Jmeni xi nʼiaijin kʼianga tjín xi biya kui mangíntjenngijin jmeni xi tso je Biblia, tobʼelañá:

•   Toxá ba sʼeni tokoán kʼianga xíngiaa biya. Je chjotale Jesús kiskiʼndá kʼianga kʼien xínkjín (Juan 11:33-35, 38; Hechos 8:2; 9:39). Kʼianga tjín xi biya alikui sʼuí bʼejnaijin (Eclesiastés 3:1, 4; 7:1-4). Tosaa kʼoati ba sʼe tokuinjin nga kjoaba batiojin je xi xínkjín kasícha (Romanos 12:15).

•   Je xi jekabiya alikui tijme xi beni. Ninga xinxin tiyuijin kʼoa kjaʼaí kjaʼaísʼin nganajin, alikui kui mangíntjenngijin je costumbre xi kʼoatso nga xin fi je kʼien kʼianga jemʼe kʼoa nga koa̱nle josikaoná, nga̱ tsínkui bakóya je Biblia (Eclesiastés 9:5, 6, 10). Tobʼelañá, alikui jme xi batiolaijin je ʼndíkʼiennajin, ni chjakaojinlaijin kʼoa alikui sʼuí chʼasjelaijin kʼoa ni kʼiajinla kʼianga bichó nóle. Tsínkui kʼoanʼiaijin jmeni xi batéchjoa je Énle Niná, tosaa nitjosuinjin jmeni xi tso je Biblia nga i̱ tso: “Tinyatʼaxinlao [...]. Kʼoa li nikaojion je xi chʼao kjoan” (2 Corintios 6:17).

•   Je xíngiaa xi jekʼien koaan koatiokon ijngokʼani. Je Biblia kʼoatso nga koa̱n kjoaʼáyanile je xíngiaa xi jekʼien kʼoa kʼoati tso nga kuicho nichxin nga tsín tisʼe̱ni kjoabiya (Hechos 24:15; Apocalipsis 21:4). Kjoachoya jebi tsakasenkao je chjotale Cristo nichxin kjoatse, kʼoa kʼoati basenkaonajin nga tsín nʼio bʼetʼanajin je kjoaba (1 Tesalonicenses 4:13).

•   Je Biblia kʼoatso nga nangitokon katamaa (Proverbios 11:2). Kʼianga tjín xi biya alikui síxkón nʼiaijin tojoni nga katabe xi kjaʼaí kʼoa tsakuije̱ nga bakuijin nga tse tao̱n tjínnajin (1 Juan 2:16). Ali tsa nʼiojin tse jmeni xi nʼiaijin tojoni nga kʼoetsaojin je chjota xi bichó, tsínkui bindaijin je kaxa̱ xi nʼio chjí kʼoa nikuijinla chʼakjáijin je najño xi nʼio chjí kʼoa tsa je xi nʼio matsen.

•   Alikui bʼenelaijin xi kjaʼaí nga kʼoati katasʼín jonʼiaijin. Kui kjoafaʼaitsjen jebi mangíntjenngijin: “Kʼoailee kuinda Niná xi titʼatsʼe yaonáni nga jngójngoá” (Romanos 14:12). Tonga tsa ʼya xi mele skoe̱, ʼmiyaníjin josʼin makjainnajin kʼoa kao kjoaxkóntokon kʼoanʼiaijin (1 Pedro 3:15).

 ʼNde: Tsa je familiale xi kabiya mele nga tjín xi sʼin. Koaan ya kʼoasʼinni ya Ndʼia jña chotʼayá, ya jñani ma sʼeyo je kʼien, ya niʼyale, ya jñani sa̱ká kʼoa tsa ya jñani sʼe̱ñe.

 Jmeni xi ma: Kʼianga ninʼio kon je xínkjín xi kabiya, jngoo kjoanokjoaya sʼejna xi kui tsoya jmeni xi tso je Biblia tʼatsʼe kjoabiya kʼoa kao tʼatsʼe kjoachoya xi tjínnajin nga kjoaʼáyanile xi jekʼien (Juan 11:25; Romanos 5:12; 2 Pedro 3:13). Je xi tsjoá kjoanokjoaya koaan kʼoakuitso jokoankjoan je chjota xi kabiya kʼoa kʼoati koa̱n sikʼaxki̱ jósʼin basenkaoná je choa̱le nga kixi koan (2 Samuel 1:17-27).

 Sakʼoaa jngo kjoajnda jnda xi ya Biblia yʼangini (Colosenses 3:16). Kʼoa jngoo kjoabʼetsʼoa nikjetʼani (Filipenses 4:6, 7).

 Alikui tao̱n sʼexkó: Alikui tao̱n sʼexkó kʼianga tjín xi biya kʼoa alikʼia tao̱n sʼexkó kʼianga biyojtínjin (Mateo 10:8).

 ʼYáni xi koa̱n kuicho: Kʼianga ya sʼejna kjoanokjoaya ya Ndʼia jña chotʼayaijin nga tjín xi biya, ma bichó toʼyani, tojo ma kʼianga biyojtínjin. Ninga tsín testigole Jeobá ma je chjota koaan kuicho.

 Nga jngó jngó xi tsoni jmeni xi sʼín kʼoa kui fitjenngi kjoafaʼaitsjen xi tsjoá je Biblia (1 Timoteo 1:19). Tonga alikui kʼoanʼiaijin tsakui kʼoasʼin jmeni xi batéchjoa je Biblia (2 Corintios 6:14-17).