Jaon. Jin xi testigole Jeobá maijin kjitʼaa binyakoaijin je xi kjoaxkón bichóne. Binyakaoníjin je xi testigole Jeobá ma kʼoa kao je chjota xi kjaʼaí, kʼoasʼin mangíntjenngijin jotso je Énle Niná xi nroatʼa ya Gálatas 6:10, jñani tso: “Nda si̱xá tʼatsʼe ngatsʼi. Tosa nʼio si̱xá tʼatsʼe je xi kʼoati makjainle”. Xi ijngosani, ninʼioníjin kon kʼoa binyakaoníjin nga nda katasatío kon je chjota xi kjoaxkón bichóne (2 Corintios 1:3, 4).

 Kʼianga jñani kjoaxkón bichó, je xi chjotajchínga sʼin tjío básjai ngatsʼi xi ya tjíojin je jtín jña bʼakaole ánni nga skoe̱ni josʼin tjíoni kʼoa skoe̱ jmeni xi machjénle. Kʼoa xijema, kʼiaa síkasénʼénle je sucursal xi tsʼe testigole Jeobá kʼianga bájinkon jmeni xi kama kʼoa josʼin tjíotsjoánganʼio.

 Kʼiatsa je jtín xi ya tíjna jña kjoaxkón kasokó likui kuicho nganʼiole nga kuinyakao je xi kjoaxkón kabichóne, je Cuerpo Gobernante xi tsʼe testigole Jeobá bʼéndajin josʼin kʼoainganʼiole je xi kjoaxkón kabichóne. Je sucursal xi tsʼe testigole Jeobá binyándaa je comité xi bʼéndajin josʼin koa̱nxá. Kʼoa je testigole Jeobá xi xin tsʼe bʼasjeʼa nichxinle nga fitsjoánganʼio kʼoa tsjoá tao̱n (Proverbios 17:17). Kʼianga siglo 1, nʼio nkjín chjotale Cristo xi kjinrá jaʼatojin xi kʼoatisʼin tsakʼainganʼiole (1 Corintios 16:1-4).

 Je tao̱n xi nikasén ya sucursal xi tsʼe testigole Jeobá, yaa tjoé choa tao̱n xi bʼainganʼionile je xi kjoaxkón bichóne (Hech. 11:27-30; 2 Corintios 8:13-15). Kʼoa nga tsín machjíle je xi tsjoánganʼio, je tao̱n jebi tojekjoán bʼainganʼionile je xi kjoaxkón bichóne. Xi ijngosani, je tao̱n xi maña chosonnile josʼin machjén (2 Corintios 8:20).