Jmeni xi makjainnajin yaa chʼanginijin jmeni xi tso Biblia. Kʼianga ngisa nda majinnajin jmeni xi tso, nikʼantjaiyajinníjin josʼin makjainnajin. a

 Kʼianga nikʼantjaiyajinjin josʼin makjainnajin kui mangíntjenngijin jotso Proverbios 4:18: “Tonga je ndiaale chjota xi kixi kʼoasʼin mangóson joma nga nroásʼesén nga tanjioya, nga sa isen sa isen ma, saʼnda nga machon isen isen”. Xi tsonile, joma kʼianga maʼisen nga jbi jbi matsen ngayeje jmeni xi tjín. Kʼoati tísʼín je Niná, choa choaa tíbʼéjnatsenle je choʼndale jotjínni xi kjoakixi kʼianga bichó choa̱le (1 Pedro 1:​10-​12). Je Biblia tongini kʼoakitso nga je Niná sixátíyaa kʼianga “kuichokjetʼa nichxin” (Daniel 12:4).

 Alikui nikjáojinjin kʼoa alikui tokʼoamanajin nga kʼoasʼin bʼantjaiyajin josʼin makjainnajin. Nga̱ je choʼndale Niná xi tsakatio nichxin kjoatse kʼoati tjín jmeni xi tsín nda koanjinle kʼoa xi kjaʼaísʼin koanjinle, kuinga koanchjénsíni nga kisikʼantjaiyajin josʼin makjainle.

•   Je Moisés koanmele nga kisikatíondaí je chjota israelita, ñachan nó tongini nga kje kʼoatsojinle Niná nga kʼoasʼin (Hechos 7:​23-​25, 30, 35).

•   Je pastro alikui koanjinle je én xi tongini kinokjoa xi tʼatsʼe Mesías nga tjínnele kuiyá kʼoa nga kjoaʼáyanile (Isaías 53:8-12; Mateo 16:21-23).

•   Tjínkʼa je chjotale Cristo xi títjon tsakatio xi kjaʼaísʼin koanjinle kʼiani kjoaʼaí “je nichxinle [Jeobá]” (2 Tesalonicenses 2:1, 2).

 Nga jeki nichxin, je Niná tsakasenkao je choʼndale nga koanjinle jotjínni, kuinga nijésínilaijin je Niná nga tosi tonda katabasenkaonajin nga katamajinnajin jotjínni xi tʼatsʼe (Santiago 1:5).