Jin xi testigole Jeobá maijin kui mangíntjenngijin jotso je Biblia josʼin nikjaʼaitsjenyaijin je kjoabiyale Cristo, xi kʼoati Cenale Nainá ʼmile (1 Corintios 11:20). Tonga je kjoamakjain xi tjínle kʼoa kao kostumbre xi tjínle xi kjaʼaí relijión tʼatsʼe Cenale Nainá alikui ya bʼangini jotso je Biblia.

 Kuinga kui nikjaʼaitsjenyaijin je kjoabʼechjíntjai xi kitsjoa Jesús xi totʼatsaan kʼoa kʼoasʼin bakonijin nga ʼyachjíjin jmeni xi kisʼin (Mateo 20:28; 1 Corintios 11:24). Je Cenale Nainá ali tsa sacramentojin kʼoa ali tsakuijin xi síchatʼa jéele chjota. Je Biblia kʼoatso nga tokʼiaa nga sichatʼa je jéená je Niná kʼiatsa koa̱nkjainná xi tʼatsʼe Jesús. Ali tsa kaojin kui chatʼaniná je kostumbre xi tjínle je relijión (Romanos 3:25; 1 Juan 2:1, 2).

 Je Jesús kʼoasʼin tsakʼénele je chjotale nga katabʼéjna je Cenale Nainá, tonga alikui kʼoakitso jotjín kʼa sikjaʼaitsjenya (Lucas 22:19). Tjínkʼa chjota xi kʼoatso nga xki̱ sá katasʼejna, nga xki̱ xomana katasʼejna, nga nyaon nyaon katasʼejna, nga nkjín kʼa katasʼejna nga jngo nichxin kʼoa tsa maije̱ nga toje chjota xi kuitsoni jotjín kʼa kʼoejna. Tonga kataʼyala jmeni xi kuenta sʼiaan.

 Nga tikuini nichxin nga basje je sʼuí Paxko je chjota judío je Jesús kʼiaa tsakʼéjna chjotse je Cenale Nainá, kʼoa kʼiaa kinikʼien nga jekoanskanni (Mateo 26:1, 2). Jekʼoasʼin tjínndajin nga kʼoakoan. Nga̱ je Énle Niná kui síngósonkao je kjoabʼechjíntjaile Jesús je barré xi bʼaitʼa nga sʼuí Paxko (1 Corintios 5:7, 8). Kʼoa je sʼuí Paxko to ñandia kisʼejna nga xki̱ nó (Éxodo 12:1-6; Levítico 23:5). Je chjotale Cristo xi títjon tsakatío to ñandiaa kisikjaʼaitsjen je kjoabiyale Cristo nga xki̱ nó kʼoa jin xi testigole Jeobá maijin kʼoatinʼiaijin, kui mangíntjenngijin jmeni xi tso je Biblia. a

 Josʼin tsakʼéjnachoa̱ je Jesús kʼoati ʼyaa jme orani kʼoa jme nichxinni nga sʼe̱jna kʼoa jotjín kʼa sʼe̱jna. Je Jesús kʼiaa tsakʼéjna chjotse je Cenale Nainá kʼianga 14 sá nisán nó 33 kʼianga jekiskantjai Tsʼuí, kʼoa kui kitjenngi je xo̱nsá xi kisichjén je chjota judío nga kʼia (Mateo 26:18-20, 26). Jin xi testigole Jeobá maijin kʼoati xki̱ nó nikjaʼaitsjenyaijin je Kjoabiyale Cristo, kʼoa kui mangíntjenngijin jokisʼin je chjotale Cristo xi títjon tsakatio. b

 Kʼianga 14 sá nisán nó 33 nga bixine kiskanele, tonga nga xki̱ nó kjaʼaí kjaʼaí nichxin bichókanele. Kʼianga ʼyaijin jme nichxin bichókanele nga 14 sá nisán, jin xi testigole Jeobá maijin kui mangíntjenngijin josʼin tsakʼéxki̱ nichxin je chjota xi tsakatio nichxinle Jesús kʼoa ali tsakuijin je calendario xi síchjén chjota judío ndʼaibi. c

 Je kjoanikjaʼaitsjenya xi tsakʼejna chjotse je Jesús kui kisichjén je nioxtila xi tsínle naʼyo̱san kʼoa kao binojko xi tsʼangi nga kisʼejna je sʼuí Paxko (Mateo 26:26-28). Kuinga kui nichjénsínijin je nioxtila xi tsínle naʼyo̱san kʼoa xi tsín jme xi sʼejin. Je binojko xi nichjainjin ali tsakuijin ndá totsee xi tsín satíojchá kʼoa nikuijinla ndá totsee xi soka sʼejin, xi xán tjínle kʼoa tsa jme xka̱ kasʼejin.

