Mai. Jin xi testigole Jeobá maijin ali tsa sectajin je religiónnajin. Chjotale Cristo maijin kʼoa bʼenelaijin yaonajin nga mangíntjenngijin je choa̱le Jesús kʼoa nga kʼoasʼin mangínkoaijin yaonajin josʼin tsakakóya.

 Kjaʼaí kjaʼaí tso chjota xi tʼatsʼe secta. Jaola koya kataʼyaa kʼoa kataʼyala ánni nga tsín sectasíni je testigole Jeobá.

•   Tjínkʼa xi kʼoatso nga je xi secta ʼmi kui jngo religión xi sʼa chjotse kʼoa tsa xi tsínkui kʼoasʼín josʼín je xi ngikʼa. Jin xi testigole Jeobá maijin ali tsa jinjin tsakʼenda chjotsaijin je religiónnajin. Kui mangíntjenngijin je choa̱le chjotale Cristo xi títjon tsakatio, kʼoa yaa Biblia faʼaitʼa jmeni xi kisʼin kʼoa jmeni xi tsakakóya (2 Timoteo 3:​16, 17). Ñaki kʼoasʼin makjainnajin nga toya Biblia tsoya josʼin tjínnele jchaxkón Niná.

•   Tjínkʼa xi kʼoatso nga xkón je xi secta ʼmi kʼoa nga chjota je xi séntítjonle. Jin xi testigole Jeobá maijin ali tsa chjotajin xi ngʼajko̱ tíjnanajin, kui mangíntjenngijin jmeni xi kitsole Jesús je chjotale: “Tojngo je xi ngʼajko̱no, je Cristo” (Mateo 23:10).

 Je religiónnajin nda síkatíonajin kʼoa kʼoati nda síkatío je chjota xi kjaʼaí. Tobʼelañá, je Énle Niná xi bakoyaijin jenʼio nkjín chjota tjíobinyakao nga tjíosíkatío tsa xán kʼoa tsa droga. Xi ijngosani, kʼoati bakoyalaijin xo̱n je chjota nga katamale josʼin sʼexkia kʼoa josʼin chji. Kʼoa jemiyón mani chjota xi jemale kji kʼoa jemale bʼéxkia nga tibinyakoaijin. Kʼoati bʼainganʼiuijin tojñani nga kjoaxkón sʼe. Bʼenelaijin yaonajin nga nda mangínkoaijin chjota josʼin tsakakóya Jesús (Mateo 5:​13-​16).