Versión del Rey Jacobo) nga nó 1611 alikui ñaki ndatjío je xo̱n xi koanchjén kʼoa alikui kui koanchjén xi jenʼio kjoatse kjio.

•   Ñaki kʼoatjín jotso. Je xi kisikʼatoya Traducción del Nuevo Mundo tsakʼénele yaole nga kʼoakjoansʼin kisikʼatoya je Énle Niná josʼin kitsole xi kiski je Biblia (2 Timoteo 3:16). Je chjota xi síkʼatoya Biblia sakʼoaa ngisa kui fitʼale kostumbre xi tjín tikʼoajinni nga ñaki kʼoakʼoe jotso je Énle Niná. Tobʼelañá, tjíofaʼáxin je jaʼaínle Niná nga Jeobá ʼmi kʼoa kui tjíobatíoyangajaole xi Niná kʼoa Señor tso.

•   Me xki̱ én jaʼatoya. Nʼio nkjín Biblia xi jetokʼoatjío josʼin koanjinle je xi kisikʼatoya, xi tsonile, nga tsakjaʼáxinle én xi nʼio chjíle kʼoa tsa kjaʼaí kjoafaʼaitsjen tsakʼétʼasonje̱. Tonga je Traducción del Nuevo Mundo me xki̱ én jaʼatoya nga tonga ndakjoanni koa̱njinná jotso kʼoa nga tsín kʼoeʼma jokjoansʼin tínchja̱ni saʼnda nga títjon.

 Libro xi tsín faʼaitʼa. Je Biblia xi síchjén Iglesia Católica kao xi Iglesia Ortodoxa ʼmi kui faʼaitʼa je libro xi tsín tʼatsʼe Niná kinroani, libro xi tsín tsʼe Niná sʼin tsabekon chjota judío. Libro xi tsín ya maxki̱kao je Escrituras Hebreas. Kʼoa jé chjota judío tsakʼaile “je énle Niná [...] nga koa̱ntjaole” (Romanos 3:1, 2). Kuinga ndatjínsíni nga tsínle libro jebi je Traducción del Nuevo Mundo kao Biblia xi sʼa tjíosʼenda.

 Bersíkulo xi tsín faʼaitʼa. Tjínkʼa Biblia xi skan kisʼetʼason én xi faʼaitʼa kʼoa tsa maije̱ bersíkulo kisʼetʼason, xi tsín ya tjíotʼa je xo̱njchá xi kjio saʼnda kjoatse. Nichxin xi tiyoaa ndʼaibi, nʼio nkjín Biblia tjín, jolani tsa Traducción del Nuevo Mundo xi tsín bʼétʼasonle én jebi, kʼoa tsa tjíotʼale kʼoatso nga tsín ya kitjoeni je xo̱njchá xi kjio. b

 Je én xi síchjén. Sakʼoaa likui kʼoakjoansʼin faʼatoya jokjoansʼin tínchja̱ni je én kʼianga xki̱ én faʼatoya. Tobʼelañá, jmeni xi kitso je Jesús ya Mateo 5:3 tjínkʼa xi i̱sʼin síkʼatoya: “Jó tondale je xi yo̱ma̱ kjiayakon” (Nuevo Testamento en mazateco de Huautla de Jiménez, Oax., Biblia de Jerusalén, Nácar-Colunga, Reina-Valera kao Torres Amat). Nga xki̱ én jaʼatoya je xi “yo̱ma̱ kjiayakon” tso alikui nda majinná. Tjínkʼa xi kʼoasʼin majinle nga kui xi kitsole Jesús nga ma̱ sʼin si̱jchá yaoná kʼoa tsa maije̱ nga nangitokon koaan. Tonga je xi kitsole Jesús kuinga tsjoa sʼe̱le ʼyani xi skoe̱ nga machjénle xi tʼatsʼe Niná. Je Traducción del Nuevo Mundo ngisa ndasʼin síkʼatoya én xi kitso Jesús. Isʼin kisikʼatoya: “Je xi be nga machjénle tʼatsʼe Niná”. c

•   Jngo karta kisʼenda nga 8 sá diciembre xi tsʼe nó 1950, jngo chjota xi kisikʼatoya xi kjaʼaí én kʼoa xi nʼio chjine koan xi tʼatsʼe Biblia je xi Edgar J. Goodspeed tsakʼin i kitso xi tʼatsʼe Traducción del Nuevo Mundo xi tsʼe Escrituras Griegas Cristianas: “Nʼio mandosinna je xá xi tjíosʼín je jtín xi tiyojion, kʼoa jokji nganʼio tísʼele jngo tjíjtsa Sonʼnde, kʼoa nʼio tsjoa sʼena josʼin nikʼatoyao je én, je Bibliano tjínle nganʼio kʼoa nda majinná. Nʼio tse kjoachjine tjínno josʼin chotʼayao kʼoa lijme xi jao sʼena”.