 Tjínkʼa relijión xi kui síchjén je nioxtila xi naʼyo̱san tjínle. Tonga ya Biblia nʼio nkjín kʼa faʼaitʼa jñani nga je jée kʼoa kao jmeni xi to bitson nga kui tsoyanile naʼyo̱san (Lucas 12:1; 1 Corintios 5:6-8; Gálatas 5:7-9). Kuinga kixi tíjnasíni nga kui tsoyanile je yao tsjele Jesús je nioxtila xi tsínle naʼyo̱san kʼoa xi tsín jme xi sʼejin (1 Pedro 2:22). Tjínkʼa relijión xi to ndá totsee síchjén ʼndele nga binojko sichjén, kʼoa jebi kontra tíjnale jmeni xi tso je Énle Niná. Kʼoa kuinga kʼoasʼínni nga tsín ma nikao je xán nga tso, tonga alikui ya Biblia bʼangini (1 Timoteo 5:23).

 Je nioxtila xi tsínle naʼyo̱san kʼoa kao je binojko xi machjén nga faʼaitsjenya je Kjoabiyale Cristo to tsoyanile ali tsa ñaki yaolejin kʼoa tsa ñaki njínlejin Cristo. Ali tsa ñaki kuijin mʼóya kjoaixi je yaole kʼoa njínle Jesús tojo tso kʼa chjota. Kʼoati tsín ya mʼójin yaole kao njínle. Kataʼyala jotso Biblia xi tʼatsʼe jebi.

•   Kʼiatsa kʼoalani kitsole Jesús je chjotale nga kataʼbi je njínle, jaʼatonejin jmeni xi tso je kjoatéxomale Niná nga tsín koa̱n njín si̱koaa (Génesis 9:4; Hechos 15:28, 29). Alikuijin kixi tíjna tsa kʼoakisʼin Jesús, alijojin kjini nga kui kʼoakitsole je chjotale nga katafaʼatone kjoatéxomale Niná nga̱ tsje tíjna je njín (Juan 8:28, 29).

•   Je pastro ali tsa ñaki njínlejin Jesús xi tsakʼi nga̱ tijé Jesús xokitsoni nga xíjten je njínle, nga̱ kjesa tsjoátʼajin yaole nga kui nichxin (Mateo 26:28).

•  Je Jesús “tojngo kʼaní” kitsjoatʼa yaole (Hebreos 9:25, 26). Kʼiatsa je nioxtila kʼoa je bino, yaole kʼoa njínle Jesús mʼóya nga sʼejna je Cenale Nainá, je xi kjen nioxtila kʼoa ʼbi bino, tikui tikuijin tjíokjoéyandani je kjoabʼechjíntjaile Jesús.

•   Je Jesús i kitso: “Kʼoatʼiaon jebi nga kjoaʼaítsjenno xi tʼatsʼan”, kʼoa ali kitsojin: “Kʼoatʼiaon jebi xi tʼatsʼe kjoabʼechjíntjaina” (1 Corintios 11:24).

 Je chjota xi kʼoasʼin makjainle nga ñaki njínle kʼoa yaole Jesús mʼóya je nioxtila kao bino yaa bʼangini josʼin jaʼatoya kʼa testole Biblia. Tobʼelañá, nʼio nkjín Biblia xi i̱ sʼin síkʼatoya: “Jebi njínna ní” kʼianga kui kinchja̱ni Jesús je bino (Mateo 26:28). Tonga jmeni xi kitso je Jesús koaan i̱ sʼin kjoaʼatoya: “Jebi kui tsoyanile je njínna”. d Kʼoa me ñaki to choa̱ kisichjén je Jesús nga tsakakóya, kuinga jmeni xi kitso tokisingósonkao (Mateo 13:34, 35).

 Kʼianga bʼéjna je Cenale Nainá je testigole Jeobá tochoa mani xi kjen nioxtila kʼoa ʼbi je bino. Ánni.

 Kʼianga tsakʼéjten je njínle Jesús kʼiaa kisʼejna je “kjoachjotse” xi kisʼejnangajaonile jmeni xi tsakʼéndajin je Jeobá kao naxinandá Israel nichxin kjoatse (Hebreos 8:10-13). Je xi ya tjíojin je kjoa xi kisʼendajin chjotse jéní xi kjen je nioxtila kʼoa ʼbi je bino kʼianga faʼaitsjenya Kjoabiyale Cristo. Ali tsa tongatsʼijin je chjotale Cristo xi kjen je nioxtila kʼoa ʼbi je bino, tojé xi toxá “kinokjoale” (Hebreos 9:15; Lucas 22:20). Chjota jebi yaa koatexomakao Cristo ya ngʼajmi. Je Biblia kʼoatso nga to 144,000 mani je chjota xi kʼoaile kjoanda jebi (Lucas 22:28-30; Apocalipsis 5:9, 10; 14:1, 3).

 Alikui mangósoán kao je barré “xi tochoa mani” xi ya koatexoma Cristo, me ngatsʼiaa nga ya tiyojinlee je chjotankjín xi nchja̱ni Biblia xi i̱ koatio ngantsjai nichxin i̱ Sonʼnde (Lucas 12:32; Apocalipsis 7:9, 10). Ningalani xi i̱ tjínná kjoachoya i̱ Sonʼnde likui bichaa je nioxtila kʼoa likui ʼyoá je bino, tonga mangínñá nga faʼaitsjenya Kjoabiyale Cristo nga̱ kʼoasʼin bakóñá nga ʼyachjiá kjoabʼechjíntjai xi kitsjoa je Jesús xi totʼatsaan (1 Juan 2:2).