Jotso chjota: Kuinga tsín chjotale Cristo ma je testigole Jeobá nga tsín síkjaʼaitsjenyani kʼianga faʼáyale Cristo.

 Jotjínni: Makjainnajin nga je Jesucristo xi bʼasjentjainá kʼoa bʼenelaijin yaonajin nga mangíntjenngijin “josʼin tsakʼamje nga je” (1 Pedro 2:21; Lucas 2:11).

 Jotso chjota: Alikui makjainno tsa jaʼáyale Jesús.

 Jotjínni: Makjainnajin nga jaʼáyale je Jesús. Xi ijngosani, ñaki kʼoatjío tokuinjin nga kui jebi xi tíjnatítjon kʼianga chjotale Cristo maa. Kʼoa kuisa xi ngisa nʼio nokjoanijin kʼianga ʼmiyasuinjin (1 Corintios 15:3, 4, 12-15).

 Jotso chjota: Bʼéchjoale je xtile nga bʼétsaojin kʼianga sʼuí bitjo.

 Jotjínni: Tsjoachaníjin je ʼndíxtinajin kʼoa bʼenelaijin yaonajin nga bakoyalaijin kʼoa kui xi menajin nga tsjoa katasatío kon (Tito 2:4).

•   Alikui ya Biblia bʼangini jmeni xi sʼín kʼa naxinandá kʼianga síkjaʼaitsjenya nga faʼáyale Cristo.

•   Je Jesús kʼoasʼin tsakʼéne nga katafaʼaitsjenya je kjoabiyale, ali tsa kuijin je kjoafaʼáyale. Jin xi testigole Jeobá maijin xki̱ nó nikjaʼaitsjenyaijin je kjoabiyale Cristo tojosʼin tjín je calendario xi koanchjén nga nichxinle chjota judío (Lucas 22:19, 20).

•   Majinnajin nga je kostumbre xi tjenkao nichxin nga faʼáyale Cristo, nʼio nkjín koya xi ya jaʼaini jmeni xi kisʼin je chjota xi tsín Niná tsabexkón nichxin kjoatse, kʼoa jebi alikui sasénle Niná. Nga̱ je Niná itso: “Toʼankjoan kataʼyaxkónna”. Kʼoa jti male kʼiatsa kui kʼoasʼiaan jmeni xi jtike xi ya nroani relijión ndiso (Éxodo 20:5; 1 Reyes 18:21).

 Ñaki kʼoatjío tokuijin nga ya Biblia faʼaitʼa anni nga tsín nikjaʼaitsjenyanijin nichxin nga faʼáyale Cristo. Kʼoa je Biblia kʼoatsoná nga si̱chjén je “kjoachjine” kʼoa kao kjoafaʼaitsjenná, ʼndele nga tokui kjuintjenngiaa josʼín je chjota (Proverbios 3:21; Mateo 15:3). Ñaki kao kjoatsjoa ʼmiyalaijin chjota kʼianga kjonanginajin xi tʼatsʼe josʼin makjainnajin kʼoa ʼyaxkónníjin nga tiʼndele chjota nga je skoéjin jmeni xi mele sʼin (1 Pedro 3:15).