A makjainle je testigole Jeobá je Antiguo Testamento
Jaon, je testigole Jeobá makjainle nga ngakjijngo je Biblia tʼatsʼe “Niná jinroani, kʼoa kjaínga nda machjén” (2 Timoteo 3:16). Kʼoa kuinga síchjénni je Antiguo Testamento kʼoa kao je Nuevo Testamento. Nga tsín kʼoasʼin kataʼyale nga tsín timachjénni je Antiguo Testamento, jin xi testigole Jeobá maijin Escrituras Hebreas tsakʼinlaijin. Kʼoa je Nuevo Testamento Escrituras Griegas Cristianas tsakʼinlaijin.
Ánni nga tjínnesínile sichjén je chjotale Cristo je Antiguo Testamento
Je Niná kʼoasʼin koanmele nga je Pablo katakji je én jebi, xi tso: “Je kjoa kichjitʼa ngasʼa, kichjitʼa xi tʼatsʼe nga koakoyaná” (Romanos 15:4) Kuinga ñaki kʼoakʼoésíñá tokoán nga nʼio chjíle je én xi nya je Escrituras Hebreas. Nʼio nkjín koya xi masjaitʼaná ya Biblia, jolani je kjoafaʼaitsjen xi nʼio machjénná kʼoa kao jmeni xi koan ngasʼa xi nʼio chjíle.
Bʼéyanajmíná jmeni xi koan ngasʼa. Je Escrituras Hebreas nʼio nda bʼéyanajmíná josʼin kisinda Niná je Sonʼnde kʼoa jókoanni nga chjotajée koansíni je chjota. Kʼianga ʼyaa xi tʼatsʼe jebi, machoyaná jña jaʼaiñá kʼoa ánni nga biyasíñá (Génesis 2:7, 17). Xi ijngosani, je Escrituras Hebreas bakóyaná jósʼin tsakasenkao je Niná je chjota xi tsakatio nichxin kjoatse xi me kʼoati kui kjoa jaʼatojin jmeni kjoa xi bitjatojiaan nichxin xi tiyoaa ndʼaibi (Santiago 5:17).
Nʼio machjén je kjoafaʼaitsjen xi nya. Yaa Escrituras Hebreas faʼai je libro xi Proverbios kao xi Eclesiastés ʼmi, nga jao xo̱n jebi nʼio nkjín kjoafaʼaitsjen nya xi basenkaoná nichxin xi tiyoaa ndʼai. Tobʼelañá, kʼoatsoná jósʼin nga nda kuiyoaa kao familianá (Proverbios 15:17). Jósʼin nga tsjoá koaya tokoán je xáná (Proverbios 10:4; Eclesiastés 4:6). Kʼoa jósʼin nga nda si̱chjén nganʼioná nga sʼa xtiaa (Eclesiastés 11:9–12:1).
Kʼoati nʼio basenkaoná nga chotʼayá je kjoatéxomale Moisés josʼin faʼaitʼa ya Torá axo xi Pentateuco ʼmi (xi títjon aon libro xi tsʼe Biblia). Ninga je chjotale Cristo likui titjínnenile nga kui sitjoson kjoatéxoma jebi. Tonga je kjoafaʼaitsjen xi tsjoá nʼio binyakaoná nga tsjoá sʼe̱ tokoán (Levítico 19:18; Deuteronomio 6:5-7).