Jin xi testigole Jeobá maijin bʼenelaijin yaonajin nga jtín sʼin katabatio je familianajin kʼoa kao familiale xi ngikʼa. Nʼio chjí ʼyatokuinjin je familia nga̱ ʼyaníjin nga je Niná xi kʼoasʼin koanmele nga familia katasʼe (Génesis 2:21-24; Efesios 3:14, 15, Traducción del Nuevo Mundo). Ya Biblia faʼaitʼa kjoafaʼaitsjen xi tjíobinyakao je chjota jngo tjíjtsa Sonʼnde nga jtín sʼin tjíobatio ya yaniʼyale kʼoa nga tsjoa tjíosatío kon.

 Bʼenelaijin yaonajin nga nitjosuinjin jme xi tso je Biblia. Kʼoa kui xi binyakaonajin nga ngisa nda biyokoaijin xíngijin kʼoa nga nda nijcháijin ʼndíxtinajin (Proverbios 31:10-31; Efesios 5:22–6:4; 1 Timoteo 5:8). Je kjoafaʼaitsjen xi faʼaitʼa Biblia saʼnda binyakao je familia nga nda batiokao xínkjín ninga kjaʼaí kjaʼaí religión tjínle (1 Pedro 3:1, 2). Kataʼyala jótso kʼa chjota xi testigole Jeobá ma je chjoónle kʼoa tsa xʼinle:

•   “Kʼianga jechixainjin, jaon nó nga ñaki totsakixkainjin ngantsjai kʼoa alikui nda kisʼe tokuinjin. Tonga kʼianga testigole Jeobá koan je Ivete ngisaa tsakakóna kjoatsjoacha kʼoa ngisaa tsejta koan. Nga kʼoasʼin kisikʼantjaiya yaole kui xi tsakasenkaonajin nga tsín kinjiuinjin xíngijin” (Clauir, xi Brasil tsʼe).

•   “Tsakʼechjoale je xʼinna (Chansa) kʼianga kiskotʼaya Biblia kao testigole Jeobá, nga̱ kʼoasʼin kisikjaʼaitsjen nga chjota síxkoa̱ya je testigole Jeobá. Tonga nga tífi nichxin tiʼbeña nga nʼioni tíbasenkaonajin je Biblia josʼin tiyokoaijin xíngijin” (Agness, xi Zambia tsʼe).

 Kʼianga ʼmiyasuinjin ʼmiyalaijin je chjota nga je Biblia nʼio koasenkao xi tʼatsʼe jebi:

•   Nga nda skoéjin ʼya xi kuixankao

•   Nga koa̱nle kʼoendajin je kjoa xi sʼe̱le nga tosʼa kuixan

•   Nga nda koatiokao je na̱chále kao nʼaichále

•   Nga koa̱nle chja̱ʼa̱ sikao je tao̱n

•   Nga tsín kjaoti

•   Nga sichatʼale xínkjín

•   Nga koatekjáyale ʼndíxtile

 Sakʼoaa kʼoama. Jngo informe xi tsakʼasje je empresa xi Sofres ʼmi nga nó 1998 kʼoatso nga kʼianga 20 familia xi testigole Jeobá koan tsa je chjoón kʼoa tsa je xʼin, jngo xi kjoa kisʼele.

 Je Jesús kʼoakitso nga tjínkʼa je chjotale xi kjoa sʼe̱le kao xi tjío yaniʼyale (Mateo 10:32-36). Je chjota xi Will Durant tsakʼin kʼoakitso nga kʼianga tsakatéxoma chjota romano “je chjotale Cristo kʼoatsakʼinle nga chjota síxkoa̱ya”. a Kʼoa nichxin xi tiyoaa ndʼaibi kʼoati ʼmi sakʼoanajin xi testigole Jeobá maijin. Tonga a jé testigole Jeobá xosʼín nga xkoa̱ya batio je chjota.

 Kʼianga tísʼendajin kjoa xi tʼatsʼe nga chjota síxkoa̱ya je testigole Jeobá, je Tribunal Europeo de Derechos Humanos kʼoakitso nga tosa je xi tsín testigole Jeobá ma xi kjoa bajngi nga̱ tsín sasénle nga kui ma xínkjín. Tribunal jebi kitsosa: “Kui kjoa faʼatojin ngatsʼi familia xi kjaʼaí kjaʼaí religión tjíojin; kʼoa kʼoati ma je testigole Jeobá”. b Ninga kʼoasʼín je familianajin, jin xi testigole Jeobá maijin bʼenelaijin yaonajin nga mangíntjenngijin kjoafaʼaitsjen jebi: “Ali chʼaojin nikao je xi chʼao síkaono [...]. Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota” (Romanos 12:17, 18).

 Jin xi testigole Jeobá maijin kui mangíntjenngijin je kjoatéxomale Niná xi kʼoatso nga toje kuixankoaa je chjota xi kʼoati kui kjoamakjain tjínle (1 Corintios 7:39). Kjoatéxoma jebi nʼio binyakaonajin. Tobʼelañá, jngo revista xi kitjo nga nó 2010 kʼoatso nga “je chjota xi ngóson religiónle kʼoa xi ngóson sʼin makjainle” ngisaa nda batiokao xínkjín (Journal of Marriage and Family). c

 Alikui kʼoaʼmilaijin xíngijin nga katatsjion xínkjín kʼiatsa xʼinle kʼoa tsa chjoónle xi tsín testigole Jeobá ma. Je Biblia itso: “Tsa jngo ndsʼee xi tjínle chjoón xi tsín makjainle, kʼoa tsa je chjoón mamekon nga bʼejnakao, ali tsjiónjin. Kʼoa je chjoón xi tjínle xʼin xi tsín tsa makjainle, kʼoa tsa je xʼin mamekon nga bʼejnakao, kʼoati li tsjiónjin” (1 Corintios 7:12, 13). Jin xi testigole Jeobá maijin nitjosonníjin kjoatéxoma jebi.