Kʼoasʼin makjainnajin, xi testigole Jeobá maijin, jmeni xi tsoya je Biblia kao je kjoatéxoma xi ya faʼaitʼa basenkaoná nga kui chjoéjiaan jmeni sasénle Niná kʼoa nga kjoanda tsaanñá (Isaías 48:17, 18). Ali tsa tojinjin tinikʼatsainjin jmeni xi ʼmiyaijin. Kʼoasʼin mangínkoaijin yaonajin jmeni xi tso je Biblia. Kuila kataʼyaa kʼaa jotjínni kʼianga jngo chjoón jngo xʼin fákao xínkjín. a

•   Je kjoabixan alikui ma bixoya (Mateo 19:6). Jin xi testigole Jeobá maijin, kʼoasʼin nikjaʼaitsjain kʼianga ʼyani xi fákao xínkjín kuinga jekui ndiaa tjíokjoé nga kuixankao xínkjín. Kʼoa kuinga tsín tokjoaská ʼyatokonsínijin kjoa jebi.

•   Kʼiatsa jngo xi kje kasonjin nóle, alikui koa̱n nga jngo chjoón kʼoa tsa jngo xʼin kʼoámjekao. Je xi bakinle nga kuixan jéní xi jekafaʼato kjoaxtile, xi tsonile, tsa jejaʼato jotjín nó nga nʼio kisimekon nga tjín xi koájnakao (1 Corintios 7:36, Traducción del Nuevo Mundo).

•   Je xi koa̱n kʼoétsomakao xínkjín jéní xi tiʼndele nga koa̱n kuixan. Kʼoa tsa jngo chjota xi jekitsjion chjoónle kʼoa tsa xʼinle ali tsakui xi tsonile tsa tiʼndele nga koa̱n kuixan xi ngixko̱n Niná. Je xi tiʼndele ngixko̱n Niná nga koasenjnda kʼoa tsa mai je xo̱n kjoabixanle jéní xíngiaa xi kasíchajngi je chjoónle kʼoa tsa xʼinle(Mateo 19:9).

•   Je chjotale Cristo xi mele kuixan tojé tjínnele kuixankao je xi ngóson ya tjíojin relijiónle (1 Corintios 7:39). Je xi tsonile, ñá xi testigole Jeobá maa, tojé xi koa̱n kuitómjekoaa kʼoa kuixankoaa xi kʼoati testigole Jeobá ma xi jekisʼenngindá, alikui koa̱n ninga je chjota xi sʼa tjíobe jmeni xi makjainná (2 Corintios 6:14). Je Niná kʼoasʼin koanmele saʼnda ngasʼa kʼianga toje kuixankao je choʼndale je xi ngóson sʼin makjainle (Génesis 24:3; Malaquías 2:11). Kʼoa je chjotachjine kʼoati tso nga nʼio nda nga kui kjoatéxoma mangíntjenngiaa. b

•   Je xi sʼa xti tjínnele nga sitjosonle je xijchále (Proverbios 1:8; Colosenses 3:20). Je xti xi ya tjíokao xijchále tjínnele nga sítjosonle jmeni xi kuitsole jotjínnele sʼin kʼianga jetjín xi tjíotsomakao. Tsakui nichxin kui kʼoakitsole jotjen tjín nóle nga jekoa̱n tjín xi kʼoámjekao kʼoa jmeni xi tsjoáʼndele nga sʼin.

•   Je Biblia itso: “Nga jngójngó katabʼami chʼá xi titsʼeni” (Gálatas 6:5). Kʼianga kuenta sʼiaan kjoafaʼaitsjen xi faʼaitʼa Biblia, ñá xi testigole Jeobá maa, ñá xi kuixónñá tsa mená nga tjín xi kuitómjekoaa kʼoa ʼyani. Nʼio nkjín xti xi be josʼín kʼoa jé síjéle kjoafaʼaitsjen je testigole Jeobá xi jetjínle kjoafaʼaitsjen xi mele kʼianga nda koatio je xti (Proverbios 1:5).

•   Nʼio nkjín koya jmeni xi sʼín je xi xínkjín bʼetsomakao nga jée kitjenkao. Ya Biblia bʼéchjoaní xi tʼatsʼe kjoachajngi. Kʼoa ali tsa tokuijin jmeni xi sʼín nga fayokao xínkjín je chjota xi kje bixanjin, kʼoati kui tínchja̱ni nga kajon yaole xínkjín, nga kʼoasʼin ntsja kʼoa tsa tsʼoa síchjén nga síkao nga̱ʼan xínkjín kʼoa nga totsʼin síñakonni yaole xínkjín, kʼoa tsa jmesa xi sʼín (1 Corintios 6:9-11). Kʼianga jngo chjoón jngo xʼin xi jetjíotsomakao xínkjín, tsa kʼoendsoʼa xínkjín kʼoa skájon yaole xínkjín kʼoa sitjosjeyale yaole xínkjín nga mele kjoáyokao xínkjín, xájndí tjíosʼín alikui tísasénle je Niná, ninga tsín kjoachajngi tjíosʼín (Gálatas 5:19-21). Ya Biblia kʼoati tso nga tsín sasénle Niná xi énchi̱nga̱ fáo (Colosenses 3:8).

•   Je ni̱ma̱ná nʼio bʼanacha (Jeremías 17:9). Je chjota koaanle kui kʼoasʼin xi chʼaotjín ninga be nga chʼaotjín jmeni xi tísʼín. Kʼianga tsínkui kʼoasʼin je xi chʼaotjín xi jetjíotsomakao xínkjín, machjénní nga tsín toje ya koatiokao xínkjín jñani kui simekon xi tsín kixi tíjna. Jngo chjoón jngo xʼin xi jetjíotsomakao xínkjín, alikui kjoa jtsaojin tsa nkjín mani nga kʼoéma kʼoa tsa ʼyani xi tjenkaoje̱ (Proverbios 28:26). Jngo xi mele kuixan bení nga tsín ndatjín nga ya koasjai ya Internet ʼyani xi mele kʼoámjekao, nʼio xkón tíjna kʼiatsa je mele kʼoámjekao jngo chjota xi tsín nanda bexkon (Salmo 26:4).