Majain. Kʼianga ʼyaijin nga tsín mangóson kao Biblia jmeni xi makjainnajin tosa kui nikʼantjaiyaijin josʼin makjainnajin.

 Kʼiaa nga nó 1950 tsakʼetsʼiakoaijin nga kichʼasjaijin je Traducción del Nuevo Mundo de las Santas Escrituras, tonga tokʼoa jechotʼayajinjin je Biblia nga kʼia. Kinichjénníjin je Biblia xi tjín kʼoa yaa kichjoenilaijin josʼin makjainnajin. Kataʼyala jngo jao koyaa jmeni xi jemakjainnajin nga kjesa chʼasjejinjin je Traducción del Nuevo Mundo kʼoa jisoa kataʼyai tsa ñaki mangóson kao jmeni xi bakóya je Biblia

1.   Jme xi makjainnajin: Ali tsa Trinidadjin je Niná. Je rebista Zionʼs Watch Tower (xi kao énná Xo̱n xi Bájinkonná ʼmi ndʼaibi) xi kitjo nga sá julio nó 1882 kitso: “Je xi bʼéxkia rebista jebi bení nga ninga makjainná tʼatsʼe Jeobá, Jesús kao espíritu santo, ñaki chʼasjengiñá jmeni xi tsín ya Biblia nroatʼa, jolani nga kʼoatso chjota kʼianga jan mani niná tonga nga tojngo mani kʼoa tsa maije̱ jotso kʼa nga tojngo mani Niná tonga nga janni mani”.

     Jmeni xi tso je Biblia: “Je Jeobá Nináná tojngo mani” (Deuteronomio 6:4). “Tojngo Niná xi tjínná, je Nʼainá, jñale xi je jinroani ngayije kjoa. [...] Kʼoa jngo Nainá Jesucristo xi tjínná, xi totʼatsʼe koanndani ngayije [...].” (1 Corintios 8:6.) Kʼoa je Jesús i kitso: “Je Nʼainá ngisa títjon kaoni tsa an” (Juan 14:28).

2.   Jme xi makjainnajin: tsín ʼnde jña lʼí títi kʼoa alikui kjoañʼai nikjaʼá chjotatsʼen ngantsjai nichxin. Je rebista Zionʼs Watch Tower xi kitjo sá junio nó 1882 i tsakʼin jngo kjoaʼmiya xi jaʼaitʼa: “Je chjíle jée kjoabiyaní”. Én jebi yaa kitjoeni Romanos 6:23 kʼoa i kitso rebista jebi: “Je én jebi ngotjo majinniná kʼoa alikui ñʼai tíjna. Ánni nga nʼio nkjín chjota xi makjainle nga Énle Niná je Biblia kʼoatsosíni kʼoa nga nʼio batiosíni nga je jée ya bʼechjiá ngantsjai nichxin ya jña lʼí títi kʼoa kʼoatsosíni nga ya Biblia bakóya jebi”.

     Jmeni xi tso je Biblia: “Je chjota xi jée bajngi, kuiyání” (Ezequiel 18:4, 20). Je kjoañʼai xi kʼoaile je xi batiochjoale Niná ali tsakuijin nga kjoañʼai ni̱kjaʼá tokʼia saʼndani, kuiní “nga ñaki ndiaa koaichajin” (2 Tesalonicenses 1:9).

3.   Jme xi makjainnajin: Je Reino de Dios, xi tsonile, Chjotaxále Niná, ñaki tíjnaní, ali tsa toyajin ni̱ma̱ná tíjnajin. Je rebista Zionʼs Watch Tower xi kitjo sá diciembre nó 1881 i kitso: “Kʼianga kʼoasʼin jetíjna Reino jebi, kui xi tsonile nga tjóxin ngatsʼi chjotaxá sonʼnde”.

     Jmeni xi tso je Biblia: “Kʼianga tjíosa chjotaxá xokjoan je Niná xi tíjna ngʼajmi jngo chjotaxá koasennda xi nikʼiajin tjóxin. Chjotaxá jebi ali tsa tikjaʼaíjin naxinandá koa̱nntsjani. Ñaki sichaoní kʼoa kjoaʼaxinní ngatsʼi chjotaxá xokjoan, kʼoa jé kʼoéjna ngantsjai nichxin” (Daniel 2:​44).

 Mai. Tojo nichjénníjin xi kjaʼaí Biblia kʼianga ʼmiyasuinjin josʼin makjainnajin. Kʼianga ʼmiyalaijin Biblia je chjota kʼoati bʼailaijin je Traducción del Nuevo Mundo kʼoa likui batenalaijin. Tonga tsa ʼya xi mele nga kjaʼaí Biblia sichjén nga kʼuínyalaijin alijo bixuínjin.