Jméni xi Watch Tower Bible and Tract Society ʼmi

TINÓʼYALAI NGA ÉN

Jngoo jtín xi tsín tao̱n síkinje xi kʼia kisʼejna nga nó 1884 xi kui fitjenngi je kjoatéxoma xi tjín ya Pensilvania (Estados Unidos). Kui jtín jebi síchjén je testigole Jeobá nga tjíotsoyason jngo tjíjtsa Sonʼnde kʼoa nga bʼasje je Biblia kʼoa kao xo̱n xi Énle Niná faʼaitʼa.

Je kjoatéxoma xi tjínle je jtín jebi kʼoatso nga kui xá tíjnani nga kuitsoya xi tʼatsʼe “relijión, nga koakoyale kʼoa kuinyakao chjota”. Tonga xi ngisa chjíle kuinga tsjoánganʼio nga “kataʼmiyason kʼoa nga katasakóya xi tʼatsʼe Chjotaxále Niná xi je Jesucristo kjinentsja”. Je xi ya faʼasʼenjin je jtín xi Watch Tower ʼmi toxá tjoéjinni kʼoa ali tsa tao̱njin tsjoá. Je xi ya tjíojin jtín jebi kʼoa kao xi nyatítjonle yaa tsjoánganʼiole je Cuerpo Gobernante xi tsʼe Testigole Jeobá.

Tjíosale xi kjaʼaí jtín

Je testigole Jeobá nkjínsa jtín tjíole jña xin naxinandá xi kʼoasʼin tjíosíchjén. Tjínkʼa xi kui jaʼaín jebi yʼa: “Watch Tower” kʼoa tsa “Watchtower”. Kʼoa tjínkʼa xi síkʼatoya jaʼaín jebi jme én xi nokjoa ya naxinandále.

Josaʼnda nga kisatio je jtín jebi nʼio tjíobinyakao je testigole Jeobá nga tjíobitjosonle je xá xi tjíosʼín, jolani jebi:

Nga satíonda kʼoa nga bitjo je xo̱n. Jela 220 miyón Biblia koannda kʼoa jeme 40 jmi miyón xo̱n xi Énle Niná faʼaitʼa jekitjo kʼoa tsʼato 700 koya én tíbitjo xo̱n jebi. Ya dirección xi tíjna ya Internet jw.org je Biblia jetsʼato 120 koya én jaʼatoya xi ya faʼaitʼa kʼoa nkjínsa koya jme xi faʼaitʼa jolani “Jméni je xi kjoatéxomale Niná tsole Biblia”.
Nga sakóya. Satío skuela jña nichjine je xi bakóya je Énle Niná. Tobʼelañá, jetsʼato 8,000 testigole Jeobá xi jeki Skuela xi tsʼe Galaad jña nichjine misionero josaʼnda nga kisʼejnatítjon nga nó 1943. Xíngiaa jebi kui xá nichjineni nga tsjoánganʼio je xá xi kjima jngo tjíjtsa Sonʼnde kʼoa nga tosi tonda kataʼmiyason. Xi ijngosani, miyón chjota ninga xi tsín testigole Jeobá ma xi tjíonichjine kʼianga satíole kjoajtín je testigole Jeobá nga xki̱ xomana. Kʼoati ʼmiyale chjota josʼin sʼexkia kʼoa josʼin chji. Kʼoa jngo xo̱n tsakʼasje je testigole Jeobá xi 110 koya én jejaʼatoya, kʼoa kui kjimachjén nga tísakóyale chjota josʼin sʼexkia kʼoa josʼin chji.
Bʼainganʼiole je xi kjoaxkón bichóne. Nikasénle je tsojmi xi machjénle je xi kjoaxkón bichóne kʼoa tsa ya naxinandá jña kjoasi sʼe. Tobʼelañá, kitsʼainganʼiole je xi kjoañʼai jaʼá kʼianga kiskan je chjota xi ya naxinandá Ruanda tsʼe kʼianga nó 1994 kʼoa kʼianga jaʼa cháonnʼio ya Haití nga nó 2010.

Ningalani nʼio tjíobinyakao je jtín jebi je testigole Jeobá kʼoa kao jtín xi tjíosale xi tjíosíchjén, tonga je xá xi tjíosʼín tojo kuitjoson ningalani tsín je jtín jebi. Nga jngó jngóní je chjotale Cristo nga kjinele nga kuitsoyason kʼoa nga koakoyale chjota je énnda chjotse (Mateo 24:14; 28:19, 20). Ñaki tjíojngo kon nga je Niná tjíobinyakao kʼoa nga tosi tonda sichikontʼain (1 Corintios 3:6, 7).