Je relijión xi tsʼe testigole Jeobá kʼiaa kinroatsʼiani nga tífikjetʼa siglo 19. Nga kui nichxin jngo jtín koanni chjota xi ya tsʼe Pittsburgh (Pensilvania, Estados Unidos) xi jngó jngó koya kiskotʼayajin jmeni xi tínchja̱ni je Biblia. Kʼoati kisingósonkao jmeni xi bakóya je relijión kʼoa kao jmekjoanni xi bakóya je Biblia. Xijekoan, kitsoyale chjota jmeni xi koanjinle. Tsakʼasjee libro, kiski jmeni xi ya tsakatíotʼa periódiko kʼoa tsakʼasje je rebista xi Xo̱n xi Bájinkonná tʼatsʼe Chjotaxále Jeobá ʼmile ndʼaibi.

 Jngo xi kʼoasʼin nda kiskotʼaya je Biblia nga kʼia jéní xi Charles Taze Russell tsakʼin. Tsandalani je tsakʼasje títjon je Xo̱n xi Bájinkonná kʼoa je tsakándiaa nga tsakʼinyason je Énle Niná nga kui nichxin, ali tsakuijin xi tsonile tsa je tsakʼétsʼiakao je relijión xi tsʼe testigole Jeobá. Je xi koanmele Russell kʼoa kao xi ngikʼa Chjota xi kotʼaya Biblia, tojosʼin ʼyale nga kʼia, kuinga ska̱nibason jme xi tsakakóya Jesucristo kʼoa nga kʼoakjoansʼin koaitjenngi jokisʼin je chjotale Cristo xi títjon tsakatio. Kʼoasʼin makjainnajin nga je Jesucristo tsakʼétsʼiakao relijiónnajin nga̱ jé títjon tsakʼétsʼiakao saʼnda ngasʼa (Colosenses 1:18-20).