Kʼianga ningósonkao je Biblia josʼin faʼaitʼa je xo̱njchá xi kichjitʼa ngasʼa, tíʼyale nga tojo kui je kjoafaʼaitsjen xi faʼaitʼa, ningalani jejmi nó tjínle nga kichji Biblia tonga nkjín copia kiski je chjota kʼoa kui kisichjén tsojmi xi tochoatse male.

 Jmi xo̱njchá xi tsʼe Biblia kjimasjai. Tjínkʼa xi me tsín mangóson, kui xi tsonile jebi nga sakʼoa kijinle je én xi kiski. Ninga kʼoalani, alikui nʼio tse jmeni xi bʼetʼale kʼoa tikʼoasʼin majinniná jmeni xi tso. Tonga kʼoati tíʼyale nga tjínkʼa Biblia xi to je chjota kisikʼantjaiyajin kʼa je én xi faʼaitʼa kʼoa nga jekjoatse nga kʼoakisʼin je chjota xi kisikʼatoya. Jaola choa̱ kataʼyaa.

1.   Tjínkʼa Biblia xi jekjoatse jaʼatoya xi i̱ tso ya 1 Juan 5:7: “Ya ngʼajmi, je Nʼainá, je én xi tijeni Cristo, kao je Espíritu Santo. Toñaki jngo ma nga janbe”. Tonga je copia xi jaʼatoya nichxin kjoatse, kui bakó nga tsín kʼoatso je én xi faʼaitʼa je rollo jchá xi kichjitʼa títjon saʼnda ngasʼa. Skaan tsakʼétʼason chjota. a Kuinga tsín faʼaitʼani én jebi je Biblia xi ndasʼin tífaʼatoya xi sʼa tíbitjo nichxin xi tiyoaa ndʼaibi.

2.   Je jaʼaínle Niná, jmi kʼa faʼaitʼa je rollo xi kjio saʼnda nichxin kjoatse, tonga nkjín Biblia xi tjíofaʼáxinle jaʼaínle Niná, to “Señor” kʼoa to “Niná” tjíobʼé.

 Makjoanni nga nʼio nkjín Biblia tíbitjo nichxin xi tiyoaa ndʼaibi, ngisajin ñʼai koa̱nná nga jchaa jñani tsín nda tjíofaʼatoya. b Jósatío tokoán nga tsín mangóson jmeni xi tso nga jngó jngó Biblia. A koaan koa̱nkjainná jmeni xi tso Biblia xi kjioná ndʼaibi.

•   Xi tʼatsʼe Escrituras Hebreas (xi kʼoati Antiguo Testamento ʼmi), je William Henry Green i kitso: “Ñaki tíʼyale nga tojo kui je kjoafaʼaitsjen xi faʼaitʼa jokisʼe je xo̱njchá xi kichjitʼa saʼnda ngasʼa”.

•   Je chjota xi Biblia kotʼayason xi Frederick Bruce ʼmi, i kitso xi tʼatsʼe Escrituras Griegas Cristianas xi kʼoati Nuevo Testamento ʼmi: “Jmeni xi tso Nuevo Testamento [...] nkjín choa̱ tjín xi bakó nga ñaki kʼoatjín jmeni xi faʼaitʼa. Ningalani nkjín libro kjio xi nʼio ʼyale xi kʼoati kjaʼaí én jaʼatoya, je chjota to makjainle jmeni xi tso kʼoa saʼnda tsín ʼya xi mandosinle nga básjaiya tsa ñaki kʼoakjoansʼin jaʼatoya”.

•   Je Frederic Kenyon, xi kui kiskotʼayason je rollo xi kjio ngasʼa, kʼoakitso nga koa̱n kʼoakuixoán nga ñaki Énle Niná je Biblia kʼoa nga tojo kui je kjoafaʼaitsjen xi faʼaitʼa ninga jenkjín chjota tjíosíkʼatoya.

•   Jolani je chjota judío xi kisikʼatoya Biblia kʼoa kao xi chjotale Cristo koan, alikui tsakʼéʼma jme jée xi tsakajngi je naxinandále Niná (Números 20:12; 2 Samuel 11:2-4; Gálatas 2:11-14). c Kʼoati tsakʼétʼaxo̱n je kjoañʼai xi kisikasénne je Niná nga tsín kisitjoson je chjota judío kʼoa kao josʼin koankjainle je chjota xi tsín Niná kisixále (Oseas 4:2; Malaquías 2:8, 9; Mateo 23:8, 9; 1 Juan 5:21). Nga ñaki kʼoakjoansʼin kisikʼatoya Biblia chjota jebi kui bakó nga kixi koan kʼoa nga nʼio tsjoake koan je Énle Niná.

•   A tsí kui xi bakó jebi nga kui xi koanmele Niná nga jchaa jmeni xi tso Biblia (Isaías 40:8; 1 Pedro 1:24, 25). d Ali tsa kuijin xi koanmele Niná nga toje kuinyakao je chjota xi tsakatio nichxin kjoatse kʼoati kui xi koanmele nga kuinyakaoná tsanda ñá (1 Corintios 10:11). Kuinga i̱ tsoni: “Je kjoa kichjitʼa ngasʼa, kichjitʼa xi tʼatsʼe nga koakoyaná, jméni nga sʼe̱síniná kjoachoyakaokjoa xi totʼatsʼe kjoatsejta kao kjoanijetakon xi tjínle xo̱n Escrituras” (Romanos 15:4).

•   Je Jesús kʼoa kao chjotatjenngile kui copia xi tsʼe Escrituras Hebreas kisichjén kʼianga tsakakóya kʼoa alikui jao kisʼe kon kʼianga tsakʼéxkia jmeni xi tso (Lucas 4:16-21; Hechos 17:1-3).