•   Je profesor Allen Wikgren, xi ya tsakakóya ya Universidad de Chicago, kʼoakitso nga Traducción del Nuevo Mundo kui síchjén je én xi machjén ndʼaibi xi tsínla kjaʼaí Biblia fasjaijiaan kʼoa kʼoakitso nga nʼio ndasʼin faʼaitʼa jmeni xi tso (The Interpreter’s Bible, volumen I, pájina 99).

•   Xi tʼatsʼe Traducción del Nuevo Mundo de las Escrituras Griegas Cristianas, je Alexander Thomson xi Gran Bretaña tsʼe, xi kui nchja̱ni tʼatsʼe Biblia i kitso: “Je xi kisikʼatoya Biblia jebi nʼio chjine kʼoa tsakʼénele yaole nga ñaki kʼoakjoánsʼin kisikʼatoya én inglés jotso én griego” (The Differentiator, abril de 1952, pájina 52).

•   Kʼianga jekisikʼaxki̱ kʼa bersíkulo xi tsʼe Biblia xi kʼoasʼin síkjaʼaitsjen nga kjaʼaísʼin jaʼatoya xi kjaʼaí Biblia, je teólogo Charles Francis Potter i kitso: “Je grupo xi kisikʼatoya ñaki nʼio nda kisikʼatoya kʼoa nʼio kisinkjínle kon jotsakʼé kʼianga kisikʼatoya je xo̱njchá xi kjio xi én griego kʼoa én hebreo tjítʼa”. (The Faiths Men Live By, pájina 300).

•   Nga kiski xi tʼatsʼe Traducción del Nuevo Mundo, je Robert M. McCoy kʼoakitso nga ninga tjínle én xi toje Biblia jebi síchjén kʼoati nʼio ndatjín. Itso én xi kisikjetʼani: “Je Nuevo Testamento [xi kisikʼatoya je testigole Jeobá] kui bakó nga tjínle chjotachjine jtín jebi xi male nda bʼéndajin je kjoa xi sʼe kʼianga faʼatoya je Biblia” (Andover Newton Quarterly, enero 1963, pájina 31).

•   Ninga tsín kisasenle je maestro xi Samuel MacLean Gilmour josʼin jaʼatoya kʼa bersíkulole Traducción del Nuevo Mundo kʼoakitso nga je xi kisikʼatoya “nʼio nda be josʼin tsoyanile én griego” (Andover Newton Quarterly, septiembre 1966, pájina 26).

•   Kʼianga kinchja̱ni tʼatsʼe Traducción del Nuevo Mundo xi ya jaʼaitʼa je xo̱n xi xki̱ én jaʼatoya xi tsʼe Escrituras Griegas Cristianas (Kingdom Interlinear Translation of the Greek Scriptures), je maestro xi Thomas N. Winter tsakʼin, kitso: “Je comité xi kisikʼatoya ñaki kʼoasʼin kisikʼatoya josʼin nokjoa ndʼaibi, ñaki yʼa yaole xínkjín je én xi kisichjén kʼoa ñaki kixi jaʼatoya” (The Classical Journal, abril-mayo 1974, pájina 376).

•   Nga nó 1989, je Benjamin Kedar-Kopfstein, xi maestro ma kʼoa xi kui kotʼayason én hebreo ya Israel i kitso: “Kʼianga kotʼayasoan je én hebreo xi kichjini Biblia kʼoa jmeni xi jaʼatoya én jebi, kui kotʼa kjitʼa je Traducción del Nuevo Mundo xi én inglés tjítʼa. Kʼianga kotʼa Biblia jebi ʼbeña nga ñaki tsakʼénele yaole je chjota xi kisikʼatoya nga nda koanjinle én xi kisikʼatoya”.

•   Jason David BeDuhn, maestro xi kotʼaya tʼatsʼe relijión ñajan Biblia xi én inglés nroatʼa xi nʼio ʼyale kiskotʼayason kʼoa i kitso: “Je Traducción del Nuevo Mundo kui xi ngisasa kʼoasʼin jaʼatoya tikʼoajinni je xi ngikʼa Biblia xi kiskotʼayasoan”. Kʼoa ninga je chjota kʼoa kao chjota biblista kʼoatso nga je xi kisikʼatoya Biblia jebi kui kini jmeni xi makjainle, je chjota xi BeDuhn ʼmi i kitso: “Nga tsín mangóson kao xi kjaʼaí Biblia tokuiní nga ñaki kʼoakjoansʼin jaʼatoya, Biblia jebi ñaki kʼoasʼin jaʼatoya kʼoa me xki̱ én jaʼatoya je én xi kichji Nuevo Testamento” (Truth in Translation, pájina 163 kao 165).