Jotso chjota: Je testigole Jeobá alikui síxki nga̱ tsín makjainle xi tʼatsʼe xki.

 Jotjínni: Jin xi testigole Jeobá maijin fasjainíjin jñani nga nʼio nda koa̱nxkinajin. Kʼianga sokóchʼinnajin kʼoa tsaʼyani xi xíngijin so̱kochʼinle kʼoa tsa machjén nga jtíya, fasjainíjin chjinexki xi nda síxki kʼoa kao chjinexki xi male nga tsín njín síchjén nga bateya chjota. Kʼoa nʼio ʼyachjíjin jokji tjíobʼénele yaole je chjinexki nga tjíobásjai josʼin tjíosíxkile je testigole Jeobá. Nga kʼoasʼin tsín njín xinyále je testigole nga maxkile nʼio nkjín naxinandá jñani kʼoatisʼin kjimaxkile xi kjaʼaí chjota. Nichxin xi tiyoaa ndʼaibi tiʼndele toʼyani nga tsín tsjoáʼnde nga njín xinyále. Nga̱ je xi njín xinyále sakʼoaa likui sasénle yaole, sakʼoaa kui chʼin tsaotʼale je chʼin xi tjínle je njín kʼoa sakʼoaa je chjota xi ya síxá ya ndʼia chjinexki maskáyajinle kʼoa tokjaʼaí njín binyále chjota.

 Jotso chjota: Tobʼéxkiatʼain xínkjín je testigole Jeobá nga síndaya.

 Jotjínni: Alikui kʼoasʼin ʼyanijin nga bʼexkiatʼainjin xíngijin.

 Jotso chjota: Nʼio chjí sʼengi nga tsín njín xinyáná nga maxkiná.

 Jotjínni: Kʼianga tsín njín xinyáná ngisani choa sʼengi. a

 Jotso chjota: Nga xki̱ nó nʼio nkjín testigole Jeobá mʼe, xi chjotajchínga kʼoa saʼnda xtiʼndí, nga tsín njín xinyále.

 Jotjínni: Alikui kʼoatjín jotso chjota, nichxin xi tiyoaa ndʼaibi nʼio nkjín chjinexki xi tsín njín síchjén nga bateya chjota, ninga kui operación tsjoále xi nʼio ñʼai tjínle. b Jolani tsa tsʼe ni̱ma̱ná, tsa tsʼe nindaná kʼoa tsa kʼiaje̱ nga faʼáxin kʼoa kjaʼaí batíoyangajaonile jmeni xi tjínle yaoná. Je chjota xi tsín njín xinyále, ninga je xi sʼa xtiʼndí, tikʼoakji tse mandayani kʼoa sakʼoaa ndi̱to̱n mandaya tikʼoajinni xi njín xinyále. c Kjoaixiní nga tsín ʼya xi be tsa kʼoéjnakon kʼoa tsa kuiyá jngo chjota, ninga njín xinyále kʼoa ninga mai.

 Ali tsa kuijin nga je chjinexki xi kʼoatso, jé kjoamakjain xi tjínnajin xi tsín tsjoáʼndenajin. Je Antiguo Testamento kʼoa kao Nuevo Testamento bʼéchjoaná xi tʼatsʼe je njín nga tsín koa̱n chinee kʼoa nga tsín koa̱n kui xinyáná (Génesis 9:4; Levítico 17:10; Deuteronomio 12:23; Hechos 15:​28, 29). Xi ijngosani, je njín kjoabijnachon tsoyanile xi kao Niná (Levítico 17:14). Jin xi testigole Jeobá maijin nitjosonníjin je kjoatéxoma xi faʼaitʼa Biblia xi tʼatsʼe njín, kʼoa kui kʼoanʼianijin nga bakolaijin kjoaxkóntokon je Niná xi kitsjoaná kjoabijnachon.

 Nichxin kjoatse je chjinexki kʼoasʼin kisikjaʼaitsjen nga je xki xi tsín jme njín tjínle, kao jotjín koya josʼin maxkiná xi tsín njín machjénle, nga nʼio xkón kʼoa saʼnda kʼoakitso nga joxi tjíosíkʼienkjoanni yaole je chjota xi kʼoasʼin maxkile. Tonga jelikui tikʼoasʼin síkjaʼaitsjenni ndʼaibi. Tobʼelañá, nga nó 2004 jngo rebista kitjo xi xki tínchja̱ni kʼoa i kitso: “Jotjín koya josʼin kjimaxkile je testigole Jeobá, je nó xi nroa kʼoati jesʼin koa̱nxkile chjota”. d Kʼoa nga nó 2010, je libro xi Medicina transfusional ʼmi kʼoakitso kʼianga jekʼoasʼin kjimaxkile chjota “jetsín tinjín koa̱nchjénni nga jtíya kʼoa jekʼoakoa̱nntsjai”.

 Ninga nʼio tse jña tile chjota jmi chjinexki xi tjío jngo tjíjtsa Sonʼnde xi kui tjíofitjenngi josʼin nga tsín toxkia tse njín kuitjo nga jtíle chjota kʼoa alikui tinjín tjíobinyánile. Jekoa̱n kʼoasʼin koa̱nxkile chjota ninga ya naxinandá jñani ma̱ tjíosíjchá yaole. Je nʼio nkjín chjota xi tsín testigole Jeobá xi síjé nga kʼoasʼin katamaxkile.