Mai. ʼYaníjin nga tsín tsa tokui kuitjo̱ntjainijin nga kʼoasʼin xki̱ niʼya xki̱ niʼya ʼmiyasuinjin (Efesios 2:8). Ánni.

 Si̱kjaʼaitsjenla tsa jngo chjota xi nʼio ndʼé kʼoakuitsoná nga jngo kjoatjao xi nʼio chjíle tsjoále ngatsʼi xi kuicho ya jñani kuitso kʼoa jme nichxin nga kuitso. Kʼiatsa ñaki makjainná nga ñaki sitjoson chjota jebi jmeni xi títso, a tsí koanngián ya jñani kuitso. Alikuijin toñá koanngián, kʼoajinti kʼuínlee je xi xíngiaa mani kʼoa tsa je miyoná nga kʼoati katafi, ánni nga kʼoati katabʼaisínile je tsojmi xi kʼoabí. Ningalani kʼoasʼiaan jmeni xi kuitso chjota jebi, ali tsa tokuijin nga tsjoániná. Nga̱ jngo kjoatjao toxá bʼaininá, ali tsa nikinjejián.

 Kʼoakjoánti sʼinni, jin xi testigole Jeobá maijin makjainnajin nga sitjoson jmeni xi kitso je Niná nga jngo kjoabijnachon xi tsínkʼia fetʼa tsjoále ngatsʼi chjota xi kʼoaʼénle (Romanos 6:23). Kʼoa nga menajin nga kʼoati katasokóle je xi kjaʼaí chjota kjoanda jebi, kuinga bʼenenilaijin yaonajin nga ʼmiyasuinjin. Tonga kʼoati ʼyaijin nga tsín tsa tokui nga kuitjo̱ntjainijin nga kʼoatinʼiaijin xá jebi (Romanos 1:17; 3:28). Nijmejin xi koa̱n sʼiaan nga toñá si̱kinjee je kjoatjao xi tsjoáná Niná. Nga̱ je Biblia itso: “Tsʼasjentjainá, ali kuijin totʼatsʼejin xá xi nda kinʼia” (Tito 3:5).