Je testigole Jeobá nʼio nkjín Biblia síchjén kʼianga kotʼaya. Ninga kʼoalani, nʼio chjí be je Traducción del Nuevo Mundo de las Santas Escrituras, nga̱ faʼaitʼa je jaʼaínle Niná, ñaki ndasʼin jaʼatoya kʼoa nda majinná. Kʼoa nkjín koya én jekitjo.

•   Jaʼaínle Niná. Likui tsa tongatsʼi xi bʼasje Biblia kʼianga je Niná bʼasjengʼa, xi kʼoasʼin kitsjoaná Biblia. Tobʼelañá, jngo Biblia kijna jñani tsʼato jankan kao te chjota síkʼaxki̱ xi kitsjoanganʼio nga kitjo Biblia jebi, tonga nijngokʼajinla faʼaitʼa je jaʼaínle Jeobá, xi kʼoasʼin kitsjoaná Biblia.

   Tonga je Traducción del Nuevo Mundo ñaki faʼaitʼa ngakjijnda je jaʼaínle Niná tojosʼin jaʼaitʼa je xo̱njchá xi títjon kichji, kʼoa likui ya faʼaitʼa je jaʼaínle chjota xi kisikʼatoya.

•   Ñaki ndasʼin jaʼatoya. Tjínkʼa je Biblia xi tsínkjoan kʼoatso jotso je xo̱njchá xi títjon kichji. Tobʼelañá, jngo Biblia xi i̱sʼin síkʼatoya ya Mateo 7:13: “Ya titjásʼaon ya xo̱ntjoa xi nrʼoeya, nga̱ je xo̱ntjoa kʼoa kao je ndiaa xi fini ya jña lʼí títi teyaní kʼoa jení”. Jñani kichjitʼa títjon Énle Niná ali tsa “jña lʼí títi” tso, “ni̱kjeson” tso. Je xi kisikʼatoya Biblia jebi kʼoajinsʼin koankjainle nga je xi tsʼen yaa ni̱kjaʼá kjoañʼai ngantsjai nichxin ya jñani lʼí títi. Tonga je Biblia alikui tsa kʼoatso. Kuinga “ni̱kjeson” kisʼesíni testo jebi ya Traducción del Nuevo Mundo, tojo tjín je xo̱njchá xi títjon kichji.

•   Nda majinná. Ningalani nʼio machjén nga ñaki ndasʼin kjoaʼatoya je Biblia, tonga kʼoati machjén nga nda katamajinná. Jngola choa̱ kataʼyaa. Nkjín Biblia xi i̱ tso ya Mateo 5:3: “Jó tondale je xi yo̱ma̱ kjiayakon”. Tonga je chjota me tsín nanda majinle én jebi. Kuinga je Traducción del Nuevo Mundo nga i̱ tsakʼésíni testo jebi: “Tsjoa tjíole je xi be nga machjénle tʼatsʼe Niná”.

 Je Biblia Traducción del Nuevo Mundo síchjén je jaʼaínle Niná, ñaki ndasʼin jaʼatoya kʼoa nda majinná. Xi ijngosani, alikui tao̱n nijéle je chjota xi sʼeyole. Kʼoa jenkjín miyón chjota xi kjima tjíobʼéxkia Biblia jebi xi énle faʼaitʼa, ninga je chjota xi ma̱ tjío.