Nʼio nkjín chjota xi kʼoatso nga je kro xkósonle je xi chjotale Cristo ma. Ningalani chjotale Cristo maijin xi testigole Jeobá ʼminajin, tonga alikui nichjainjin je kro kʼoa nikuijinla bʼetsʼoalaijin. Ánni.

 Xi títjon, kuinga je Biblia alikui kʼoatso tsa jngo kro kʼientʼa je Jesús, to jngoní yajon kʼientʼa. Kʼoati jngo kjoatéxoma bʼaile je xi chjotale Cristo ma, xi tso: “Tinyaxinlao kjoale xkóson”. Kʼianga kro nichjén nga bʼetsʼoaa jngoyale jngo xkóson tsoyanile (1 Corintios 10:14; 1 Juan 5:​21).

 Xi ijngosani, tijé Jesús kʼoakitsoni jokoa̱nni jchale je xi ñaki chjotale ma kʼoa i kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:34, 35). Kʼoatjín, je xi ñaki ʼyanile je chjotale Cristo kuiní nga ñaki tsjoake xínkjín ali tsa kuijin nga kro kʼoa tsa jmesani xi sichjén.